လါစဲးပထ့ဘၢၣ် ၂၉သီ၊၂၀၂၃နံၣ်
ကညီကီၢ်စဲၣ် ကီးတရံးဝ့ၢ်ကလံၤထံးတကပၤ တၢ်ဒုးစးထီၣ်ကဲထီၣ်ဝံၤ ပယီၤသုးမီၤစိရိၤခးလီၤကျိဖးဒိၣ်တပယူာ်ဃီန့ၣ်သ့ၣ်ညါဘၣ်လၢကီးတရံးဝ့ၢ်လီၢ်ကဝီၤဖိအိၣ်န့ၣ်လီၤ
လါစဲးပထ့ဘၢၣ် ၂၈သီ မုၢ်နၤခီအနၣ်ရံၣ်၁၀ မံးနံး၃၀ဆၢကတီၢ် ကီးတရံးဝ့ၢ် ကလံၤထံးတကပၤနၣ်ဟူဘၣ်ကျိသီၣ်ဝံၤအလီၢ်ခံ ပယီၤသုး လဲၣ်ဝးကျိဖးဒိၣ်လုၣ်ခးလီၤကျိဖးဒိၣ်န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ
“မုၢ်နၤခီနၣ်ရံၣ်၁၀ဘျဲၣ်ဖဲ၁၁နၣ်ရံၣ်ဃၣ်ဃၣ်န့ၣ် နၣ်ဟူကျိသီၣ်လီၤ ကျိဖးဒိၣ်ကလုာ်တသီၣ်ဒံးဘၣ် လၢခံ ၅မံးနံးမးခးလီၤကျိဖးဒိၣ်လီၤ ခးလီၤဝဲဆူဝ့ၢ်ချၢကီးတရံးကလံၤထံးတကပၤလီၤ ပှၤကညီဘၣ်ဒိတအိၣ်ဘၣ် လၢဝ့ၢ်ပူၤနာ်က့တဘၣ်နီတမံၤဘၣ်”န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ
ကီးတရံးဝ့ၢ်အဃၢၢ် သဝီတဖၣ်အပူၤ ပယီၤသုးကီၣ်ကးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်တပယူာ်ဃီဒီး တၢ်ဒုးကဲထီၣ်ဝံၤအလီၢ်ခံ ပယီၤသုး ခလရ၉၇ဒီး လဲၣ်ဝးကျိဖးဒိၣ်လုၣ်ခးလီၤကျိဖးဒိၣ်န့ၣ်လီၤ
တကီၢ်ခါခဲအံၤနာ်က့ ပယီၤသုးကီၣ်ကးတဖၣ် မၤအါထီၣ်သုးဂံၢ်ဘါလၢ ကီးတရံးဝ့ၢ်ပူၤတပယူာ်ဃီတကးဒံးဘၣ် ကီးတရံးဝ့ၢ်ဒီးအဃၢၢ်KNUဆီလီၤလီၢ်တဖၣ် ခးလီၤဝဲဒီးကျိဖးဒိၣ်တကးဒံးဘၣ်နုာ်လီၤသုးကျိၤတပယူာ်ဃီန့ၣ်KNLAသုးဂံၢ်ခီၣ်ထံးတၢ်ကစီၣ်စံးဝဲန့ၣ်လီၤ
တကးဒံးဘၣ်ကီးတရံးဝ့ၢ်ဒီးအဃၢၢ် တၢ်အိၣ်သးအိၣ်လၢတၢ်ဒုးကကဲထီၣ်အဃိKNLAသုးပာ်ဖှိၣ်တဖၣ် အိၣ်ကတဲၤကတီၤသးန့ၣ် KNLAသုးဂံၢ်ခီၣ်ထံးစံးဝဲန့ၣ်လီၤ
“အခဲ တၢ်ထီၣ်ဒုးတၢ်အိၣ်သးန့ၣ် အဝဲသ့ၣ်တကပၤနာ်က့ ကတဲၤကတီၤဝဲလၢကဟဲထီၣ်အဂီၤလီၤ ပဝဲသုးဖိတဖၣ်နာ်က့ ပဘၣ်ကတဲၤကတီၤသးလၢတၢ်ဒုးအဂီၤလီၤ အခဲအဝဲသ့ၣ်ခးစိဝဲ ပယီၤသုးဒီးKNU ဟံန့ၣ်ဃးတၢ်ပတုၤတၢ်ခးအခါ KNUဆီလီၤလီၢ်တဖၣ်လီၤ”န့ၣ်အဝဲစံးဝဲလီၤ
ကီးတရံးဝ့ၢ်ပူၤနာ်က့ ပယီၤသုးဟံန့ၣ်ဃးဘံၣ်ဘၢအလၢအပှဲၤတကးဒံးဘၣ် ကီးတရံးဝ့ၢ်ပူၤဟးသမံသမိးတၢ်ဒီး သုးသိလ့ၣ်အဒိၣ်တခိၣ် သိလ့ၣ်ဟံၣ်ခံခိၣ်တပယူာ်ဃီန့ၣ် ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ
“အဝဲသ့ၣ်ဟးသမံသမိးတၢ်ကိးမုၢ်နၤလီၤ သိလ့ၣ်အနီၢ်ဂံၢ်န့ၣ် သုးသိလ့ၣ် တခိၣ် သိလ့ၣ်ဟံၣ်သၢခိၣ်လီၤ လၢအပူၤကွံာ်နာ်က့ခးဝဲပှၤဟးထီၣ်လၢမုၢ်နၤခီတဖၣ်န့ၣ်လီၤ အခဲတခးဝဲဘၣ် အိၣ်ဂၢၤလီၤ”န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ
ကညီကီၢ်စဲၣ် ကီးတရံးဝ့ၢ်ဒီး ကြုၤတုၢ်ဝ့ၢ်ပူၤ သဝီတဖၣ်တကပၤ ပယီၤသုး ခလရ၉၇သုး ၊လ့ၣ်ဝးကျိဖးဒိၣ်လုၣ်၊ခလရ၅၄၅၊ခလရ ၅၄၆တဖၣ်ခးလီၤကျိဖးဒိၣ်အဃိ လီၢ်ကဝီၤဟံၣ်ဟးဂီၤ ၁၅ဖျၢၣ်ဘျဲၣ်တကးဒံးဘၣ် ဖိသၣ်ဆံးတဖၣ်ဒီးကမျၢၢ်ဘၣ်ဒိအဂၤ ၂၀ဘျဲၣ်န့ၣ် ဒူပျာ်ယာ်ကီၢ်ရ့ၣ်ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ
