ပယီၤသုးမီၤစိရိၤခးလီၤမ့ၣ်ပိၢ်ဒီးကဘီယူၤဆူ လ့းသိၣ်လီၢ်ကဝီၤ မ့းသလ့တီၣ်သဝီအဃိ ဟံၣ်အဖျၢၣ်၁၃၄ဖျၢၣ်ပူၤ လီၢ်ကဝီၤကမျၢၢ်တဖၣ်ဘၣ်ဃ့ၢ်ပူၤဖျဲးသး

လါစဲးပထ့ဘၢၣ် ၂၆သီ၊၂၀၂၃နံၣ်

ကညီကီၢ်စဲၣ် သၣ်တီၣ်ကီၢ်ဆၣ် လ့းသိၣ်လီၢ်ကဝီၤ မ့းသလ့တီၣ်သဝီပူၤ ပယီၤသုးတဖၣ်ဟဲခးလီၤတၢ်ဒီးကဘီယူၤအဃိ လီၢ်ကဝီၤဖိတဖၣ်ဘၣ်ဃ့ၢ်ထီၣ်န့ၣ်သ့ၣ်ညါဘၣ်လၢလီၢ်ကဝီၤဖိတဖၣ်အိၣ်န့ၣ်လီၤ

ဖဲအပူၤကွံာ်လါစဲးပထ့ဘၢၣ် ၂၅သီ ဂီၤခီဆၢကတီၢ် လ့းသိၣ်လီၢ်ကဝီၤ မ့းသလ့တီၣ်သဝီအဃၢၢ် ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်အဃိ ပယီၤသုးဟဲခးလီၤမ့ၣ်ပိၢ်ဒီးကဘီယူၤဒ်အံၤန့ၣ်လီၤ

ခီဖျိပယီၤသုးဟဲခးလီၤမ့ၣ်ပိၢ်ဒီးကဘီယူၤဒ်အံၤအဃိ မ့းသလ့တီၣ်အဖီခိၣ်သဝီ၊အဖီလာ်သဝီ ဟံၣ်ဒူၣ်၁၃၄ဖျၢၣ်ပူၤ လီၢ်ကဝီၤဖိ ၅၀၀ဘျဲၣ် ဘၣ်ဃ့ၢ်ထီၣ်အိၣ်ဝဲဆူ သဝီအဂုၤအဂၤတဖၣ်န့ၣ်လီၢ်ကဝီၤဖိစံးဝဲန့ၣ်လီၤ

“ဖဲမဟါဂီၤခီဆၢကတီၢ်လၢသဝီကပၤတၢ်ခးလိာ်သးကဲထီၣ်လီၤ ခးဝဲဝံၤကဘီယူၤဟဲထီၣ်လီၤ ကဘီယူၤဟဲနာ်က့တခးလီၤဝဲတဘျီဃီဘၣ် ယူၤဝ့ၤဝီၤဝဲတဘျးဒံး လၢခံအမံးနံး၁၀န့ၣ်ခးလီၤဝဲလီၤ အဃိ မ့းသလ့အဖီခိၣ်အဖီလာ်သဝီ ဟံၣ်ဒူၣ်၁၃၄ဖျၢၣ်ပူၤလီၢ်ကဝီၤဖိတဖၣ် ဘၣ်ဃ့ၢ်ပူၤဖျဲးသးလီၤ”န့ၣ် လီၢ်ကဝီၤဖိတဂၤစံးဝဲလီၤ

လၢသၣ်တီၣ်ဝ့ၢ်ပူၤ ပယီၤသုးမီၤစိရိၤခးလီၤမ့ၣ်ပိၢ်ဒီးကဘီယူၤတပယူာ်ဃီဒီး ဖဲအပူၤကွံာ်လါစဲးပထ့ဘၢၣ် ၂၄သီအနံၤခါနာ်က့ တၢ်ဒုးတကဲထီၣ်နာ်က့ လဲၤခးလီၤဝဲ မ့ၣ်ပိၢ်ဒီးကဘီယူၤဆူ ယၣ်ဒိၣ် ပယဲၤစီ သဝီပူၤအဃိ သးနံၣ် ၈၀ဘျဲၣ် ဖံသးပှၤတဂၤဒီး သးနံၣ်၃၀ဘျဲၣ်ပိၣ်မုၣ်တဂၤဘၣ်ဒိန့ၣ်လီၤ

“လၢတၢ်တနံၤန့ၣ်တၢ်ဒုးတအိၣ်ဘၣ်၂၄သီဂီၤခီ ၁၁နၣ်ရံၣ်ဆၢကတီၢ် တ့ၤလီၤမ့ၣ်ပိၢ်ဆူ ယၣ်ဒိၣ် ပယဲၤစီသဝီပူၤလီၤ ဖဲန့ၣ်ဘၣ်ဝဲသးနံၣ် ၃၀ဘျဲၣ်ပိၣ်မုၣ်တဂၤလီၤတၢ်ဘၣ်ယိာ်တအိၣ်ဘၣ် သးနံၣ်၈၀ဘျဲၣ်အဖံန့ၣ်ဘၣ်ၢ်ိလၢအကီာ်ဘိအဃိတၢ်ဘၣ်ယိာ်အိၣ်လီၤ”န့ၣ်ပှၤမၤစၢၤကမျၢၢ်ဃ့ၢ်တၢ်ဒုးတဂၤစံးဝဲန့ၣ်လီၤ

တကးဒံးဘၣ်စးထီၣ်ဖဲလါစဲးပထ့ဘၢၣ်နုာ်လီၤန့ၣ် သၣ်တီၣ်ကီၢ်ဆၣ် ထိဘိၣ်ကၠံပယီၤသုးကလၢၤပူၤ သုးသိလ့ၣ်၄ခိၣ် ဟဲနုာ်လီၤ သုးကျိၤဆူလ့းသိၣ်လီၢ်ကဝီၤဒီးသၣ်တီၣ်ဝ့ၢ် ကလံၤထံးတကပၤတပယူာ်ဃီန့ၣ်သ့ၣ်ညါဘၣ်န့ၣ်လီၤ

ပယီၤသုးတဖၣ် နုာ်လီၤသုးကျိၤဆူ သၣ်တီၣ်ကီၢ်ဆၣ် သဝီတဖၣ်အပူၤဒီး ဒွဲၣ်အူမၤဟးဂီၤတၢ်တကးဒံးဘၣ် ဟဲခးလီၤမ့ၣ်ပိၢ်ဒီးကဘီယူၤဒီး သၣ်တီၣ်ဝ့ၢ် ၇မံးလာ်တြဲၤ၊၄မံးလာ်တြဲၤ၊ဘယ့းနီၣ်သုးကလၢၤတဖၣ်ခးလီၤကျိဖးဒိၣ်အဃိ လီၢ်ကဝီၤဖိသံ၅ဂၤဃၣ်ဃၣ်ဒီးဟံၣ်ဘၣ်ဒိဟးဂီၤအဖျၢၣ် ၁၀ဘျဲၣ်န့ၣ် Thandaung Mupoe ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ