လါစဲးပထ့ဘၢၣ် ၁၉သီ၊၂၀၂၃နံၣ်
ကညီကီၢ်စဲၣ် သၣ်တီၣ်ကီၢ်ဆၣ် သၣ်တီၣ်ကျဲ၅မံးလာ် ယ့ၣ်စ့ကိသဝီကရူၢ်ပူၤ ပယီၤသုးဒွဲၣ်အူမၤဟးဂီၤအဃိ ဘုဖီ၃ဖျၢၣ်ဒီးကမျၢၢ်ဟံၣ်မ့ၣ်အူအီၣ်ဟးဂီၤအဖျၢၣ်၁၀ဃၣ်ဃၣ်န့ၣ်သၣ်တီၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
ဖဲအပူၤကွံာ်လါစဲးပထ့ဘၢၣ်၁၃သီအနံၤခါ ရှါပၠီချီသဝီပူၤ ပယီၤသုးဖိလၢဟဲက့ၤဆူဒူၣ်ဖိထၢဖိအိၣ်တဂၤ ဘၣ်တၢ်ဖှီၣ်အီၤခီဖျိကရူၢ်ကရၢလၢတသ့ၣ်ညါအမံၤတဖုဝံၤအလီၢ်ခံ တီအူဝ့ၢ်ပူၤပယီၤသုးတဖၣ်ဟဲဆီလီၤလီၢ်ဒီးဂံၢ်ဘါအါအါဂီၢ်ဂီၢ်လၢရှါပၠီချီသဝီပူၤန့ၣ်သၣ်တီၣ်ဝ့ၢ်လီၢ်ကဝီၤဖိစံးဝဲဒၣ်န့ၣ်လီၤ
“ဖဲလါစဲးပထ့ဘၣ် ၁၁သီ ပယီၤသုးဖိတဂၤဟဲက့ၤလၢရှါပၠီချီသဝီပူၤဒူၣ်ဖိထၢဖိအိၣ်ဒီး တဲဝဲကလဲၤလၢထိးအိၣ်တၢ်အလီၢ်ဝံၤ လဲၤသမံသမိးဝဲတၢ်ပၢၢ်ဆၢသုးတဖၣ်အိၣ်တၢ်အလီၢ်ဒီးဆှၢထီၣ်တၢ်ကစီၣ်လီၤဖဲ၁၃သီအခါပှၤဖှီၣ်ဃးအီၤဒီးလီၤမၢ်ဝံၤအလီၢ်ခံပယီၤသုးနုာ်လီၤဆီလီၤလီၢ်ဒီးဂံၢ်ဘါအါအါဂီၢ်ဂီၢ်န့ၣ်”အဝဲစံးဝဲန့ၣ်လီၤ
ဟံန့ၣ်ဆီလီၤလီၢ်ဝံၤဖဲလါစဲးပထ့ဘၢၣ်၁၄သီဂီၤခီဆၢကတီၢ်ပယီၤသုးတဖၣ်ဒွဲၣ်အူမၤဟးဂီၤကွံာ်ဝဲ ယ့ၣ်စ့ကိသဝီကရူၢ် ကယါပၠီချီသဝီပူၤ ဟံၣ်၄ဖျၢၣ် ၊ဘုဖီ၃ဖျၢၣ်ဒီး ရှါပၠီချီသဝီအမဲာ်ညါ လီၢ်ကဝီၤကမျၢၢ်ဟံၣ် ၇ဖျၢၣ်န့ၣ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
ခိဖျိတၢ်ဒုးတအိၣ်နာ်က့ ဒွဲၣ်အူမၤဟးဂီၤသဝီပူၤဟံၣ်တဖၣ်အဃိ ယ့ၣ်စ့ကိသဝီ၊ကယါပၠီချီသဝီ၊ရှါပၠီချီ၊တၢ်လီၢ်ခံသဝီ၊တၢ်မဲာ်ညါသဝီပူၤ ပိၣ်မုၣ်တဖၣ်ဒီးသူၣ်က့သးပှၢ်တဖၣ်ဘၣ်ဃ့ၢ်စံၣ်အိၣ်ဝဲဆူတၢ်လီၢ်အဂၤန့ၣ်သ့ၣ်ညါဘၣ်လၢပှၤမၤစၢၤကမျၢၢ်ဃ့ၢ်တၢ်ဒုးတဖၣ်အိၣ်န့ၣ်လီၤ
“ယ့ၣ်စ့ကိ၊ကယါပၠီချီ၊ရှါပၠီချီ၊တၢ်မဲာ်ညါ တၢ်လီၢ်ခံသဝီ၅ဖျၢၣ်ပူၤပိၣ်မုၣ်တဖၣ်ဒီးသူၣ်က့သးပှၢ်တဖၣ်ဘၣ်ဃ့ၢ်တၢ်ဒုးလီၤ ပှၤဃ့ၢ်တၢ်ဒုးနီၢ်ဂံၢ်ကအိၣ်လၢ ၁၀၀ဘျဲၣ် ၂၀၀ဃၣ်ဃၣ်ညါ အခဲအဝဲသ့ၣ်အိၣ်ဆီလီၤသးအဃိက့ၤတန့ၣ်ဒံးဘၣ်”န့ၣ်ပှၤမၤစၢၤကမျၢၢ်ဃ့ၢ်တၢ်ဒုးတဖၣ်စံးဝဲန့ၣ်လီၤ
တကီၢ်ခါခဲအံၤ ပယီၤသုးတဖၣ်ဟံန့ၣ်ဃးတၢ်ဘံၣ်တၢ်ဘၢလၢ သၣ်တီၣ်ဝ့ၢ်ကျဲဒီဘိ ပာ်ပနီၢ်ဃးဝဲတၢ်ဟံန့ၣ်ဆှၢတၢ်အီၣ်အဃိ ကမျၢၢ်ဃ့ၢ်တၢ်ဒုးတဖၣ်အဂီၤတၢ်အီၣ်တလၢတပှဲၤန့ၣ်သ့ၣ်ညါဘၣ်န့ၣ်လီၤ
တကးဒံးဘၣ် သၣ်တီၣ်ဝ့ၢ်၊သၣ်မိတီၣ်သဝီ၊ယၣ်ဒိၣ်သဝီတကပၤပယီၤသုး၇မံးလာ်သုး ဘရ့းနီၣ်သုးတဖၣ်ခးလီၤကျိဖးဒိၣ် တ့ၤလီၤမ့ၣ်ပိၢ်ဒီးကဘီယူၤအဃိ လီၢ်ကဝီၤကမျၢၢ်ဟံၣ်ဘၣ်ဒိဟးဂီၤအဖျၢၣ်၁၀ဃၣ်ဃၣ်တကးဒံးဘၣ် လီၢ်ကဝီၤဖိ ၂၅၀၀ဘျဲၣ်ဘၣ်ဃ့ၢ်ပူၤဖျဲးသးအိၣ်၂လါဘျဲၣ်လံန့ၣ်လီၢ်ကဝီၤတၢ်ကစီၣ်ဂံၢ်ခီၣ်ထံးတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ
