ချၢၣ်-တကူၣ်တၢၣ်သဝီကရူၢ်ပူၤ တၢ်ဒုးကဲထီၣ်ဒီး ပယီၤသုးခးလီၤတၢ်ဒီးကဘီယူၤအဃိ လီၢ်ကဝီၤဖိ ၂၀၀၀ဘျဲၣ်ဘၣ်ဃ့ၢ်တၢ်ဒုး

လါစဲးပထ့ဘၢၣ် ၁၅သီ၊၂၀၂၃နံၣ်

ကညီကီၢ်စဲၣ်ချၢၣ်-တကူၣ်တၢၣ် သဝီကရူၢ်အပူၤ ပယီၤသုးဒီး KNLAသုးပၣ်ဖှိၣ်တဖၣ်အဘၢၣ်စၢၤ ခံခီခံကပၤထံၣ်လိာ်သးတၢ်ဒုးကဲထီၣ်ဒီး ပယီၤသုးတကပၤဟဲခးလီၤတၢ်ဒီးကျိဖးဒိၣ်အဃိ သဝီပူၤ လီၢ်ကဝီၤကမျၢၢ် ၂၀၀၀ဘျဲၣ်ဘၣ်ဃ့ၢ်တၢ်ဒုးန့ၣ်သ့ၣ်ညါဘၣ်လၢလီၢ်ကဝီၤဖိအိၣ်န့ၣ်လီၤ

ဖဲလါစဲးပထ့ဘၢၣ် ၁၄သီ ဂီၤ၇နၣ်ရံၣ်ဃၣ်ဃၣ်ဆၢကတီၢ် ချၢၣ်သဝီဒီးမၠီၣ်ဟီသဝီအဘၢၣ်စၢၤ ပယီၤသုးဒီး KNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်ဒိၣ်ဒိၣ်မုာ်မုာ်ဒီးပယီၤသုးတကပၤ ဟဲတ့ၤလီၤမ့ၣ်ပိၢ်ဒီးMi 35ကဘီယူၤအဃိ ချၢၣ်သဝီ၊ချၢၣ်သဝီဖိ ၊တကူၣ်တၢၣ်သဝီပူၤလီၢ်ကဝီၤကမျၢၢ် ၂၀၀၀ဘျဲၣ် အံၤဘၣ်လဲၤဃ့ၢ်စံၣ်အိၣ်ဝဲဆူ ကပီၤကပၤသဝီတဖၣ်န့ၣ် ပှၤဃ့ၢ်တၢ်ဒုးပိၣ်မုၣ်တဂၤစံးဝဲလီၤ

“မၠီၣ်ဟီ ဒီးချၢၣ်သဝီကစူး အိၣ်ခးဝဲလၢ မိၣ်စုးတကပၤ မူခိၣ်စူၤ စးထီၣ်ခးဝဲဖဲ ၇နၣ်ရံၣ်ဘျဲၣ်ဘျဲၣ်လီၤ ချၢၣ်သဝီဒိၣ်၊ချၢၣ်သဝီဆံး၊ချၢၣ်မိၣ်စူး ၊ချၢၣ်-တကူၣ်တၢၣ် သဝီခဲလၢာ်ဘၣ်လဲၤအိၣ်ဝဲဆူ တၢ်ဖီခိၣ်တကပၤ အခဲအိၣ်လၢအကထိလံ ချၢၣ်သဝီဒီတဖျၢၣ်ပူၤန့ၣ် ကအိၣ်လၢ ၂၀၀၀ဘျဲၣ်လီၤ ပှၤအိၣ်တ့ၤဖဲသီခါဖၠၣ်ပူၤတဖၣ် ဘၣ်လဲၤအိၣ်ဝဲဒီးသိလ့ၣ်ခံခိၣ်လီၤ”န့ၣ်အဝဲစံးဝဲလီၤ

ပယီၤသုးတဖၣ်အံၤ ဖဲလါစဲးပထ့ဘၢၣ် ၁၄သီ ဂီၤခိ ၉နၣ်ရံၣ်ဆၢကတီၢ် ဟဲခးလီၤမ့ၣ်ပိၢ်ဒီး Mi35ကဘီယူၤအဃိ လီၢ်ကဝီၤကမျၢၢ်ဒီသဒၢသုးတဖၣ်နာ်က့ သုးဖိသံတဂၤ ဒီးပယီၤသုးတကပၤ သံဘၣ်ဒိအိၣ်ဒီးချၢၣ်မိၣ်စူးသဝီပူၤ ဟံၣ်တဖၣ်နာ်က့ဘၣ်ဒိဟးဂီၤအိၣ်န့ၣ်အဝဲစံးအါထီၣ်ဝဲလီၤ

“တၢ်ဒုးကဲထီၣ်ဒီတနံၤလီၤ မ့ဝံၤဟဲခးလီၤဝဲဒီးကဘီယူၤ ဟဲခးဝဲအဃိ ချၢၣ်မိၣ်စူးသဝီပူၤဟံၣ်တဖၣ်ဟးဂီၤလီၤ တကးဒံးဘၣ်လၢကျိဖးဒိၣ်လုာ်တဖၣ်နာ်က့ခးလီၤတၢ်အဃိ PDFသံတဂၤ အဝဲသ့ၣ်တကပၤဘၣ်၄ဂၤ၅ဂၤလီၤ ဘၣ်ဒိအိၣ်ဟံၣ်လၢကျိဖးဒိၣ်လီၤဘၣ်တီတီန့ၣ်ကအိၣ်၄ဖျၢၣ် ၅ဖျၢၣ် ဘၣ်တဆံးတက့ၢ်န့ၣ်ကအိၣ်၅ဖျၢၣ်၆ဖျၢၣ်ဃၣ်ဃၣ်လီၤ”န့ၣ်အဝဲစံးဝဲလီၤ

လီၢ်ကဝီၤကမျၢၢ်ဘၣ်ဃ့ၢ်တၢ်ဒုး ၂၀၀၀ဘျဲၣ်အံၤဘၣ်လဲၤအိၣ်ဝဲဖဲ သဝီအဃၢၢ်ဟံၣ်တဖၣ်အပူၤဒီး ဟံာ်တဖျၢၣ်န့ၣ်ဘၣ်အိၣ်ဝဲ အဂၤ ၂၀/၃၀ဒီးခီဖျိတၢ်စူၤခါဆၢကတီၢ်အဃိ တၢ်အီၣ်တၢ်အီ၊တၢ်အိၣ်တၢ်ဆိးဒီးတၢ်ဟးထီၣ်က့ၤလီၤအဂီၤဘၣ်သဂၢၢ်တၢ်ကီတၢ်ခဲန့ၣ်လီၤ

တကးဒံးဘၣ် တနံၤအံၤ လါစဲးပထ့ဘၢၣ် ၁၅သီ ဂီၤခီ ၅နၣ်ရံၣ်ဃၣ်ဃၣ်ဆၢကတီၢ် နၣ်ဟူဘၣ်ပယီၤသုးတကပၤခးလီၤကျိအကလုာ်န့ၣ်ပလ့ၣ်သဝီပူၤ လီၢ်ကဝီၤပိၣ်မုၣ်တဂၤစံးဝဲန့ၣ်လီၤ

ကညီကီၢ်စဲၣ်ပူၤ လီၢ်ကဝီၤတဖၣ်လၢအမ့ၢ်ဝဲ မၠၣ်ဝတံၣ်၊ကီးတရံး၊ကြုၤတုၢ်၊နိၣ်တကီ၊သၣ်တီၣ်ဒီးဖၣ်ပူၣ်သဝီတကပၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ ခ့ခီခံကပၤ ထံၣ်လိာ်သးတၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်KNLAသုးဂံၢ်ခီၣ်ထံးတဖၣ်စံးဝဲအသိးသ့ၣ်ညါဘၣ်န့ၣ်လီၤ