မၠၣ်ဝတံၣ်ဝ့ၢ်ပၢၤကီၢ်ဝဲၤလီၢ်ဘၣ်တၢ်ခးအီၤဝံၤအလီၢ်ခံ ပယီၤသုးထုးထီၣ် မုၢ်နၤခီတဘၣ်ဟးထီၣ်တၢ်ကလုာ်

လါစဲးပထ့ဘၢၣ် ၁၄သီ၊၂၀၂၃

ကညီကီၢ်စဲၣ် မၠၣ်ဝတံၣ်ဝ့ၢ်ပၢၤကီၢ်ဝဲၤလီၢ်ဘၣ်တၢ်ခးလီၤအီၤဝံၤအလီၢ်ခံ ပယီၤသုးထုးထီၣ်တၢ်ကလုာ်လၢမုၢ်နၤခီတဘၣ်ဟးထီၣ်န့ၣ် မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ

ဖဲအပူၤကွံာ် လါစဲးပထ့ဘၢၣ် ၃သီ မုၢ်နၤခီ ၇နၣ်ရံၣ်ဃၣ်ဃၣ်ဆၢကတီၢ် မၠၣ်ဝတံၣ်ဝ့ၢ်ပၢၤကီၢ်ဝဲၤဒၢးဘၣ်တၢ်ခးလီၤဒီးဒြိအဃိ ပယီၤသုးတကပၤသံ ၆ဂၤန့ၣ်လီၤ

ဘၣ်တၢ်ခးအီၤဒ်အံၤဝံၤအလီၢ်ခံ ပယီၤသုးတကပၤ ထုးထီၣ်တၢ်ကလုာ်လၢ မုၢ်နၤခီတဘၣ်ဟးထီၣ် လၢမၠၣ်ဝတံၣ်ဝ့ၢ်ပူၤ မုၢ်နၤခီ၈နၣ်ရံၣ်တုၤ ဂီၤခီ ၆နၣ်ရံၣ်အတီၢ်ပူၤဒီးပှၤလၢဟးထီၣ်လၢ ၈နၣ်ရံၣ်ဘျဲၣ်အလီၢ်ခံတဖၣ် ဟ့ၣ်ဃးဝဲတၢ်ကလုာ်လၢကခးဝဲအဂီၤန့ၣ်ဟးဘိးဘၣ်ရၤလီၤဝဲဒီးသိလ့ၣ်န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ

“လၢဝ့ၢ်ပူၤ မုၢ်နၤခီ၈နၣ်ရံၣ်အလီၢ်ခံဒ်သိးတဟးထီၣ်အဂီၤ ဘိးဘၣ်ရၤလီၤဝဲဒီးသိလ့ၣ်လီၤ လၢကၠီးလိကၠံတကပၤတလဲၤဝဲဘၣ် ဘိးဘၣ်ရၤလီၤဒၣ်ဖဲဝ့ၢ်ပူၤလီၤ မုၢ်နၤခိတဘၣ်ဟးထီၣ်အဂီၤဒီးပှၤလၢဟးထီၣ်တဖၣ်ကခးတဲန့ၣ်”မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ

တကီၢ်ခါခဲအံၤ မၠၣ်ဝတံၣ်ဝ့ၢ်ပၢၤကီၢ်ဝဲၤလီၢ်လၢဘၣ်တၢ်ခးအီၤအလီၢ် ပယီၤသုးဟံန့ၣ်ဃးတၢ်လီၢ်ဒီးမုၢ်နၤခီဆၢကတီၢ်ခးပြူၤတပြီၤကျိန့ၣ်သ့ၣ်ညါဘၣ်လၢမၠၣ်ဝတံၣ်ဝ့ၢ်လီၢ်ကဝီၤဖိအိၣ်န့ၣ်လီၤ

တကးဒံးဘၣ် မၠၣ်ဝတံၣ်ဝ့ၢ်အဃၢၢ် လဲးခဲးတီၣ်ဖီခိၣ်နာ်က့ PDFတဖၣ်ဟံန့ၣ်ဃးတၢ်လီၢ်အိၣ်တလါဘျဲၣ်လံဒီး ပယီၤသုး ခလရ ၂၇၅သုးတဖၣ်ခးလီၤကျိဖးဒိၣ်ကိးမုၢ်နၤန့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲလီၤ

တနံၤအံၤဂီၤခီဆၢကတီၢ်နာ်က့ ပယီၤသုးတကပၤ ဟဲတ့ၤလီၤမ့ၣ်ပိၢ်ဒီးကဘီယူၤဆူ လဲးခဲးတီၣ်န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ

“ဖဲဂီၤခီန့ၣ် ဟဲတ့ၤလီၤမ့ၣ်ပိၢ်ဒီးကဘီယူၤဂီၤဂီၤသီသီ မုၢ်နၤခီနာ်က့ ၂၇၅ သုးတဖၣ်ခးစိလီၤကျိဖးဒိၣ်ဖဲန့ၣ်တကပၤလီၤ အခဲလၢဝ့ၢ်ပူၤနာ်က့ ပှၤဟးထီၣ်က့ၤလီၤဆှၤလီၤ”န့ၣ်အဝဲစံးဝဲလီၤ

ဖဲအပူၤကွံာ်လါမးရှးအခါနာ်က့ မၠၣ်ဝတံၣ်ဝ့ၢ်ပူၤ ပယီၤသုးထုးထီၣ်တၢ်ကလုာ်လၢ စးထီၣ်လၢ မုၢ်နၤနၣ်ရံၣ်၁၀တုၤဂီၤ၄နၣ်ရံၣ် မုၢ်နၤတဘၣ်ဟးထီၣ်တၢ်ကလုာ်န့ၣ်သ့ၣ်ညါဘၣ်ခိဖျိလီၢ်ကဝီၤဂံၢ်ခီၣ်ထံးတၢ်ကစီၣ်တဖၣ်စံးဝဲအသိးန့ၣ်လီၤ