=====
ဝါဆို
၂၂ သြဂုတ် ၂၀၂၄
ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ နောင်တရားမြို့မှာ အာဏာသိမ်း စစ်ကောင်စီလက်အောက်ခံ PNO/PNA ပအိုဝ်းပြည်သူ့စစ်တပ်ဖွဲ့က လူအင်အား တစ်သောင်းနဲ့ အ မှတ်စဉ် (၁) အခြေခံစစ်သင်တန်းဆင်းပွဲ အခမ်းအနားကို သြဂုတ်လ (၂၁)ရက်နေ့က ကျင်းပခဲ့တယ်လို့ သတင်းရရှိပါတယ်။
“နောင်တရားမှာ PNOက အင်းအားအများအပြားနဲ့ စစ်သင်တန်းဆင်းပွဲလုပ်သွားတယ်။ ပအိုဝ်းဒေသထဲမှာ တိုက်ပွဲတွေဖြစ်နေတော့ အင်အားပြတဲ့ သဘောပဲ။ မဝင်မနေရ လူသစ်စုထားတာကပိုများတယ်” လို့ ဒေသ ခံတစ်ဦးကပြောပါတယ်။
အခုလက်ရှိ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်အတွင်းမှာ PNO/PNA ပအိုဝ်းပြည်သူ့စစ်တပ်ဖွဲ့နဲ့ စစ်ကောင်စီပူးပေါင်းစစ်ကြောင်းတွေဟာ ပအိုဝ်းအမျိုးသားလွတ်မြောက်ရေးတပ် (PNO/ PNLA)နဲ့ တော်လှန်ရေးအင်းအားစုတွေရှိရာ ကျေးရွာတွေဘက်ကို ထိုးစစ်ဆင်နေတာကြောင့် တိုက်ပွဲပြင်ထန်နေတယ်လို့ ဒေသခံတွေကဆိုပါတယ်။
“ ဆီဆိုင်ဘက်မှာ တိုက်ပွဲပြန်ဖြစ်နေတာ ဆယ်ရက်ဝန်းကျင်လောက်ရှိပြီ။ တပ်ဘက်က ဟောင်ဝစ်ဇာနဲ့ကော ၁၂၀ မမတွေနဲ့ လှမ်းလှမ်းပစ်နေတာ။ PNLO ဌာနချုပ်ကိုလည်း လက်နက်ကြီးတွေနဲ့ လှမ်းထုနေတာ။ ကွဲ တဲ့အလုံးလည်းရှိတယ် မကွဲတာလည်း ရှိတယ်” လို့ဆိုပါတယ်။
PNO/PNA တပ်ဖွဲ့ဟာ ၁၉၉၁ ခုနှစ်က အစိုးရနဲ့ အပစ်ရပ်ငြိမ်းချမ်းရေးယူခဲ့ပြီး စစ်ကောင်စီလက်အောက်ခံ ပြည်သူ့စစ်တပ်ဖွဲ့အဖြစ် အသွင်ပြောင်းခဲ့တာဖြစ်ပါတယ်။ PNO/PNA ပြည်သူစစ်တပ်ဖွဲ့ဟာ သူတို့စိုးမိုးရာနယ် မြေတွေအတွင်းက လူငယ်တွေကို အဓမ္မတပ်သားသစ် စုဆောင်းတာတွေရှိနေတယ်လို့လည်း ဒေသခံတွေကပြောပါတယ်။
ဓါတ်ပုံ- PNO/PNA စစ်သင်တန်းဆင်းပွဲအခမ်းအနား
