ကမၤမိးဝ့ၢ်ပဒိၣ်ပၢပြးဝဲၤဒၢးဘၣ်တၢ်ခးလီၤမ့ၣ်ပိၢ်ဒီးဒြိအဃိ ကဝီၤဒ့ပၢပြးမူဒါခိၣ်သံ

လါစဲးပထ့ဘၢၣ် ၇သီ၊၂၀၂၃နံၣ်

ကညီကီၢ်စဲၣ် မုၢ်တြီၤကီၢ်ရ့ၣ် ကမၤမိးဝ့ၢ်ပူၤ ပယီၤသုးစုတီၤဖီလာ် ပၢပြးဝဲၤဒၢးဘၣ်တၢ်တ့ၢ်လီၤမ့ၣ်ပိၢ်ဒီးဒြိအဃိ ပၢပြးပှၤဘၣ်မူဘၣ်ဒါသံတဂၤန့ၣ်သ့ၣ်ညါဘၣ်လၢလီၢ်ကဝီၤဖိအိၣ်န့ၣ်လီၤ

ဖဲလါစဲးပထ့ဘၢၣ်၇သီ ဂီၤနၣ်ရံၣ် ၁၀ မံးနံး၁၀ဃၣ်ဃၣ်ဆၢကတီၢ် ပယီၤသုးစုတီၤဖီလာ် ပဒိၣ်ပၢပြးဝဲၤဒၢးဘၣ်တၢ်တ့ၢ်လီၤမ့ၣ်ပိၢ်ဒီးဒြိ၃ဖျၢၣ်ဒီး ပယီၤသုးဟံၣ်မူဟ့ၣ်ဒါလၢ နီၢ်ဂံၢ်၄ကဝီၤဒ့ပၢပြးမူဒါခိၣ်စိမ့ ဘၣ်ဒိဒီးမ့ၣ်ပိၢ်အက့အဃိသံန့ၣ်ကမၤမိးလီၢ်ကဝီၤဖိတဂၤစံးဝဲန့ၣ်လီၤ

“နီၢ်ဂံၢ်၄ကဝီၤဒ့ပၢပြးမူဒါခိၣ် အူစိမ့ ဘၣ်ဝဲဒီးမ့ၣ်ပိၢ်အက့လၢအခီၣ်တဲၤန့ၣ်ထံၣ်ဝဲခဲလီၤ အဝဲမ့ၢ်ကဝီၤဒ့ပၢပြးမူဒါထိၣ်နာ်က့တအိးထီၣ်အရူဘၣ်ဟဲမၤတၢ်ဖဲ(ထွေအုပ်)ရူလီၤ မ့ၣ်ပိၢ်လီၤတဲၤဖဲအကပၤအဃိအခီၣ်တဲၤတကပၤ အဂုၤအဂၤနာ်က့ဘၣ်ဒိအိၣ် အိၣ်လၢလၢၢ်ဒီးထးတဖၣ်အဖီလာ်အဃိနၣ်ရံၣ်ဝၣ်မးထံၣ်က့ၤအီမ့ၣ်ပိၢ်န့ၣ်တလီၤတဲၤဖဲရူဖီခိၣ်ဘၣ် လီၤတဲၤဖဲရူနီၢ်တယာ်တၢၣ်ကပၤဒီးရူလီၢ်ခံတကပၤလီၤ”န့ၣ်အဝဲစံးဝဲလီၤ

ပယီၤသုးစုတီၤဖီလာ် ပၢပြးရူဘၣ်တၢ်တ့ၢ်လီၤမ့ၣ်ပိၢ်ဒီးဒြိဝံၤအလီၢ်ခံ ပယီၤသုးဖိတဖၣ်၊ပယီၤသုးစုတီၤဖိလာ် BGFသုးဒီးပၢၤကီၢ်တဖၣ်ဟဲဆူဝဲၤဒၢးပူၤဒီးဟဲသမံသမိးဝဲဟဲဒိတၢ်ဂီၢ်တဖၣ်အိၣ်န့ၣ်အဝဲတဲအါထီၣ်ဝဲလီၤ

“ဝဲၤဒၢးပှၤမၤတၢ်ဖိတဖၣ်အိၣ်လီၤ ဒိတၢ်ဂီၢ် ပှၤဘၣ်မူဘၣ်ဒါကရူၢ်တဖၣ်ဟဲကွၢ်ဝဲ အခဲန့ၣ်တပံးဃးရူဒံးဘၣ် အခဲBGFဒီးပယီၤသုး၅ဂၤဟဲဝဲဒီးကူကၣ်ပတီၤမုၣ်လီၤ ပၢၤကီၢ်၊ပၠူစီထံဒီးပှၤဟ့ၣ်ဂံၢ်ဟ့ၣ်ဘါပယီၤသုးတဖၣ်ဟဲအါမးလီၤ”န့ၣ်အဝဲစံးဝဲလီၤ

ကမၤမိးဝ့ၢ်ပူၤ ပယီၤသုးစုဖီလာ် ပဒိၣ်ပၢပြးရူအံၤ ဖဲ၂၀၂၃နံၣ်အတီၢ်ပူၤ ဘၣ်တၢ်တ့ၢ်လီၤမ့ၣ်ပိၢ်ဒီးဒြိတဆှၤန့ၣ်၅ဘျီန့ၣ်လီၢ်ကဝီၤဖိတဖၣ်စံးဝဲန့ၣ်လီၤ

တကးဒံးဘၣ် စးထီၣ်ဖဲအပူၤကွံာ် ၂၀၂၂နံၣ် လါအ့ဖြ့အတီၢ်ပူၤ ပယီၤသုးစုဖီလာ် ပၢၤကီၢ်နီၢ်ဂံၢ်၁၅ဃၣ်ဃၣ်အံၤဟံန့ၣ်ဃးတၢ်လီၢ်ဖဲပၢပြးဝဲၤဒၢးပူၤန့ၣ်သ့ၣ်ညါဘၣ်န့ၣ်လီၤ

ကညီကီၢ်စဲၣ်ပူၤ လါယူၤလံ၊လါအီကူးဒီးတုၤခဲလါစဲးပထ့ဘၢၣ်အတီၢ်ပူၤ ကီၢ်ဆၣ်တဖၣ်ပူၤ ပယီၤသုးဟံန့ၣ်ဃးလီၢ်တဖၣ်၊ဝဲၤကျိၤဝဲၤဒၢးရူတဖၣ်၊ပယီၤသုးသိလ့ၣ်ကျိၤတဖၣ် ဘၣ်တၢ်ခးအီဒီးဘၣ်တၢ်တ့ၢ်လီၤမ့ၣ်ပိၢ်ဒီးဒြိတပယူာ်ဃီန့ၣ်KNLAသုးပာ်ဖှိၣ်တဖၣ်ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ