လါစဲးပထ့ဘၢၣ် ၂၂သီ၊၂၀၂၃နံၣ်
တလၢၤကီၢ်စဲၣ် ကၠဲးထိၣ်ကီၢ်ဆၣ် အလူလ့သဝီပူၤ ပယီၤသုးလၢဟံန့ၣ်ခူသူၣ်တၢ်လီၢ်တဖၣ် ဘၣ်တၢ်ခးလီၤမ့ၣ်ပိၢ်ဒီးဒြိ၃ဝီခီဖျိ လီၢ်ကဝီၤကမျၢၢ်ဒီသဒၢသုးတဖၣ်န့ၣ် Kyaikto Revolution Force ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ
ဖဲလါစဲးပထ့ဘၢၣ် ၂၁သီအနံၤ အလူလ့သဝီပူၤ ပယီၤသုးလၢဟံန့ၣ်ဃးတၢ်လီၢ်ဖဲ တၣ်ယၣ်ကျးလီၢ်ခံ ၊ခၠ့ၣ်သ့းနကီၤကျဲဖးဒ့ဒီး MKသိးကျးအမဲာ်ညါ တဖၣ်အ့ၤဖဲဂီၤခီ အနၣ်ရံၣ်၁၀ဘျဲၣ်ဆၢကတီၢ်
ဒြိမ့ၣ်ပိၢ်ခံဖျၢၣ်၊၁၀နၣ်ရံၣ်၄၅မံးနံးဆၢကတီၢ် ဒြိမ့ၣ်ပိၢ်ခံဖျၢၣ်၊၁၁နၣ်ရံၣ် ၂၅မံးနံးဆၢကတီၢ် ဒြိမ့ၣ်ပိၢ်ခံဖျၢၣ် ခဲလၢၤပာ်ဖှိၣ်ခးလီၤဝဲဒြိမ့ၣ်ပိၢ်၆ဖျၢၣ်န့ၣ် Kyaikto Revolution Force ပှၤဘၣ်မူဘၣ်ဒါတဂၤစံးဝဲလီၤ
“ဖဲတၢ်လီၢ်ဝဲန့ၣ်ဘၣ်တဘျီဘျီအဝဲသ့ၣ်အိၣ်လီၤ အါတက့ၤအဝဲသ့ၣ်တၢ်လဲၤတၢ်က့ၤမ့အိၣ်န့ၣ်ဟံန့ၣ်တၢ်လီၢ်ဖဲန့ၣ် အဝဲသ့ၣ်ကအိၣ်လၢအဂၤ၃၀ဃၣ်ဃၣ်လီၤ ခဲလၢၤပာ်ဖှိၣ်န့ၣ် တၢ်လီၢ်သၢလီၢ် တလီၢ်ဒီးတလီၢ်န့ၣ်တယံၤဘၣ် အဝဲသ့ၣ်ကဟးထီၣ်က့ၤလီၤအဂီၤတၢ်ဘၣ်ယိၤအိၣ်ပသ့ၣ်ညါအဝဲသ့ၣ်အိၣ်အဃိ ပလဲၤခးလီၤဒၢးအဝဲသ့ၣ်အတၢ်ရဲၤတၢ်ကျဲၤဟးဂီၤလီၤ”န့ၣ်အဝဲစံးဝဲလီၤ
ပယီၤသုးဖိဟံန့ၣ်ခူသူၣ်တၢ်လီၢ်တဖၣ်ဘၣ်တၢ်လဲၤခးအီၤဒီးဒြိခီဖျိလီၢ်ကဝီၤကမျၢၢ်ဒီသဒၢသုးဒ်အံၤဝံၤအလီၢ်ခံ ပယီၤသုးတကပၤ ခးကဒါက့ၤဝဲဒီး ၆၀မမတကးဒံးဘၣ်ကျိဖိတဖၣ်ဒီးပယီၤသုးတကပၤတၢ်ဘၣ်ဒိဘၣ်ထံးတၢ်အိၣ်သးန့ၣ်တသ့ၣ်ညါလီၤတံၤဒံးဘၣ်န့ၣ်အဝဲစံးအါထီၣ်ဝဲန့ၣ်လီၤ
“ပလဲၤခးအဝဲသ့ၣ်ဝံၤအဝဲသ့ၣ်ခးကဒါက့ၤပှၤ ခးဝဲဒီးကျိဖးဒိၣ်ကျိဖိလီၤ ကျိဖးဒိၣ်န့ၣ်၆၀မမလီၤ Drone mission အဃိ အဝဲသ့ၣ်တသ့ၣ်ညါတၢ်လီၢ်ဘၣ် ဘၣ်ခးစိဝဲဒ်န့ၣ်လီၤ ဘၣ်ဒိဘၣ်ထံးန့ၣ်တသ့ၣ်ညါဘၣ်ဒံးဘၣ် ပဃုသ့ၣ်ညါအဖၢမုၤလီၤ မ့ၢ်တဘၣ်န့ၣ်တမ့ၢ်အဝဲသ့ၣ်ကခးကဒါက့ၤဝဲဘၣ် “န့ၣ်အဝဲစံးဝဲလီၤ
ပယီၤသုးဟံန့ၣ်ခူသူၣ်တၢ်လီၢ်တဖၣ်ဘၣ်တၢ်ခးအီၤခီဖျိ Kyaikto Revolution Force၊KNU/KNLA၊TPDF၊သူၣ်ရံးယးသုးကျိၤ ဒီး PPDF -KD ပာ်ဖှိၣ်သုးကျီၤတဖၣ်န့ၣ်လီၤ
ဖဲအပူၤကွံာ်လါစဲးပထ့ဘၢၣ် ၄သီအနံၤခါနာ်က့ အလူလ့သဝီ ဝ့ၢ်တကူၣ်-မီၣ်လမၠ့ၣ် သိလ့ၣ်ကျဲဖိခိၣ် ပယီၤသုးတဖၣ်ဒီး KNU သုးက့ ၁သုးကျိၤတဖၣ်ခံခီခံကပၤထံၣ်လိာ်သးတၢ်ဒုးကဲထီၣ်အဃိ တၢ်ပၢၢ်ဆၢသုးပာ်ဖှိၣ်တကပၤသုးဖိသံ၃ဂၤန့ၣ် KNLAသုးဂံၢ်ခီၣ်ထံးတဂၤစံးဝဲလီၤ
ဖဲအပူၤကွံာ် လါယူၤ၊လါယူၤလံ ဒီးလါအီကူးတဖၣ်ခါနာ်က့ မီၣ်လမၠ့ၣ်-ယ့-ဒဝဲၢ် နီၢ်ဂံၢ်၈ကျဲမုၢ်ဖးဒိၣ်၊ပကိကီၢ်စဲၣ်ချၢၣ်လွံၣ်ထူၣ်ကီၢ်ဆၣ် အပူၤကျဲတနီ ကၠ့းထိၣ်ကီၢ်ဆၣ်ပူၤကျဲတနီဖီခိၣ် မၤဝဲဟီၣ်ကဝီၤတၢ်ဒိၣ်စိဒီးသမံသမိးတၢ်ဒီးဖဲသမံသမိးတၢ်ဆၢကတီၢ် ခံခီခံကပၤထံၣ်လိာ်သးတၢ်ဒုးကဲထီၣ်အိၣ်န့ၣ် KNLAသုးဂံၢ်ခီၣ်ထံးစံးဝဲအသိးသ့ၣ်ညါဘၣ်န့ၣ်လီၤ
