ကီးတရံးဝ့ၢ်ပူၤ ပယီၤသုးလၢဟးသမံသမိးတၢ်လၢမုၢ်နၤခီတဖၣ် ခးဝဲလီၢ်ကဝီၤကမျၢၢ်တဖၣ်

လါစဲးပထ့ဘၢၣ် ၁၈သီ၊၂၀၂၃နံၣ်

ကညီကီၢ်စဲၣ် ကီးတရံးဝ့ၢ်ပူၤ ပယီၤသုးလၢဟးသမံသမိးတၢ်လၢမုၢ်နၤခီတဖၣ် ခးဝဲကမျၢၢ်လၢဟးထီၣ်မုၢ်နၤခီတဖၣ်အိၣ်န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

ကီးတရံးဝ့ၢ်ပူၤပယီၤသုးကီကးကရူၢ်ထုးထီၣ်ဃးမုၢ်နၤခီတဘၣ်ဟးထီၣ်တၢ်ကလုာ်ဒီး မုၢ်နၤခီဆၢကတီၢ်ဟးသမံသမိးတၢ်ဒီးသုးသိလ့ၣ်သၢခိၣ်န့ၣ် အိၣ်သၢလါဘျဲၣ်လံန့ၣ်လီၤ

လၢညါဟးသမံသမိးတၢ်ဆၢကတီၢ်မ့ထံၣ်ကမျၢၢ်တခးဝဲနာ်က့ စးထီၣ်ဖဲလါစဲးပထ့ဘၢၣ်န့ၣ် ခးဝဲကမျၢၢ်လၢဟးထီၣ်မုၢ်နၤခီတဖၣ်အိၣ်န့ၣ်ကီးတရံးဝ့ၢ်ဟီၣ်ကဝီၤဖိစံးဝဲန့ၣ်လီၤ

“လၢညါဟးနာ်က့ခးဝဲတအိၣ်ဘၣ် ဖဲအဝဲသ့ၣ်ဟးဆၢကတီၢ်မ့ထံၣ်ဝဲကိးသမံသမိးဝဲအိၣ်အခဲအ့ၤတဘီခးဝဲလံ”န့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

ဖဲအပူၤကွံာ် လါစဲးပထ့ဘၢၣ် ၁၅သီအနံၤခါနာ်က့ ပယီၤသုးလၢဟးသမံသမိးတၢ်တဖၣ်ခးဝဲကီးတရံးကမျၢၢ်ဟးထီၣ်ခံဂၤလၢမုၢ်နၤခီလၢကီးတရံးနီၢ်ဂံၢ်၇ကဝီၤဒ့ပူၤအဃိ သံတဂၤဘၣ်ဒိတဂၤန့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

“တၢ်တနၤန့ၣ်အိၣ်နၣ်ရံၣ်၁၀ဘျဲၣ်လံ အဝဲသ့ၣ်ခံဂၤအီသံးဒီးဟဲက့ၤ ဖဲန့ၣ်ထံၣ်လိာ်သးဒီးသိလ့ၣ်ဟးသမံသမိးတၢ်လီၤ ဖဲန့ၣ်သံတဂၤလၢအတဂၤနာ်က့ဘၣ်ဒိလီၤ အခဲတသ့ၣ်ညါဘၣ်တၢ်အိၣ်သးဒံးဘၣ်”န့ၣ်ပှၤအိၣ်ဖဲကီးတရံးဝ့ၢ်တဂၤစံးဝဲလီၤ

ဘၣ်ဃးဒီးပယီၤသုးခးတၢ်ဒ်အံၤန့ၣ်မ့ၢ်ဝဲပျံၤတၢ်အဃိဒီးတယံၤလၢၤဘၣ်ဆၢကတီၢ်န့ၣ်ပယီၤသုးကရှူတၢ်ပနီာ်လီၤန့ၣ် KNLAဂံၢ်ခီၣ်ထံးတဂၤစံးဝဲန့ၣ်လီၤ

“တၢ်ဝဲအခဲပာ်ဖျါထီၣ်အဝဲသ့ၣ်ပျံၤတၢ်လီၤ ပျံၤကမျၢၢ်တဖၣ်လီၤ ခီဖျိပျံၤကမျၢၢ်အဃိယထံၣ်လၢမၤဝဲဒ်အံၤန့ၣ်”အဝဲစံးဝဲလီၤ

တကီၢ်ခါခဲအံၤ လၢကီးတရံးဝ့ၢ်ပူၤပယီၤသုးမၤဃံးထီၣ်တၢ်သမံသမိးတကးဒံးဘၣ် ကီးတရံးဝ့ၢ်ဒီးအဃၢၢ်နာ်က့ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်တပယူာ်ဃီန့ၣ်လီၤ