လါအီးကထိဘၢၣ် ၃သီ၊၂၀၂၃နံၣ်
ကညီကီၢ်စဲၣ် သၣ်တီၣ်ကီၢ်ဆၣ် တီအူ-လ့းသိၣ်သိလ့ၣ်ကျဲ ပယီၤသုးပံးဃးဝဲသိလ့ၣ်ဖးဒိၣ်တၢ်လဲၤထီၣ်က့ၤလီၤအဃိ လ့းသိၣ်ကီၢ်ဆၣ်ပူၤသဝီအဖျၢၣ် ၁၀ဘျဲၣ် တၢ်အီၣ်တၢ်အီလီၤတိၢ်န့ၣ် သ့ၣ်ညါဘၣ်လၢလ့းသိၣ်လီၢ်ကဝီၤဖိအိၣ်န့ၣ်လီၤ
တီအူ-လ့းသိၣ်သိလ့ၣ်ကျဲ စးထီၣ်ဖဲအပူၤကွံာ် လါစဲးပထ့ဘၢၣ်၂၅သီ ပယီၤသုးပံးဃးဝဲသိလ့ၣ်ဖးဒိၣ်ဟးထီၣ်က့ၤလီၤန့ၣ်လီၤ
ခီဖျိပံးဃးဝဲသိလ့ၣ်ဖးဒိၣ်ဟးထီၣ်က့ၤလီၤအဃိ လ့းသိၣ်ဝ့ၢ်ဒီး အဃၢၢ်သဝီတဖၣ်လၢအမ့ၢ်ဝဲ စလဲ၊သၣ်မိတီၣ်၊ယၣ်ဒိၣ်၊ဝၣ်သီခိၣ်၊ပယဲၤစီသဝီဒီးအဃၢၢ်သဝီအဖျၢၣ် ၁၀ဘျဲၣ်ပူၤလီၢ်ကဝီၤဖိတဖၣ် တၢ်အီၣ်လီၤတိၢ် ကဲထီၣ်န့ၣ် လ့သိၣ်ဝ့ၢ်လီၢ်ကဝီၤဖိစံးဝဲလီၤ
“အခဲပလိၣ်ဘၣ် ဃုသး၊သိ၊တၢ်ဆၢကမူၤ၊ညၣ်အုၣ်တဖၣ်လိၣ်လီၤ လၢသဝီတဖၣ်တကပၤနာ်က့တအိၣ်လၢၤဘၣ် ထီၣ်တဟံၣ်လီၤတဟံၣ်နဃ့တၢ်မၤစၢၤနာ်က့တန့ၣ်ဘၣ် အခဲစ့မ့အိၣ်နာ်က့ပှ့ၤတန့ၣ်ဘၣ်”န့ၣ်လ့းသိၣ်ဝ့ၢ်လီၢ်ကဝီၤဖိစံးဝဲလီၤ
တချူးလၢပယီၤသုးကီၣ်ကးတပံးဃးသိလ့ၣ်ဖးဒိၣ်အခါနာ်က့ ပယီၤသုးတဖၣ်တြီဃၣ်ဝဲတၢ်ဆှၢထီၣ်တၢ်အီၣ်တၢ်အီတဖၣ်ဒီးအခဲပံးကွံာ်ဝဲသိလ့ၣ်ဖးဒိၣ်ဟးထီၣ်က့ၤလီၤဒ်အံၤန့ၣ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
“ဖဲအပူၤကွံာ်သၢလါန့ၣ်လံ ပံးဃးဝဲတၢ်ဆှၢထီၣ်ဃုသးလၢညါသိလ့ၣ်တခိၣ်န့ၣ်ဘၣ်တီၤဝဲဃုသး၅တဲၤလီၤ လၢန့ၣ်လံဃုပှ့ၤထီၣ် အခဲတပျဲသိလ့ၣ်ဖးဒိၣ်လဲၤလၢၤဘၣ် သိလ့ၣ်ယီၢ်န့ၣ်ပျဲလဲၤဝဲ နာ်က့ကီဒိၣ်မး သမံသမိးတၢ်ဃံးဒိၣ်မးလီၤ”န့ၣ်အဝဲစံးဝဲလီၤ
တကးဒံးဘၣ် ပယီၤသုးကီၣ်ကးပံးသိလ့ၣ်ကျဲဒ်အံၤအဃိ သၣ်တီၣ်ဝ့ၢ်ပူၤကမျၢၢ်ဃ့ၢ်တၢ်ဒုးတဖၣ်နာ်က့ ဘၣ်သဂၢၢ်ဒီးတၢ်အီၣ်လီၤတုၢ်န့ၣ် သ့ၣ်ညါဘၣ်လၢပှၤမၤစၢၤကမျၢၢ်ဃ့ၢ်တၢ်ဒုးတဖၣ်အိၣ်န့ၣ်လီၤ
“အခဲအဝဲသ့ၣ်လဲၤလၢ ကစၢၢ်ခိၣ်သဝီတဖၣ်တကပၤလီၤ ဟဲခးလီၤတၢ်ဒီးကဘီယူၤ၊ခးလီၤကျိဖးဒိၣ်ဆူသၣ်တီၣ်ဝ့ၢ်ပူၤလီၤ အခဲအံၤလၢပအိၣ်န့ၣ် ကမျၢၢ်ဃ့ၢ်တၢ်ဒုးအိၣ် ၅၀၀ဘျဲၣ်လီၤ ကျဲလဲၤတန့ၣ်လၢၤဘၣ်အဃိတၢ်အီၣ်တလၢဘၣ် တနီဒီတနံၤန့ၣ်မးအီၣ်ဘၣ်မ့ၤတလီခီလီၤ “န့ၣ်ပှၤမၤစၢၤကမျၢၢ်ဃ့ၢ်တၢ်ဒုးတဖၣ်စံးဝဲလီၤ
တကီၢ်ခါခဲအံၤ သၣ်တီၣ်ဝ့ၢ် ၊လ့းသိၣ်ဒီးတီအူဝ့ၢ်တဖၣ်တကပၤ ပယီၤသုးကီၣ်ကးဒီးလီၢ်ကဝီၤတၢ်ပၢၢ်ဆၢသုးတဖၣ်အဘၢၣ်စၢၤ ခံခီခံကပၤသုးအတၢ်ဖ့ၣ်ဆၢအိၣ်ထီၣ်ဒီး ပယီၤသုးတကပၤ ခးလီၤကျိဖးဒိၣ် ဟဲတ့ၤလီၤမ့ၣ်ပိၢ်ဒီးကဘီယူၤအဃိ လီၢ်ကဝီၤကမျၢၢ်၃၀၀၀ဘျဲၣ်ဘၣ်ဃ့ၢ်တၢ်ဒုးန့ၣ် သ့ၣ်ညါဘၣ်ခီဖျိ Thandaung Mupoeထုးထီၣ်တၢ်ကစီၣ်အသိးန့ၣ်လီၤ
