ပယီၤသုးတဖၣ် တၢ်ဒုးတအိၣ်နာ်က့ ခးလီၤကျိဖးဒိၣ်တပယူဃီဆူ ကီးတရံးဝ့ၢ် ခန့မုၢ်ကဝီၤဒ့တကပၤ

လါစဲးပထ့ဘၢၣ် ၃၀သီ၊၂၀၂၃နံၣ်

ကညီကီၢ်စဲၣ် ကီးတရံးဝ့ၢ် ခန့မုၢ်သဝီတကပၤ တၢ်ဒုးတအိၣ်နာ်က့ ခးလီၤကျိဖးဒိၣ်န့ၣ် ကီးတရံးလီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ

ကီးတရံးဝ့ၢ်ပူၤ ပယီၤသုး ခလရ၉၇ဒီး လဲၣ်ဝးကျိဖးဒိၣ်လုၣ်ခးလီၤကျိဖးဒိၣ်ဆူ ကီးတရံးဝ့ၢ် ကမဲၣ်ကိသဝီ၊ချီတီၣ်သဝီ ဒီးကီးနွဲၣ်သဝီတကပၤ န့ၣ်လီၤ

ဖဲအပူၤကွံာ်လါစဲးပထ့ဘၢၣ် ၂၉သီအနံၤခါနာ်က့ စးထိၣ်ဖဲမုၢ်နၤ ၈နၣ်ရံၣ်ဘျဲၣ်တုၤ ၁၂နၣ်ရံၣ်ကီးတရံး ခလရ၉၇ သုးခးလီၤကျိဖးဒိၣ်အဖျၢၣ် ၅၀ဘျဲၣ်ဆူ ခန့မုၢ် ကဝီၤဒ့တကပၤအဃိ ပှၤကညီဘၣ်ဒိတအိၣ်နာ်က့ ကျိဖးဒိၣ်လီၤတဲၤပိၢ်ဖးထီၣ်ဖဲ လီၢ်ကဝီၤဖိအကျီးသ့ၣ်တဖၣ်အကပၤန့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

“စးထီၣ်ခးဝဲဖဲ ၈နၣ်ရံၣ်ဘျဲၣ်ဆၢကတီၢ်လီၤ ခးဝဲတပယူာ်ဃီလီၤ ခးဝဲတဖျၢၣ် အိၣ်ဘှံး၅မံးနံး ခးလီၤကဒီးလၢခံတဖျၢၣ်လီၤ တဘျီတခီၣ်ခးလီၤဝဲခံဖျၢၣ်တဘျီဃီ ဖဲမနၣ်န့ၣ်၁၂နၣ်ရံၣ်ဘျဲၣ်မးဂၢၤလီၤ”န့ၣ်အဝဲစံးဝဲလီၤ

ခီဖျိတၢ်ဒုးတအိၣ်နာ်က့ ခးလီၤကျိဖးဒိၣ်အဃိ လီၢ်ကဝီၤဖိတဖၣ်ဘၣ်ယိၤလၢကျိဖးဒိၣ်ကလီၤတဲၤပိၢ်ဖးထီၣ်လၢဟံၣ်ဖီခိၣ်ဒီး လီၢ်ကဝီၤဖီတနီဘၣ်လဲၤအိၣ်ဆိးဝဲလၢတၢ်လီၢ်အဂုၤအဂၤန့ၣ်ကီးတရံးဝ့ၢ်လီၢ်ကဝီၤဖိစံးဝဲလီၤ

“အခဲလၢခန့မုၢ်န့ၣ်တၢ်ဒုးတကဲထီၣ်ဖးယံၤလံ မုၢ်နၤခီန့ၣ်ခးလီၤကျိဖးဒိၣ်အိၣ်၅သီ လံ ဖဲမနၤန့ၣ်ခးလီၤခန့မုၢ်လီၤ အခဲတနီလဲၤအိၣ်ဝဲဆူနိၣ်တကီဝ့ၢ်ပူၤလီၤ တနီလဲၤအိၣ်ဝဲဆူဖၣ်အၣ်ဘူးတံၤတဖၣ်ဟံၣ်န့ၣ်လီၤ ပှၤလၢအိၣ်ဆိးလၢဖၣ်အၣ်အါလီၤ”န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

ကီးတရံးဝ့ၢ်ဒီးအဃၢၢ် ပယီၤသုးဒီးလီၢ်ကဝီၤတၢ်ပၢၢ်ဆၢသုးပာ်ဖှိၣ်အဘၢၣ်စၢၤခံခီခံကပၤသုးအတၢ်ဖ့ၣ်ဆၢအိၣ်ဒီးလီၢ်ကဝီၤတၢ်ပၢၢ်ဆၢသုးပာ်ဖှိၣ်သုးကျိၤတဖၣ် အိၣ်ကတဲၤကတီၤသးပာ်လံန့ၣ်သ့ၣ်ညါဘၣ်လၢ KNLAသုးပာ်ဖှိၣ်တဖၣ်အိၣ်န့ၣ်လီၤ

တကီၢ်ခါခဲအံၤ ကီးတရံးဝ့ၢ်အဃၢၢ် ပယီၤသုးခးလီၤကျိဖးဒိၣ်အသိး တီၣ်ကၠၣ်အ့သဝီပူၤပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်တပယူာ်ဃီန့ၣ်လီၤ

ကီးတရံးဝ့ၢ်ပူၤ လါအီကူးဒီးလါစဲးပထ့ဘၢၣ်ခံလါအတီၢ်ပူၤ ပယီၤသုးခးလီၤကျိဖးဒိၣ်အဃိ လီၢ်ကဝီၤဖိဘၣ်ဒိအဂၤ၂၀ဘျဲၣ်ဒီး ဟံၣ်ဟးဂီၤ၁၅ဖျၢၣ်ဃၣ်ဃၣ်န့ၣ် ဒူပျာ်ယာ်ကီၢ်ရ့ၣ်ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ