လါစဲးပထ့ဘၢၣ် ၁၅သီ၊၂၀၂၃နံၣ်
ကညီကီၢ်စဲၣ် သၣ်တီၣ်-တီအူကျဲဖီခိၣ် ကယါပၠိချီသဝီပူၤ တၢ်ဒုးတအိၣ်နာ်က့ ပယီၤသုးတဖၣ်ဒွဲၣ်အူမၤဟးဂီၤကမျၢၢ်ဟံၣ်တဖၣ်န့ၣ်လီၢ်ကဝီၤကမျၢၢ်တဖၣ်စံးဝဲလီၤ
ဖဲအပူၤကွံာ်လါစဲးပထ့ဘၢၣ် ၁၃ သီအနံၤ ဃိၣ်လိၣ်တိၤအမဲာ်ညါတကပၤ သၣ်တီၣ်ကျဲ ၅မံးလၣ်ဖီခိၣ် ယ့ၣ်စ့ကိသဝီ၊ကယါပၠီချီသဝီ ဒီး ရှါပၠီချီသဝီတကပၤ တီအူဝ့ၢ်ဖီခိၣ် ပယီၤသုးသိလ့ၣ်၅ခိၣ် ဟဲလီၤဟံန့ၣ်ဃးတၢ်လီၢ်န့ၣ်လီၤ
ဖဲလါစဲးပထ့ဘၢၣ် ၁၄သီဂီၤအဆၢကတီၢ် ပယီၤသုးလၢဆီလီၤသးဖဲ ကယါပၠီချီသဝီပူၤတဖၣ် ဒွဲၣ်အူမၤဟးဂီၤကွံာ် ဟံၣ်သၢဖျၢၣ်ဒီးဘုစဲးတဖျၢၣ်န့ၣ် လီၢ်ကဝီၤဖိစံးဝဲန့ၣ်လီၤ
“တၢ်တနံၤန့ၣ်တၢ်ဒုးတအိၣ်ဘၣ် အဝဲသ့ၣ်လၢ၁၃သီအနံၤန့ၣ် ဟဲလၢသဝီပူၤဒီးသုးသိလ့ၣ်တဖၣ်ဒီးတၢ်ပီးတၢ်လီတဖၣ်လီၤ ဖဲ၁၄သီ ဂီၤအဆၢကတီၢ် ဒွဲၣ်အူအီၣ်ဝဲ ဃုသးစဲးတဖျၢၣ် မ့ဝံၤဒွဲၣ်အူဝဲသဝီပူၤဟံၣ်တဖၣ်လီၤ”န့ၣ်အဝဲစံးဝဲလီၤ
ခီဖျိတၢ်ဒုးတအိၣ်နာ်က့ ဆီလီၤလီၢ်ဒီးဒွဲၣ်အူမၤဟးဂီၤဟံၣ်တဖၣ်အဃိ လၢသဝီပူၤ ဖိသၣ်တဖၣ် ပိၣ်မုၣ်တဖၣ်ဒီးသူၣ်က့သးပှၢ်တဖၣ် ပျံၤဖုးတၢ်ဒီး ဘၣ်လဲၤဃ့ၢ်အိၣ်ဝဲဆူ ကပၤသဝီတဖၣ်အပူၤန့ၣ်သ့ၣ်ညါဘၣ်န့ၣ်လီၤ
တကီၢ်ခါခဲအံၤ ပယီၤသုးလၢအိၣ်ဟဲထီၣ်ဖဲတီအူတကပၤတဖၣ်နုာ်လီၤဟံန့ၣ်တၢ်လီၢ်လၢ ရှါပၠီရွၣ်သဝီပူၤအဃိ လီၢ်ကဝီၤဖိ ၃၀၀ဃၣ်ဃၣ် ဘၣ်ဃ့ၢ်ပူၤဖျဲးသးဒီးလၢသဝီပူၤနာ်က့ အိၣ်တ့ၤဒၣ်ထဲ ပိၣ်ခွါနီၢ်ဂံၢ်ဆှၤဂၤန့ၣ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
“လၢရှါပၠီချီသဝီပူၤ သုးဂံၢ်ဘါအါလီၤ လၢသဝီပူၤကမျၢၢ်တဖၣ်န့ၣ်နၣ်ဟူဝဲပယီၤသုးအဃိပျံၤတၢ်ဒီးဃ့ၢ်လီၤ လၢသဝီပူၤပှၤကညီအိၣ်တ့ၤတစဲးလီၤ ပယီၤသုးတဖၣ်ဖီအီၣ်ဖီအီဖဲသဝီပူၤလီၤ”န့ၣ်လီၢ်ကဝီၤဖိစံးဝဲန့ၣ်လီၤ
သၣ်တီၣ်-တီအူကျဲဒီဘိ သဝီတကပၤ ပယီၤသုးစုတီၤဖီလာ် ဘရ့းနီၣ်သုး၊၇မံးလၣ်သုးလ့းသိၢ်သုးကလၢၤပူၤ ခးလီၤကျိဖးဒိၣ် တ့ၤလီၤမ့ၣ်ပိၢ်ဒီးကဘီယူၤအဃိ လီၢ်ကဝီၤဖိ ၅၀၀ဘျဲၣ်ဘၣ်ဃ့ၢ်တၢ်ဒုးဒီး လါအီကူးတလါအတီၢ်ပူၤ လီၢ်ကဝီၤကမျၢၢ်ဟံၣ် ၅ဖျၢၣ် မ့ၣ်အူအီၣ်ဟးဂီၤန့ၣ် Thandaung Mupoe ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ
