လါစဲးပထ့ဘၢၣ် ၁၆သီ၊၂၀၂၃နံၣ်
ကညီကီၢ်စဲၣ် နိၣ်တကီကီၢ်ဆၣ် ကွံၢ်လၢၢ်သီသုးကလၢၤပူၤ ခးလီၤဝဲ မ့ၣ်ပိၢ်ဖးဒိၣ်၂၀၀ဘျဲၣ်ဒီး ဒြိဆူပယီၤသုးကျိၤမၤစၢၤလၢဟဲထီၣ်ဆှၢကျိချံပှၢ်သၣ်၊တၢ်အီၣ်တဖၣ် န့ၣ် Cloud wings droneထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ
ဖဲလါအီကူး ၂၄သီ န့ၣ်ခးလီၤဝဲပယီၤကွံၢ်လၢၢ်သီသုးကလၢၤပူၤပယီၤသုးဖိအဂၤ ၃၀ဒီးဖဲလါစဲးပထ့ဘၢၣ် ၆သီအနံၤနာ်က့ ဒ်သိးကွံၢ်လၢၢ်သီသုးကလၢၤတဆှူအဂီၤ ပယီၤသုးကျိၤသုးနီၢ်ဂံၢ်၁၀၀ဘျဲၣ်လၢဟဲထီၣ်မၤစၢၤကျိချံပှၢ်သၣ်ဒီးတၢ်အီၣ်တဖၣ်လၢယိၤကီၢ်တကပၤတဖၣ် တုၤလါစဲးပထ့ဘၢၣ် ၁၄သီခးလီၤဝဲမ့ၣ်ပိၢ်ဒီးဒြိအသီ၂၀ဘျဲၣ်အတီၢ်ပူၤ အဖျၢၣ်၂၀၀ဘျဲၣ်န့ၣ် Cloud wings drone ပှၤဘၣ်မူဘၣ်ဒါ ကိၣ်ည့စံးဝဲဒၣ်န့ၣ်လီၤ
“ခးလိာ်သးလၢဟီၣ်ကဝီၤပူၤန့ၣ်တဘျီတခီၣ်လီၤ ဖဲတၢ်ထီၣ်ဒုးတဘျီအံၤပမၤအါဒၣ် drone mission လီၤ အဃိ ဒြိမ့ၣ်ပိၢ်အသၣ်လၢၤ၂၀၀ဘျဲၣ်လီၤ ပခးလီၤလၢအဝဲသ့ၣ်အိၣ်တၢ်အလီၢ်တပယူာ်ဃီလီၤ အဝဲသ့ၣ်ခီထံအလီၢ် ပခးလီၤဒြိအအါကတၢၢ်လီၤdron mission န့ၣ်အရ့ဒိၣ်ကတၢၢ်လီၤ”န့ၣ်အဝဲစံးဝဲလီၤ
ပယီၤသုးကွံၢ်လၢၢ်သီသုးကလၢၤဘၣ်တၢ်ဒုးအီၤအဃိ ပယီၤသုးတကပၤသံအဂၤ၁၀ဃၣ်ဃၣ်ဒီးဘၣ်ဒိအါအါဂီၢ်ဂီၢ်ဝံၤတုၤခဲအံၤထီၣ်ဟံန့ၣ်ဝဲကွံာ်လၢၢ်သီသုးကလၢၤတန့ၣ်ဒံးဘၣ်န့ၣ်အဝဲစံးအါထီၣ်ဝဲလီၤ
“ကွံၢ်လၢၢ်သီသုးကလၢၤအံၤလၢညါပှၤအိၣ်အဂၤ၃၀အခဲအိၣ်တ့ၢ်ထဲ ၂၀ဘျဲၣ်လီၤ သုးကလၢၤပူၤပယီၤသုးတဖၣ်အိၣ်ဖဲန့ၣ်လီၤ နုာ်လီၤတန့ၣ်ဟးထီၣ်တန့ၣ်ဘၣ် သုးဖိဘၣ်ဒိဒီးအိၣ်တ့ၢ်ထဲအဂၤ၂၀ဃၣ်ဃၣ်လီၤ ကွံာ်လၢၢ်သီသုးကလၢၤအံၤထီၣ်ဝဲတန့ၣ်ဒံးဘၣ် စးထီၣ်ပံးဃးဝဲဖဲ လါအီကူး ၂၃ ၊၂၄လီၤ တုၤခဲအံၤတန့ၣ်ဒံးဘၣ်”န့ၣ်အဝဲစံးဝဲလီၤ
တကးဒံးဘၣ် ဖဲလါစဲးပထ့ဘၢၣ် ၁၄သိီခါ KNLAသုးပာ်ဖှိၣ်တဖၣ်ထီၣ်မၤန့ၣ်ဝဲ ပယီၤသုးကလၢၤလၢအိၣ်ဆီလီၤသးဖဲ ကီၢ်ပယီၤ-ကီၢ်ကၠီၤတဲၤ ကီၢ်ဆၢ ယ့ၣ်တရီး သုးကလၢၤဒီးမၤန့ၣ်ဝဲကျိချံပှၢ်သၣ်အါအါဂီၢ်ဂီၢ်န့ၣ်ခ့ၣ်အဲၣ်ယူၣ် ကညီဒီကလုာ်စၢဖှိၣ်ကရၢထုးထီၣ်ရၤလီၤတၢ်ကစီၣ်န့ၣ်လီၤ
ကညီကီၢ်စဲၣ် လီၢ်ကဝီၤတဖၣ်အပူၤ လါယူၤလံ၊လါအီကူးဒီးတုၤလၢလါစဲးပထ့ဘၢၣ်အတီၢ်ပူၤ လဲဘွဲဒီးဖၣ်အၣ်ကီၢ်ဆၣ်တဖၣ်အပူၤတၢ်ဒုးတကဲထီၣ်နာ်က့လၢကီၢ်ဆၣ်အဂုၤအဂၤတဖၣ်အပူၤ ပယီၤသုးဆီလီၤသးဝဲၤကျိၤဝဲၤဒၢးတဖၣ်ဒီးပယီၤသုးသိလ့ၣ်ကျိၤတဖၣ်ဘၣ်တၢ်ခးအီၤတပယူာ်ဃီန့ၣ်သ့ၣ်ညါဘၣ်ခီဖျိ KNLAသုးပာ်ဖှိၣ်တဖၣ်ထုးထီၣ်ရၤလီၤတၢ်ကစီၣ်အသိးန့ၣ်လီၤ
