ကီးတရံးဝ့ၢ် ဒမးယာ်မးသီခါဖၠၣ်ဖီခိၣ် ပယီၤသုးလၢဆီလီၤလီၢ်တဖၣ် ဘၣ်တၢ်ခးလီၤမ့ၣ်ပိၢ်ဒီးဒြိဒီးသးနံၣ် ၁၀ ဖိသၣ်တဂၤဒီးလီၢ်ကဝီၤဖိဘၣ်ဒိတဂၤ

လါအီးကထိဘၢၣ် ၇သီ၊၂၀၂၃နံၣ်

ကညီကီၢ်စဲၣ် ကီးတရံးဝ့ၢ် နီၢ်ဂံၢ် ၂ ကဝီၤဒ့ ဒမးယာ်မးသီခါဖၠၣ်ဖီခိၣ် ပယီၤသုးလၢဆီလီၤသးတဖၣ် ဘၣ်တၢ်ခးလီၤမ့ၣ်ပိၢ်ဒီးဒြိခီဖျိကရူၢ်ကရၢလၢတသ့ၣ်ညါအမံၤတဖုဒီးမ့ၣ်ပိၢ်လီၤတဲၤပိၢ်ဖးထီၣ်လၢကျဲကပၤအဃိ သးနံၣ် ၁၀ဖိသၣ်တဂၤဒီးလီၢ်ကဝီၤဖိဘၣ်ဒိတဂၤန့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

ဖဲအပူၤကွံာ်လါအီးကထိဘၢၣ်၆သီ မုၢ်နၤခီ ၄နၣ်ရံၣ်ဃၣ်ဃၣ်ဆၢကတီၢ် ကရူၢ်ကရၢလၢတသ့ၣ်ညါအမံၤတဖု ဟဲခးလီၤမ့ၣ်ပိၢ်ဒီးဒြိဆူ ဒမးယာ်မးသီခါဖၠၣ်ဖီခိၣ်ပယီၤသုးဆီလီၤလီၢ်တဖၣ်န့ၣ်လီၤ

ခီဖျိဘၣ်တၢ်ခးလီၤမ့ၣ်ပိၢ်ဒီးဒြိအဃိ သးနံၣ်၁၀အီးကၣ်ဖၠိဒီးသးနံၣ် ၄၆နံၣ် အီၣ်ကိၣ်လဲး ဘၣ်ဒိဒီးမ့ၣ်ပိၢ်အက့(တၢ်ဘၣ်ယိၤတအိၣ်)န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

“မ့ၣ်ပိၢ်တဖျၢၣ်လီၤ တလီၤတဲၤဖဲသုးကလၢၤလဲၤလီၤတဲၤဖဲကျဲဖီခိၣ် ဖိသၣ်န့ၣ်ဘၣ်ဒိဒီးမ့ၣ်ပိၢ်အက့ဖဲအမဲာ်သၣ်န့ၣ် ပှၤအဒိၣ်တဂၤန့ၣ်ဘၣ်ဖဲအဟၢဖၢဒီးအစုလီၤ ဖိသၣ်မ့ၢ်ဂ့ၤသးပှၢ်မ့ၢ်ဂ့ၤတၢ်ဘၣ်ယိၤအဂီၤတအိၣ်ဘၣ်”န့ၣ်ကီးတရံးဝ့ၢ်လီၢ်ကဝီၤဖိစံးဝဲလီၤ

ဖဲပှၤဘၣ်ဒိခံဂၤအကျါ သးနံၣ် ၄၆နံၣ် အီၣ်ကိၣ်လဲး ဘၣ်ဒိအါအဃိ ဘၣ်ဆှၢထီၣ်ဝဲကီးတရံးတၢ်ဆါဟံၣ်ဆူ ဖၣ်အၣ်တၢ်ဆါဟံၣ်တဆီန့ၣ်သ့ၣ်ညါဘၣ်န့ၣ်လီၤ

မ့ၣ်ပိၢ်လီၤတဲၤပိၢ်ဖးထီၣ်ဝံၤဖဲ၄နၣ်ရံၣ်၃၉မံးနံးဃၣ်ဃၣ်ဆၢကတီၢ် ခးလီၤကဒီးမ့ၣ်ပိၢ်ဒီးဒြိနာ်က့ ပှၤကညီဘၣ်ဒိတအိၣ်ဘၣ်န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

“တ့ၤလီၤမ့ၣ်ပိၢ်ဝံၤဖဲ၄နၣ်ရံၣ်တခိဆၢကတီၢ်ထးဟဲခးဝဲလၢခံတဖျၢၣ် လီၤဒၣ်ဖဲအဘူးဒီးတၢတဘျီလီၤတဲၤအလီၢ်လီၤ ဖဲန့ၣ်ပှၤဘၣ်ဒိတအိၣ်ဘၣ်”န့ၣ် ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

ဘၣ်ဃးဒီးတၢ်ခးလီၤမ့ၣ်ပိၢ်ဒီးဒြိတဘျီအံၤ ပဝဲ People’s Radio Myanmar တၢ်ကစီၣ်သန့ဆဲးကျီးသံကွာ်ဆူ လီၢ်ကဝီၤကမျၢၢ်ဒီသဒၢသုးတဖၣ်အိၣ်နာ်က့ ပှၤတစံးဆၢက့ၤဒံးဘၣ်န့ၣ်လီၤ

ဖဲအပူၤကွံာ် လါစဲးပထ့ဘၢၣ်၃သီ ဟါခီဆၢကတီၢ်ခါနာ်က့ ကီးတရံးဝ့ၢ် ပၢၤကီၢ်ဝဲၤဒၢးမဲာ်ညါဘၣ်တၢ်ခးလီၤမ့ၣ်ပိၢ်ဒံးန့ၣ် သ့ၣ်ညါဘၣ်လၢကီးတရံးဝ့ၢ်လီၢ်ကဝီၤဖိတဖၣ်အိၣ်န့ၣ်လီၤ

ကညီကီၢ်စဲၣ် မၠၣ်ဝတံၣ်၊ကီးတရံး၊ကြုၤတူၢ် ၊နိၣ်တကီ၊ဃိၣ်သၢဖျၢၣ် ဒီးသၣ်တီၣ်ဝ့ၢ်ပူၤပယီၤသုးစုဖီလာ် ဝဲၤကျိၤဝဲၤဒၢးတဖၣ်ဒီး ပယီၤသုးဆီလီၤလီၢ်တဖၣ်ဘၣ်တၢ်ခးလီၤမ့ၣ်ပိၢ်ဒီးဒြိတပယူာ်ဃီဒီးဘၣ်တၢ်နုာ်လီၤခးအီၤအဃိ လါစဲးပထ့ဘၢၣ်တလါအတီၢ်ပူၤ ပယီၤသုးစုတီၤဖီလာ်ဝဲၤဒၢးပှၤမၤတၢ်ဖိသံအဂၤ၂၀ဃၣ်ဃၣ်န့ၣ်လီၢ်ကဝီၤတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ