တၢ်ကစီၣ်ဟးထီၣ်လၢကီးတရံးဝ့ၢ်ပူၤတၢ်ဒုးကကဲထီၣ်အဃိ လီၢ်ကဝီၤကမျၢၢ်တနီ သုးလီၢ်ကျဲလၢတၢ်လီၢ်အဂၤ

လါစဲးပထ့ဘၢၣ် ၂၀သီ၊၂၀၂၃နံၣ်

ကညီကီၢ်စဲၣ် ကီးတရံးကီၢ်ဆၣ်ပူၤစးထီၣ်ဖဲအပူၤကွံာ် လါစဲးပထ့ဘၢၣ် ၁၅သီအလီၢ်ခံ တၢ်ကစီၣ်ဟးထိၣ်လၢတၢ်ဒုးကကဲထီၣ်အဃိ ကီးတရံးလီၢ်ကဝီၤကမျၢၢ်တနီသုးဃီၣ်အလီၢ်အကျဲန့ၣ် ကီးတရံးဝ့ၢ်လီၢ်ကဝီၤဖိတဖၣ်စံးဝဲန့ၣ်လီၤ

ကီးတရံးဝ့ၢ်ပူၤ ပယီၤသုးဒီး KNLAသုးပၣ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်တပယူာ်ဃီဒီးဆၢကတီၢ်ခဲအံၤနာ်က့ ခံခီခံကပၤဒုးယၤအတၢ်ဖ့ၣ်ဆၢအိၣ်ထီၣ်န့ၣ်လီၤ

ဖဲအပူၤကွံာ်လါစဲးပထ့ဘၢၣ်၁၁သီအခဲ ကီးတရံးကီၢ်ဆၣ် တီၣ်ကၠၣ်အ့-လဲၣ်ကွဲၤကျဲဖီခိၣ် ပယီၤသုးကလၢၤဘၣ်တၢ်ခးအီၤဝံၤအလီၢ်ခံ ပယီၤသုးကီကး ၉၇သုးတဖၣ်ခးလီၤကျိဖးဒိၣ်တကးဒံးဘၣ် ကီးတရံးဝ့ၢ်ပူၤနၣ်က့ ကမျၢၢ်တဖၣ်သုးဃီၢ်လီၢ်ကျဲအိၣ်န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

“လၢအသီအံၤတဖၣ်အပူၤ ပှၤကညီလီၤဆှၤ လၢဖၠါပူၤနာ်က့ပှၤတအိၣ်ဘၣ် လၢဝ့ၢ်ပူၤနာ်က့ဒ်န့ၣ်လီၤ နာ်ဟူဘၣ်လၢဝ့ၢ်ပူၤတၢ်အိၣ်သးတဂ့ၤဘၣ် ထီၣ်တၢ်ဆါဟံၣ်တဘူၣ် အဝဲသ့ၣ်ဆီလီၤလီၢ်န့ၣ်အိၣ်ဘူးဒီးတၢ်ဆါဟံၣ်အဃိ သုးသိလ့ၣ်ဟးရှၣ်တၢ်ကိးဟါဒဲးလီၤ ဖဲမနၣ်နာ်က့ခးလီၤကျိဖးဒိၣ်လီၤ”န့ၣ်အဝဲစံးဝဲလီၤ

တကီၢ်ခါခဲအံၤ ပယီၤသုးကီကးသုးကလၢၤတဖၣ်ဆီလီလီၢ်တဖၣ်ဘၣ်တၢ်ခးအီၤတပယူာ်ဃီဒီး ဖဲအပူၤကွံာ်လါစဲးပထ့ဘၢၣ် ၁၆သီအနံၤခါနာ်က့ ကမဲၣ်ကိသဝီ၊ထံကမါကပၤပယီၤသုးဖိတဖၣ်ဘၣ်တၢ်ခးအီၤဒီးပယီၤသုးသံ၃ဂၤ ဘၣ်ဒိအဂၤ၁၀န့ၣ်KNLAသုးဂံၢ်ခီၣ်ထံးတဂၤစံးဝဲလီၤ

“အခဲတၢ်အိၣ်သးန့ၣ်ပဝဲတၢ်ပၢၢ်ဆၢသုးဖိတဖၣ်ပဟံန့ၣ်ဃးတၢ်လီၢ်ဒီးအိၣ်ကတဲၤကတၤသးလၢမူဒါလီၤဘၣ်အလီၢ်လီၤ ဖဲအပူၤကွံာ်၁၆သီအခါ ပလဲၤခးပယီၤသုးဖိလၢအိၣ်ဖဲကမါကပၤတဖၣ်အဃိသုးဖိသံသၢဂၤဘၣ်ဒိအဂၤတဆံဃၣ်ဃၣ်လီၤ”န့ၣ်အဝဲစံးဝဲလီၤ

ခီဖျိပယီၤသုးကီကးတဖၣ်ဆီလီၤလီၢ်ဘၣ်တၢ်ခးအီၤတပယူာ်ဃီအဃိ ကီးတရံးဒီးကြုၤတုၢ်ဝ့ၢ်တဖၣ်အပူၤ ခမရ၉၇၊ခမရ ၅၄၆၊ခမရ၂၃၀၊ခမရ၂၀၈သုးရ့ၣ်တဖၣ် ခးလီၤကျိဖးဒိၣ်ဆူတီၣ်ကၠၣ်အ့၊ကမဲၣ်ကိ၊ချီတီၣ်၊ကီးနွဲၣ်သဝီဒီးတီနီၣ်ထံလီၤဆှုတကပၤန့ၣ်လီၤ

ဖဲအပူၤကွံာ်လါစဲးပထ့ဘၢၣ် ၁၆သီအနံၤခါနာ်က့ ပယီၤသုးစုတီၤဖီလာ် ခမရ၅၄၆ ခးလီၤကျိဖးဒိၣ်အဃိ နီၣ်တလၣ်သဝီပူၤ သးနံၣ်၁၅နံၣ် ဖိသၣ်တဂၤဘၣ်ဒိဒီးကျိဖးဒိၣ်အက့လၢအခိၣ်န့ၣ်လီၢ်ကဝီၤတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ