လါအီးကထိဘၢၣ် ၄သီ၊၂၀၂၃နံၣ်
ကညီကီၢ်စဲၣ် ကီးတရံးကီၢ်ဆၣ် အီဖး(ဖးဒိၣ်)သဝီပယီၤသုးခးလီၤနါစိၤကျိဖးဒိၣ်အဃိ လီၢ်ကဝီၤကမျၢၢ်ဟံၣ်သၢဖျၢၣ်ဘၣ်ဒိဟးဂီၤဝံၤလီၢ်ကဝီၤဖိဘၣ်ဒိတဂၤန့ၣ်သ့ၣ်ညါဘၣ်လၢကီးတရံးဝ့ၢ်လီၢ်ကဝီၤဖိအိၣ်န့ၣ်လီၤ
ကီးတရံးဝ့ၢ် ခလရ ၉၇သုးဒီး လဲၣ်ဝးကျိဖးဒိၣ်တဖၣ် တၢ်ဒုးတကဲထီၣ်နာ်က့ ခးလီၤကျိဖးဒိၣ်ဆူ ကီးတရံးဝ့ၢ်အဃၢၢ် ကီးနွဲၣ်၊ကမဲၣ်ကိ၊အီဖး(ဖးဒိၣ်)သဝီတဖၣ်ဒီး အ့ရှါကျဲတကပၤကိးမုၢ်နံၤန့ၣ်လီၤ
ဖဲအပူၤကွံာ် လါအီးကထိဘၢၣ်၃သီ မုၢ်နၤခီ၈နၣ်ရံၣ် ၁၅မံးနံးဆၢကတီၢ်ခါနာ်က့ ပယီၤသုး ခလရ၉၇သုးခးလီၤနါစိၤကျိဖးဒိၣ်အဃိ အီဖး(ဖးဒိၣ်)သဝီပူၤဟံၣ်ဘၣ်ဒိဟးဂီၤသၢဖျၢၣ်ဒီး သးနံၣ်၇၅နံၣ် သးပှၢ်မုၢ်မဲၣ်တ့ၣ် ဘၣ်ဒိန့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ
“ကျိဖးဒိန့ၣ်ခးလီၤဝဲကိးမုၢ်နၤလီၤ ဖဲမနၤနာ်က့စးထီၣ်လၢမုၢ်နၤခီ၈နၣ်ရံၣ်န့ၣ် ၉၇သုးခးလီၤဝဲလီၤ လီၤတဲၤလၢအီဖး(ဖးဒိၣ်)သဝီပူၤသၢဖျၢၣ်လီၤ မုၢ်ဂၤမဲၣ်တ့ၣ်ခီန့ၣ်လီၤတဲၤလၢအဟံၣ်ခိၣ်အဃိဘၣ်ဒိလၢအဟၢဖၢ ဘၣ်ဒိတဆံးတက့ၢ်လီၤ တၢ်ဘၣ်ယိၤတအိၣ်ဘၣ်”န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ
တကးဒံးဘၣ်ကီးတရံးဝ့ၢ်ဒီးအဃၢၢ် ပယီၤသုးဒီးKNLAသုးပၣ်ဖှိၣ်အဘၢၣ်စၢၤ ခံခီခံကပၤတၢ်အိၣ်သးဖ့ၣ်ဆၢဒီး ပယီၤသုးတကပၤ ထီၣ်သုးကျိၤဆူ ကီးနွဲသဝီဒီး အ့ရှါကျဲတကပၤ တပယူာ်ဃီအဃိ KNLAသုးဖိတဖၣ် ဘၣ်အိၣ်ကတဲၤကတီၤသးန့ၣ် KNLAသုးဂံၢ်ခီၣ်ထံးတဂၤစံးဝဲန့ၣ်လီၤ
“တၢ်ထီၣ်ဒုးတၢ်အိၣ်သးန့ၣ်အဝဲသ့ၣ်ကဟဲထီၣ်ဆူတၢ်မဲာ်ညါလီၤ ခးလီၤကျိဖးဒိၣ်ကိးမုၢ်နံၤလီၤ အခဲပပှၤအိၣ်လၢတၢ်မဲာ်ညါတဖၣ်ဘၣ်အိၣ်ကတဲၤကတီၤသးန့ၣ်”အဝဲစံးဝဲလီၤ
တကီၢ်ခါခဲအံၤ ကီးတရံးဝ့ၢ်ဒီးအဃၢၢ် ပယီၤသုးခးလီၤကျိဖးဒိၣ်အသိး တီၣ်ကၠၣ်အ့သဝီပူၤ ပယီၤသုးဆီလီၤအိၣ်ဝဲဒီး တၢ်ဒုးကဲထီၣ်တပယူာ်ဃီဒီး KNLAသုးပၣ်ဖှိၣ်တဖၣ်န့ၣ်လီၤ
ကညီကီၢ်စဲၣ် ကီးတရံးဝ့ၢ်ပူၤ လါအီကူးဒီးလါစဲးပထ့ဘၢၣ် ခံလါအတီၤပူၤ ခီဖျိပယီၤသုးခးလီၤကျိဖးဒိၣ်အဃိလီၢ်ကဝီၤဖိဘၣ်ဒိအဂၤ၂၀ဘျဲၣ်ဒီး ဟံၣ်ဘၣ်ဒိဟးဂီၤ ၁၅ဖျၢၣ်ဘျဲၣ်န့ၣ်ဒူပျာ်ယာ်တၢ်ကစီၣ်သန့ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ
