လါစဲးပထ့ဘၢၣ် ၂၈သီ၊၂၀၂၃နံၣ်
ကညီကီၢ်စဲၣ် ကီးတရံးဝ့ၢ်ပူၤ လဝက ရူဘၣ်တၢ်မၤဟးဂီၤဒွဲၣ်အူအီၤဒီးမ့ၣ်အူန့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ
ဖဲအပူၤကွံာ် လါစဲးပထ့ဘၢၣ် ၂၇သီ မုၢ်နၤခီ ၁၁နၣ်ရံၣ် မံးနံး၅၀ဆၢကတီၢ်ကီးတရံးဝ့ၢ် နီၢ်ဂံၢ်၇ကဝီၤဒ့ ၊ဘီဒံးကၠိကျဲ လဝက ရူ ဘၣ်တၢ်ဒွဲၣ်အူမၤဟးဂီၤအီၤခီဖျိ KKO(ခွဲထွက်)ဒီး PDF သုးတဖၣ်န့ၣ် ဘၣ်တၢ်ပာ်ဖျါထီၣ်လၢ ပယီၤသုးကီၣ်ကး telegram channel တဖၣ်န့ၣ်သ့ၣ်ညါဘၣ်န့ၣ်လီၤ
ခီဖျိဘၣ်တၢ်ဒွဲၣ်အူအီၣ်ဒ်အံၤအဃိ ကီၢ်ဆၣ် လဝက ရူဒီး တၢ်ပာ်ဖှိၣ်ကမျၢၢ်ဂံၢ်ဘါဝဲၤဒၢးတဖၣ်မ့ၣ်အူအီၣ်ဟးဂီၤန့ၣ် ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ
“ဖဲမနၣ်န့ၣ်တနၣ်ဟူဘၣ်တၢ်နီတမံၤဘၣ် လၢ၁၁နၣ်ရံၣ်ဘျဲၣ်န့ၣ် ဘၣ်တၢ်ဒွဲၣ်အူအီၣ်လီၤ မ့ၣ်အူဒိၣ်လီၤ ပှၤမၤသံမ့ၣ်အူသိလ့ၣ်တဖၣ်ဟဲတဘူၣ်ဘၣ် လဝက ရူမ့ၣ်အူအီၣ်ခဲလၢာ်ဃၣ်ဃၣ်လီၤ ပှၤဒွဲၣ်အူတၢ်တဖၣ်ဒွဲၣ်အူဝဲဝံၤဟးထီၣ်လီၤ”န့ၣ်ကီးတရံးဝ့ၢ်လီၢ်ကဝီၤဖိစံးဝဲလီၤ
ဘၣ်ဃးဒီး လဝက ဝဲၤဒၢးဘၣ်တၢ်ဒွဲၣ်အူအီၣ်တဘျီအံၤအဖီခိၣ် ပဝဲ People’s Radio Myanmar တၢ်ကစီၣ်သန့ဆဲးကျီးသံကွာ်ဆူ လီၢ်ကဝီၤကရူၢ်ကရၢတဖၣ်အိၣ်နာ်က့ ပှၤတဲဆၢက့ၤတအိၣ်ဒံးဘၣ်န့ၣ်လီၤ
ခီဖျိ လဝက ဝဲၤဒၢးဘၣ်တၢ်ဒွဲၣ်အူအီၣ်အဃိ တနံၤအံၤလါစဲးပထ့ဘၢၣ် ၂၈သီဂီၤခီ ပယီၤသုးကီၣ်ကး ခလရ ၉၇သုးရ့ၣ် ခးလီၤကျိဖးဒိၣ်ဆူ အ့ရှါကျဲဒီး ကမ့ၣ်ကိတကပၤန့ၣ်လီၢ်ကဝီၤဖိတဂၤစံးဝဲန့ၣ်လီၤ
“ခးလီၤတၢ်အဃိပဘၣ်ပံးဃးကျးတဖၣ်လီၤ ၉၇ခးလီၤတၢ်လီၤခးဝဲအိၣ်ခံသီလံ အဝဲသ့ၣ်ခးဝဲန့ၣ်လီၤတဲၤဖဲကျးသ့ၣ်တဖၣ်အကပၤအဃိ ဘၣ်ပံးဃးဝဲလီၤ”န့ၣ်ကမဲၣ်ကိလီၢ်ကဝီၤဖိစံးဝဲန့ၣ်လီၤ
ကညီကီၢ်စဲၣ်ပူၤ ကီးတရံး၊ကြုၤတုၢ်၊နိၣ်တကီ၊မၠၣ်ဝတံၣ်၊ဃိၣ်သၢဖျၢၣ်ဒီးဖၣ်ပူၣ်ဝ့ၢ်သ့ၣ်တဖၣ်အပူၤ ပယီၤသုးစုတိီၤဖီလာ် ဝဲၤကျိၤဝဲၤကျိၤဝဲၤဒၢးတဖၣ် ဒီးပယီၤသုးဆီလီၤလီၢ်တဖၣ် လီၢ်ကဝီၤကမျၢၢ်ဒီသဒၢသုးတဖၣ် မၤပိၢ်ထီၣ်မ့ၣ်ပိၢ်ဒီးဒွဲၣ်အူမၤဟးဂီၤဝဲတပယူာ်ဃီန့ၣ်လီၤ
ဖဲအပူၤကွံာ် လါအီကူး ၁၁သီ မုၢ်နၤခီ၁၁နၣ်ရံၣ်မံးနံး၃၀ဃၣ်ဃၣ်ဆၢကတီၢ်ခါနာ်က့ ကညီကီၢ်စဲၣ် ဖၣ်ပူၣ်ဝ့ၢ်ပူၤ လဝက ဝဲၤဒၢးဘၣ်တၢ်မၤပိၢ်ထီၣ်မ့ၣ်ပိၢ်အဃိ မ့ၣ်အူအီၣ်ဟးဂီၤန့ၣ်လီၢ်ကဝီၤဂံၢ်ခီၣ်ထံးတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ
