လါအီးကထိဘၢၣ် ၇သီ၊၂၀၂၃နံၣ်
ကညီကီၢ်စဲၣ် မုၢ်တြီၤကီၢ်ရ့ၣ် ကမးမီကီၢ်ဆၣ် ကဝီၤဒ့၂ဒီးကဝီၤဒ့၃အပူၤ ဟံၣ်ကျီးလီၢ် ၁၃လီၢ် ကစၢ်တဖၣ်လၢတၢ်မၢသုးဃီၢ်အလီၢ်တဖၣ် ကဝီၤဒ့ ၃ ပၢပြးပှၤဘၣ်မူဘၣ်ဒါဒီးကျီးကစၢ်လၢညါတဖၣ်ကိးထံၣ်ဒီးတဲပျံၤတဲဖုးဝဲဖဲလါအီးကထိဘၢၣ် ၆သီအနံၤန့ၣ်သ့ၣ်ညါဘၣ်လၢလီၢ်ကဝီၤဖိတဖၣ်အိၣ်န့ၣ်လီၤ
ဟံၣ်ကျီးလီၢ်အံၤကဘၣ်တၢ်နီၣ်ဖးဟံဝဲတဂၤတဝၣ်တၢ်ဆၢတဲၤဖီခိၣ် မ့တတူၢ်လိာ်ဝဲဘၣ်န့ၣ်ကဟ့ၣ်က့ၤဝဲဆူ ပယီၤသုးစုတီၤဖီလာ် BGFသုးတဖၣ်ဒီး ကဝီၤဒ့၃ပၢပြးပှၤဘၣ်မူဘၣ်ဒါဟံၣ်ကပၤ ကပျိးလီၤဝဲလၢ (ထိပ်တုံး)ပူၤမ့တမ့ၢ်ကဟံန့ၣ်က့ၤဝဲကျီးဒီတဘ့ၣ်န့ၣ် ကဝီၤဒ့၃ ပၢပြးပှၤဘၣ်မူဘၣ်ဒါသဲအူဒီးကျီးကစၢ်လၢညါတဖၣ်န့ၣ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
“ကဝီၤဒ့ပၢပြးတဲပှၤလၢလဲၤတဖၣ်ကဘၣ်ဟံန့ၣ်ဝဲတဂၤတဝၣ် မ့ထၢနုာ်ဝဲလၢ (ငါးဂိမ်းရုံ)န့ၣ် BGFသုးတဖၣ် ကဒူအဝဲသ့ၣ် တဟ့ၣ်ဒုးအီၣ်မ့ၤဘၣ် မ့ယံၤထီၣ်တူာ်ဝဲတန့ၣ်န့ၣ်ကဘၣ်ဟ့ၣ်ဝဲလီၤတဲဝဲဒ်န့ၣ်တဲဝဲနသုဆိကမိၣ် မ့ၢ်တုၤလၢ (ငါးဂိမ်းရုံ)နသုကျီးလၢနသုအမံၤတဖၣ်ကဘၣ်တၢ်ဟံန့ၣ်က့ၤခဲလၢာ် အခဲနသုမ့တူၢ်လိာ်အဃိယကမၤန့သု”အဝဲစံးဝဲလီၤ
တကးဒံးဘၣ် ဟံၣ်ကျီး ၁၃လီၢ် လၢကဝီၤဒ့ ၂ဒီး၃တဖၣ် အလံာ်အုၣ်သးတဖၣ်အံၤမ့ၢ်တၢ်အယီၤတဖၣ်ဝံၤဆၢကတီၢ်ခဲအံၤ သုတသ့လၢၤဘၣ်န့ၣ်ကဝီၤဒ့၃ပၢပြးဒီး ကျီးကစၢ်လၢညါတဖၣ်စံးဝဲန့ၣ်လီၤ
ဖဲအပူၤကွံာ် လါယူၤလံဒီးလါအီကူးအခါနာ်က့ ဟံၣ်ကျီးလီၢ် ၁၃လီၢ် ကစၢ်တဖၣ်လၢတၢ်မၢသုးဃီၢ်အလီၢ်တဖၣ် အကျါ BGFသုး သုးခိၣ်မီၣ်ခၠ့းတီခိၣ်ရိၤမဲဒီးမၤဟးဂီၤကွံာ်ဟံၣ်သၢဖျၢၣ်တကးဒံးဘၣ် တဲဝဲလၢကတဲသကိးတၢ်အဂီၤက့ၤမၤဆူၣ်မၤဆိးဒီးက့ၤဖှီၣ်ဝဲဟံၣ်ကစၢ်လၢဘၣ်တၢ်မၤဟးဂီၤအဟံၣ်တဖၣ်န့ၣ်လီၤ
အခဲကဝီၤဒ့၂ဒီးကဝီၤဒ့၃အပူၤ ဟံၣ်ကျီးလီၢ် ၁၃လီၢ် ကစၢ်တဖၣ်လၢတၢ်မၢသုးဃီၢ်အလီၢ်တဖၣ်အတၢ်ဂ့ၤအံၤ ပယီၤသုးစုတီၤဖီလာ် BGFသုးခိၣ် စီၤမီၣ်ခၠ့းတမၤလၢၤဝဲဘၣ်ဒီး ကဝီၤဒ့ ၃ပၢပြး သဲအူ ဟံန့ၣ်မူဒါမၤဝဲန့ၣ်လီၢ်ကဝီၤဖိတဖၣ်စံးဝဲလီၤ
ကဝီၤဒ့၂ဒီးကဝီၤဒ့၃အပူၤ ဟံၣ်ကျီးလီၢ် ၁၃လီၢ် ကစၢ်တဖၣ်လၢတၢ်မၢသုးဃီၢ်အလီၢ်တဖၣ်အံၤစးထိၣ်လၢ ၂၀၀၁နံၣ် ဟဲက့ၤသုးဃီၢ်အိၣ်ဝဲ သခွဲးဖိသဝီဆူ ကမးမီ တကပၤဒီး ဖဲအပူၤကွံာ် ၂၀၁၈ NLD ပဒိၣ်အခါ ပယီၤသုးစုတီၤဖီလာ် BGFသုးခိၣ် စီၤမီၣ်ခၠ့းတၢၣ်ဝဲဒ်သိးကသုးဃီၢ်ဝဲဟံၣ် ၁၃ဖျၢၣ်နာ်က့ ဘၣ်တဘၣ်တၢ်တူာ်လိာ်န့ၣ်လီၢ်ကဝီၤတၢ်ကစီၣ်စံးဝဲအသိးသ့ၣ်ညါဘၣ်န့ၣ်လိီၤ
