KNU ဟံန့ၣ်ဟီၣ်ကဝီၤစိကမီၤလၢဃိၣ်သၢဖျၢၣ်ဝ့ၢ်ဝံၤအလီၢ်ခံ ပယီၤသုးတကပၤမၤဃံးထီၣ်တၢ်သမံသမိး

လါစဲးပထ့ဘၢၣ်၂၅သီ၂၀၂၃နံၣ်

ကညီကီၢ်စဲၣ်ပူၤ တၢ်ကစီၣ်ဟးထီၣ်လၢဃိၣ်သၢဖျၢၣ်ဝ့ၢ် KNUဟံန့ၣ်ဟီၣ်ကဝီၤစိကမီၤန့ၣ်ဝံၤအလီၢ်ခံ ပယီၤသုးတဖၣ်မၤဃံးထီၣ်တၢ်သမံသမိးလၢ ဃိၣ်သၢဖျၢၣ်ဝ့ၢ်ပူၤန့ၣ်သ့ၣ်ညါဘၣ်လၢလီၢ်ကဝီၤဖိတဖၣ်အိၣ်န့ၣ်လီၤ

စးထီၣ်ဖဲအပူၤကွံာ်လါစဲးပထ့ဘၢၣ် ၂၁သီန့ၣ် တၢ်ကစီၣ်ဟးထီၣ်လၢKNU ဟံန့ၣ်ပၢပြးဝဲဃိၣ်သၢဖျၢၣ်ဝ့ၢ်န့ၣ်လီၤ

တၢ်ကစီၣ်ဟးထီၣ်ဒ်အံၤဝံၤအလီၢ်ခံ ပယီၤသုးတဖၣ်ပာ်လီၤတြဲၤဒီးသမံသမိးတၢ်ဖဲ ဃိၣ်သၢဖျၢၣ်ဝ့ၢ်နုာ်လီၤဟးထီၣ်အလီၢ်တဖၣ်န့ၣ်သ့ၣ်ညါဘၣ်လၢလီၢ်ကဝီၤဖိအိၣ်န့ၣ်လီၤ

“လၢညါတၢ်ဒ်အံၤတအိၣ်ဘၣ် ပာ်လီၤတြဲၤ သမံသမိးပှၤဟးထီၣ်က့ၤလီၤတအိၣ်ဘၣ် ဖဲတသီခံသီအတီၢ်ပူၤအံၤသမံသမိးတၢ်လီၤ သိလ့ၣ်၊သိလ့ၣ်ယီၢ်သမံသမိးဝဲခဲလၢာ်လီၤ တၢ်ဘိၣ်တဖၣ်နာ်က့သမံသမိးဝဲလီၤ”န့ၣ်လီၢ်ကဝီၤဖိတဂၤစံးဝဲလီၤ

တကးဒံးဘၣ် ပယီၤသုးတဖၣ်ဟးသမံသမိးတၢ်ဒီးသိလ့ၣ်ခံခိၣ်လၢဖဲမုၣ်ထူၣ်ဆၢကတီၢ်လၢဝ့ၢ်ပူၤန့ၣ်ဃိၣ်သၢဖျၢၣ်လီၢ်ကဝီၤဖိစံးဝဲလီၤ

“အခဲမးလီၤတၢ်ကစီၣ်ဟးထီၣ်ဝံၤမး ပယီၤသုးဟးသမံသမိးတၢ်အိၣ်တသီဒံးလီၤ ဟးဝ့ၤဝီၤန့ၣ်သိလ့ၣ်ခံခိၣ် တဟးဝဲဒီးအခီၣ်ဘၣ်လၢမုၣ်ဆါခီန့ၣ်ဟဲခံဘျီလီၤ”န့ၣ်ဃိၣ်သၢဖျၢၣ်ဝ့ၢ်လီၢ်ကဝီၤဖိစံးဝဲလီၤ

ဖဲအပူၤကွံာ် လါစဲးပထ့ဘၢၣ်၂၁သီအခါ တၢ်ကစီၣ်ဟးထီၣ်လၢ KNU/KNLAသုးပာ်ဖှိၣ်တဖၣ် ဟံန့ၣ်ဃးလီၢ်ကဝီၤစိကမီၤန့ၣ်လၢတၢ်ဒုးတကပၤလံအဃိ ပယီၤသုးဟးသမံသမိးတၢ်ဒီးခးလီၤကျိဖးဒိၣ်တပယူာ်ဃီန့ၣ်လီၤ

တကီၢ်ခါခဲအံၤ ဃိၣ်သၢဖျၢၣ်ဝ့ၢ်ပူၤ ပယီၤသုးကီၣ်ကးဒီးKNLAသုးပာ်ဖှိၣ်တဖၣ်အဘၢၣ်စၢၤ သုးအတၢ်ဖ့ၣ်ဆၢအိၣ်ထီၣ်ဒီးနၣ်ဟူဘၣ်ပှၤခးလီၤကျိဖးဒိၣ်န့ၣ်သ့ၣ်ညါဘၣ်န့ၣ်လီၤ
တကီၢ်ခံခဲအံၤ ကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊ကြုၤတုၢ်၊နိၣ်တကီဒီးဖၣ်ပူၣ်ဝ့ၢ်သ့ၣ်တဖၣ်အပူၤနာ်က့ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤခံခီခံကပၤ သုးအတၢ်ဖ့ၣ်ဆၢအိၣ်ထီၣ်ဒီး ပယီၤသုးတကပၤမၤဝဲတၢ်သမံသမိးကိးမုၢ်နံၤန့ၣ်လီၢ်ကဝီၤတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ