တီၣ်ကၠၣ်အ့-လဲၤကွဲၤ ကျဲဖီခိၣ် ပယီၤသုးကလၢၤလၢအိၣ်ခိးထၢစ့ဒီးတြဲၤဘၣ်တၢ်ခးအီၤအဃိ ပယီၤသုးတကပၤခးလီၤကျိဖးဒိၣ်

လါစဲးပထ့ဘၢၣ် ၁၁သီ၊၂၀၂၃နံၣ်

ကညီကီၢ်စဲၣ် ကီးတရံးကီၢ်ဆၣ် တိၣ်ကၠၣ်အ့-လဲၤကွဲၤကျဲတကပၤ ပယီၤသုးကလၢၤဘၣ်တၢ်ဒုးအီၤအဃိပယီၤသုၤတကပၤ ခးလီၤကျိဖးဒိၣ်တပယူာ်ဃီန့ၣ် ကီးတရံးဝ့ၢ်လီၢ်ကဝီၤဖိတဖၣ်စံးဝဲလီၤ

တီၣ်ကၠၣ်အ့သဝီအဃၢၢ် ဖဲအပူၤကွံာ်လါစဲးပထ့ဘၢၣ် အသီ၁၀ (၆)နီၣ်ထိၣ် ဃၣ်ဃၣ်ဆၢကတီၢ် ပယီၤသုးဒီး KNLAသုးပာ်ဖှိၣ်တဖၣ်အဘၢၣ်စၢၤ ထံၣ်လိာ်သးတၢ်ဒုးကဲထီၣ်န့ၣ်လီၤ

တၢ်ဒုးကဲထီၣ်ဒ်အံၤဝံၤအလီၢ်ခံပယီၤသုးမီၤစိရိၤစုတီၤဖီလာ် ခမရ ၅၄၅ ဒီး ၅၄၆သုးတဖၣ် ခးလီၤကျိဖးဒိၣ်ဆူကြုၤတုၢ်ဝ့ၢ်အဃၢၢ်န့ၣ် ကြုၤတုၢ်ဝ့ၢ်လီၢ်ကဝီၤဖိစံးဝဲလီၤ

“တၢ်ဒုးန့ၣ်ကဲထီၣ်လၢ ဟါခီလီၤ ကဘီယူၤဟဲနာ်က့တခးလီၤဝဲဘၣ် ကဲထီၣ်ဖဲတီၣ်ကၠၣ်အ့ကပၤလီၤ ဖဲမဟါတၢ်ဒုးကဲထီၣ်ဝံၤအလီၢ်ခံ ခးလီၤကျိဖးဒိၣ်ဆူ ကြုၤတုၢ်ဝ့ၢ်ကပၤသဝီတဖၣ်ပူၤလီၤ”န့ၣ် ကြုၤတုၢ်ဝ့ၢ်လီၢ်ကဝီၤဖိတဂၤစံးဝဲလီၤ

ခီဖျိတၢ်ဒုးကဲထီၣ်အဃိ ပယီၤသုးတကပၤဘၣ်ဒိ သံအိၣ်ဒီး KNLAသုးပာ်ဖှိၣ်တကပၤမၤန့ၣ်ဝဲကျိအခိၣ်၁၀ဘျဲၣ်သ့ၣ်ညါဘၣ်လၢKNLAသုးဂံၢ်ခီၣ်ထံးတဖၣ်အိၣ်န့ၣ်လီၤ

“ဖဲမဟါ တီၣ်ကၠၣ်အ့တကပၤ ပသ့ၣ်ညါဘၣ်လၢ သုးရ့ၣ်၁၇ပာ်ဖှိၣ်သုးတဖၣ် မၤတၢ်လီၤပသ့ၣ်ညါဘၣ်လၢမၤန့ၣ်ကျိအခိၣ်၁၀ဘျဲၣ်လီၤ ပယီၤသုးတကပၤဘၣ်ဒိသံအိၣ်”န့ၣ်KNLAသုးဂံၢ်ခီၣ်ထံးတဂၤစံးဝဲလီၤ

ဖဲအပူၤကွံာ် လါစဲးပထ့ဘၢၣ် ၇သီ ၇နီၣ်ထိၣ်ဆၢကတီၢ်ခါနာ်က့ တတါအူအဃၢၢ် ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်ဒီးပယီၤသုးတကပၤခးလီၤကျိဖးဒိၣ်အဃိ ချီတီၣ်သဝီပူၤဟံၣ်တဖျၢၣ် သိလ့ၣ်တခိ့ဟးဂီၤအိၣ်န့ၣ်လီၤ

တကီၢ်ခါခဲအံၤကီးတရံးဝ့ၢ်ဒီး ကြုၤတုၢ်ဝ့ၢ်အဃၢၢ် ပယီၤသုၤမၤအါထီၣ်သုးနီၢ်ဂံၢ်ဒီးတၢ်ဒုးကဲထီၣ်ဒိၣ်ဒိၣ်မုၢ်မုၢ်တအိၣ်ဒံးသနာ်ဟ့ ခံခီခံကပၤ ဒုးယၤအတၢ်ဖ့ၣ်ဆၢအိၣ်အဃိ တၢ်ဒုးကဲထီၣ်သ့န့ၣ်KNLAသုးဂံၢ်ခီၣ်ထံးတဂၤစံးဝဲလီၤ

“အခဲအံၤတၢ်ဒုးကဲထီၣ်ဒိၣ်ဒိၣ်မုၢ်မုၢ်တအိၣ်ဒံးဘၣ် ပယီၤသုၤတကပၤနာ်က့မၤအါထီၣ်သုးဂံၢ်ဘါအဃိ ဘၣ်ကွာ်တၢ်အိၣ်သးလီၤ ပဝဲဒၣ်နာ်က့ဖဲမူဒါလီၤဘၣ်ပှၤအလီၢ်န့ၣ်အိၣ်ခိးပာ်စၢၤတၢ်လီၤ”န့ၣ်အဝဲစံးဝဲလီၤ

ပယီၤသုးတဖၣ်ခးလီၤကျိဖးဒိၣ်ဆူ ကီးတရံးဒီးကြုၤတုၢ်ဝ့ၢ်ကပၤ ကိးမုၢ်နံၤဃၣ်ဃၣ်ဒီး ခိဖျိခးလီၤကျိဖးဒိၣ်ဒ်အံၤအဃိလါအီကူးတလါအတီၢ်ပူၤ လီၢ်ကဝီၤဖိသံ၂ဂၤ ဟံၣ်ဘၣ်ဒိဟးဂီၤအိၣ် ၅ဖျၢၣ်ဃၣ်ဃၣ်န့ၣ် လီၢ်ကဝီၤဂံၢ်ခီၣ်ထံးတၢ်ကစီၣ်တဖၣ်စံးဝဲအသိးသ့ၣ်ညါဘၣ်န့ၣ်လီၤ