လါစဲးပထ့ဘၢၣ်၆သီ၊၂၀၂၃နံၣ်
ကညီကီၢ်စဲၣ် သၣ်တီၣ်ကၠံဝ့ၢ် တီအူ-သၣ်တီၣ်သိလ့ၣ်ကျဲဖီခိၣ် ပယီၤသုးခးလီၤကျိဖးဒိၣ်အဃိ သးနံၣ်၉နံၣ်ဖိသၣ်တဂၤဒီးလီၢ်ကဝီၤဖိသံခံဂၤန့ၣ်သၣ်တီၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
သၣ်တီၣ်ဝ့ၢ် ပၠါစခဲ သဝီတကပၤ သၣ်တီၣ်၇မံးလၤသုးကလၢၤ ၊ပယီၤသုးစုဖီလာ် ထိဘိၣ်ကၠံသုးကလၢၤဒီးလ့းသိၣ်ဝ့ၢ်ပူၤပယီၤသုးတဖၣ်ခးလီၤကျိဖးဒိၣ်ကိးမုၢ်နံၤဃၣ်ဃၣ်န့ၣ်သ့ၣ်ညါဘၣ်န့ၣ်လီၤ
ခိဖျိခးလီၤတၢ်ဒ်အံၤအဃိ ဖဲအပူၤကွံာ်လါစဲးပထ့ဘၢၣ်၅သီ ဂီၤခီ၉နၣ်ရံၣ်ဃၣ်ဃၣ်ဆၢကတီၢ် ပယီၤသုး၇မံးလၤ သုးကလၢၤခးလီၤကျိဖးဒိၣ်အဃိ လီၤတဲၤပိၣ်ဖးထီၣ်ဖဲပှၤလဲၤလၢပၠါစခဲဆူရွါကၠံကျဲဖီခိၣ် ဟံၣ်ဖီခိၣ်ဒီး သးနံာ်၉နံၣ်ဖိသၣ်တဂၤဒီးသးနံၣ် ၅၂နံၣ်ပိၣ်ခွါသံတဂၤဝံၤ လီၢ်ကဝီၤဖိဘၣ်ဒိခံဂၤဘၣ်ဒိတဆံးတက့ၢ်န့ၣ် လီၢ်ကဝီၤဖိတဂၤစံးဝဲလီၤ
“ကျိဖးဒိၣ်န့ၣ်အိၣ်ခးလီၤဝဲလၢ လ့းသိၣ် သုးကလၢၤတကပၤ အဝဲသ့ၣ်ကွာ်ဝဲမ့တဘၣ်သးဝဲန့ၣ်ခးစိလီၤဝဲ ဖဲမဟါနာ်ဟ့ခးလီၤဝဲဆူပၠါစခ့သဝီတကပၤ လီၤတဲၢ်ဖဲဟံၣ်ဖီခိၣ် ဖိသၣ်ဒီးပှၤသးပှၢ်သံတဂၤ ဘၣ်ဒိခံဂၤ”န့ၣ်လီၢ်ကဝီၤဖိစံးဝဲလီၤ
သၣ်တီၣ်ဝ့ၢ်ဒီးအဃၢၢ် စးထီၣ်ဖဲအပူၤကွံာ်လါအီကူးအခၢၣ်သးနွံတဖၣ်န့ၣ် ပယီၤသုးခးလီၤဝဲကျိဖးဒိၣ်ဆူ သၣ်တီၣ်ဝ့ၢ်ဒီးလ့းသိၣ်တကပၤအိၣ်အသိး မၤဝဲတၢ်ထီၣ်ဒုးဆူ သၣ်တီၣ်ဝ့ၢ်တကပၤအိၣ်န့ၣ်ပၠါစခဲ သဝီလီၢ်ကဝီၤဖိတဂၤစံးဝဲလီၤ
“လ့းသိၣ်ကပၤသဝီတဖၣ်န့ၣ်ဃ့ၢ်တၢ်ဒုးဖးယံၤလံ တၢ်အိၣ်သးမ့ဂ့ၤတစဲးန့ၣ်က့ၤအိၣ်ဝဲလၢသဝီပူၤ ပှၤမ့ခးတၢ်န့ၣ်ဘၣ်ဃ့ၢ်ကဒီးလီၤ သုးကျိၤအါပကျဲတဖၣ်အံၣ်အဃိ ပတဲဖျါထီၣ်သဝီအမံၤတဘူၣ်ဘၣ်”န့ၣ်လီၢ်ကဝီၤဖိလၢတအဲၣ်ဒိးပာ်ဖျါအမံၤတဂၤစံးဝဲလီၤ
တကးဒံးဘၣ်ခီဖျိခးလီၤကျိဖးဒိၣ်အဃိ သၣ်တီၣ်ဝ့ၢ်ကလံၤထံးတကပၤ သဝီခံဖျၢၣ်ပူၤ လီၢ်ကဝီၤဖိ၂၅၀ဘျဲၣ် အံၤဘၣ်လဲၤဃ့ၢ်အိၣ်ဆိးဝဲလၢခူးပူၤတဖၣ်န့ၣ်သ့ၣ်ညါဘၣ်န့ၣ်လီၤ
ဖဲအပူၤကွံာ် လါယူၤလ့ အသီ၃၀အခါနာ်က့ ပယီၤသုးခးလီၤကျိဖးဒိၣ်အဃိ ပၠါစခ့ သဝီပူၤလီၢ်ကဝီၤဖိသံခံဂၤန့ၣ်သ့ၣ်ညါဘၣ်လၢလီၢ်ကဝီၤတၢ်ကစီၣ်တဖၣ်အိၣ်န့ၣ်လီၤ
