လါစဲးပထ့ဘၢၣ် ၂၂သီ၊၂၀၂၃နံၣ်
ကညီကီၢ်စဲၣ် သုးက့(၆) ကလံၤစိးသုးဟီၣ်ကဝီၤပူၤ ပယီၤသုးဖိတဂၤဟဲက့ၤဟ့ၣ်လီၤသးဃုာ်ဒီး စနဲးဖၢးတခိၣ်ဆူ သုးရ့ၣ် (၂၉၉၀၇) Cobra သုးကျိၤ အိၣ်န့ၣ် Cobra Column ထုးထီၣ်ရၤလီၤတၢ်ကစီၣ်န့ၣ်လီၤ
ပယီၤသုးကီၣ်ကး သုးက့ (၄၄)စုတီၤဖီလာ် ခမရ(၉)သုးဖိစီၤသဲးနဲၣ်ထိ ဟဲက့ၤပာ်လီၤစုကဝဲၤ ဃုာ်ဒီး ၃၃၈စနဲးဖၢးတခိၣ် ၃၈၈ ကျိချံ ၅၀ ဆူ Cobraသုးကျိၤအိၣ်ဖဲအပူၤကွံာ်လါစဲးပထ့ဘၢၣ် ၈သီအနံၤ န့ၣ်လၢလံာ်တၢ်ပာ်ဖျါအပူၤပာ်ဖျါထီၣ်ဝဲန့ၣ်လီၤ
တကီၢ်ခါခဲအံၤ ပှၤဟဲက့ၤဟ့ၣ်လီၤစုကဝဲၤအံၤ တလဲၤဆူတၢ်ပူၤဖျဲးအလီၢ် ကဒုးဆၢက့ၤပယီၤသုးမီၤစိရိၤဃုာ်ဒီးတၢ်ပၢၢ်ဆၢသုးပာ်ဖှိၣ်တဖၣ်န့ၣ်Cobra Columnပူၤပှၤတဲတၢ်ပၢတဂၤစံးဝဲန့ၣ်လီၤ
“စနဲးဖၢးကစၢ်တဂၤအံၤဟဲက့ၤပာ်လီၤစုကဝဲၤဃုာ်ဒီး၃၃၈န့ၣ်လီၤ အဝဲစံးဝဲအဲၣ်ဒိးမၤက့ၤမူဒါအဃိ ပကဟ့ၣ်က့ၤအီၤမူဒါ အဝဲနာ်က့အတၢ်နၤန့ၣ်လီၤသးအိၣ် အဝဲကပၢၢ်ဆၢက့ၤပယီၤသုးကီၣ်ကးအဃိပမၢက့ၤအီၤအိၣ်လီၤ”န့ၣ်အဝဲစံးဝဲလီၤ
ပှၤလၢဟဲက့ၤပာ်လီၤစုကဝဲၤအံၤ သုးခိၣ်ဒးဘီဟ့ၣ်မၤလၤကပီၤစ့ယိၤ ၁၀၀၀၀၀ ฿န့ၣ်ထုးထီၣ်ဃးတၢ်ကစီၣ်န့ၣ်လီၤ
ဖဲလါအီကူးဒီးလါစဲးပထ့ဘၢၣ် ခံလါအတီၢ်ပူၤ ပှၤဟဲက့ၤပာ်လီၤစုကဝဲၤဃုာ်ဒီးကျိဆူCobra သုးကျိၤအိၣ်သၢဂၤလံန့ၣ်လီၤ
တကးဒံးဘၣ် မၠၣ်ဝတံၣ်ဝ့ၢ်အဃၢၢ်လဲးခဲးတီၣ်ဖီခိၣ် KNLAသုးပာ်ဖှိၣ်တဖၣ် ဟံန့ၣ်ဃးတၢ်လီၢ်အိၣ်ခံလါဘျဲၣ်လံဒီးပယီၤသုးတကပၤဒ်သိးကထီၣ်ဟံန့ၣ်က့ၤလဲးခဲးတီၣ်သုးကလၢၤအဂီၤ မၤအါထီၣ်သုးဂံၢ်ဘါန့ၣ်KNLAသုးဂံၢ်ခီၣ်ထံးတဂၤစံးဝဲန့ၣ်လီၤ
“ဒူၣ်ဒါတကပၤကဟဲက့ၤမၤတၢ်ထီၣ်ဒုးအိၣ်လီၤ လၢကမၤန့ၣ်က့ၤလဲးခဲးတီၣ်အဂီၤ လၢကၠသ့းနဲးဒီးCobra သုးပာ်ဖှိၣ်တၣ်အိၣ်လီၢ်ကဝီၤတဖၣ်အပူၤဒ်သိးကဟံန့ၣ်ဟီၣ်ကဝီၤတၢ်ဒိၣ်စိအဂီၤလီၤ အခဲအံၤလၢလဲးခဲးတီၣ်ဖီခိၣ် တၢ်အိၣ်သးဂၢၤလီၤ”န့ၣ်အဝဲစံးဝဲလီၤ
KNLAသုးပာ်ဖှိၣ်တဖၣ်ထီၣ်မၤန့ၣ်ဃးလဲးခဲးတီၣ်အံၤအိၣ်ခံလါဘျဲၣ်လံဒီးပယီၤသုးတကပၤဟဲခးလီၤတၢ်ဒီးကဘီယူၤ ၊ခးလီၤကျိဖးဒိၣ်တပယူာ်ဃီအဃိ လဲးခဲးတီၣ်ဖီခိၣ်တၢ်ဘါတၢ်သူၣ်ထီၣ်တဖၣ်ဟးဂီၤအိၣ်အါမးန့ၣ် Cobra Columnထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ
