လါစဲးပထ့ဘၢၣ် ၄သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်ပၢၤကီၢ်ဝဲၤဒၢး ဘၣ်တၢ်တ့ၢ်လီၤမ့ၣ်ပိၢ်ဒီးဒြိအဃိ မၠၣ်ဝတံၣ်တၢ်မဲာ်ညါသုးရူ သုးခိၣ်ဒိၣ်ဂီၢ်ဂ့ၢ် အီၣ်ကၠီၤမ့ဒီး အဂုၤအဂၤသံ၅ဂၤ ဘၣ်ဒိ ၁၃ဂၤန့ၣ်သ့ၣ်ညါဘၣ်လၢ မၠၣ်ဝတံၣ်ဝ့ၢ်လီၢ်ကဝီၤဖိတဖၣ်အိၣ်န့ၣ်လီၤ
မၠၣ်ဝတံၣ်ဝ့ၢ်ပၢၤကီၢ်ဝဲၤဒၢးမဲာ်ညါ ဖဲလါစဲးပထ့ဘၢၣ်၃သီ ဟါခီ၆နၣ်ရံၣ် မံးနံး၄၀ဆၢကတီၢ် တၢ်ပိၢ်ဖးထီၣ်ဒီး ဖဲပှၤဘၣ်မူဘၣ်ဒါတဖၣ်လဲၤသမံသမိးဆၢကတီၢ် ဘၣ်တၢ်တ့ၢ်လီၤမ့ၣ်ပိၢ်ဒီးဒြိဒ်အံၤန့ၣ်လီၤ
ခီဖျိဘၣ်တၢ်ခးလီၤမ့ၣ်ပိၢ်ဒီးဒြိဒ်အံၤအဃိ မၠၣ်ဝတံၣ်ဝ့ၢ် သုးခိၣ်ဒိၣ်ဂီၢ်ဂ့ၢ် အီၣ်ကၠီၤမ့ဒီးပှၤအဂုၤအဂၤသံ၅ဂၤဝံၤဘၣ်ဒိ၁၃ဂၤန့ၣ် မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
“ခးလီၤဝဲလၢပၢၤကီၢ်ရူပူၤလီၤ လီၤဖဲပၢၤကီၢ်ရူပူၤခံဖျၢၣ် ကီၢ်ရ့ၣ်ပၢပြးဒီးအပှၤသံခံဂၤ ခဲလၢၤသံ၅ဂၤလီၤ ဘၣ်ဒိ၁၃ဂၤလီၤ”န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲလီၤ
ခီဖျိဘၣ်တၢ်ခးလီၤဒ်အံၤအဃိ မၠၣ်ဝတံၣ်ဝ့ၢ် သုးခိၣ်ဒိၣ်ဂီၢ်ဂ့ၢ် အီၣ်ကၠီၤမ့၊မၠၣ်ဝတံၣ်ကီၢ်ရ့ၣ်ပၢပြးမူဒါခိၣ် စိတ့း၊ကီၢ်ရ့ၣ်ပၢပြးပှၤဘၣ်မူဘၣ်ဒါ ထိထိလ့၊ကီၢ်ရ့ၣ်ပှၤဖှီၣ်စရီပၠ့ၣ်ဖြိအီၤဒီးပၢၤကီၢ်သိလ့ၣ်မူဒါခိၣ် န့ၣ်လ့စိတဖၣ်သံန့ၣ်သ့ၣ်ညါဘၣ်န့ၣ်လီၤ
ဘၣ်ဃးဒီးတၢ်ခးလီၤမ့ၣ်ပိၢ်တဘျီအံၤန့ၣ်မ့ၢ်ဝဲ Cobra Columnဒီး Federal Wings သုးပာ်ဖှိၣ်တဖၣ်ခးဝဲဒီးတၢ်ပၢၤဆၢသုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်န့ၣ်Cobra Column ပှၤဘၣ်မူဘၣ်ဒါတဂၤစံးဝဲလီၤ
“Cobra ပူၤ Federal Wings တဖၣ်ခးဝဲပၢၤကီၢ်ဝဲၤဒၢးပူၤခံဖျၢၣ်လီၤ တၢ်ပၢၤဆၢသုးတကပၤတၢ်ဘၣ်ဒိဘၣ်ထံးတအိၣ်ဘၣ်”န့ၣ်အဝဲစံးဝဲလီၤ
တကးဒံးဘၣ်ပှၤအိၣ်လၢပၢၤကီၢ်ဝဲၤဒၢးပူၤတဖၣ် တလဲၤအိၣ်ဝဲလၢတၢ်လီၢ်အဂုၤအဂၤသနာ်က့ မၤအါထီၣ်ဃးဘံၣ်ဘၢနီၢ်ဂံၢ်န့ၣ်ပှၤဘူးဒီးပၢၤကီၢ်ရူတဂၤစံးဝဲလီၤ
“ပှၤအိၣ်လၢစခ့ပူၤတဖၣ်အိၣ်ဝဲဒ်သိးညီနုာ်လီၤ မၤဃံးထီၣ်တၢ်ဘံၣ်ဘၢလီၤ တမ့ၢ်သုးဖိခိးတၢ်ဘၣ် အိၣ်ဒၣ်ပၢၤကီၢ်အိၣ်ခိးလီၤ တၢ်လီၢ်ဟးဂီၤတဖၣ်တပျဲပလဲၤကွာ်ဘၣ် ပျဲလဲၤဝဲဒၣ်အဝဲသ့ၣ်ခိၣ်နၣ်တဖၣ်လီၤ”န့ၣ်အဝဲစံးဝဲလီၤ
ကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊ကြုၤတုၢ်၊နိၣ်တကီ၊ဖၣ်ပူၣ်ဒီးသၣ်တီၣ်ဝ့ၢ်သ့ၣ်တဖၣ်ပူၤ ပယီၤသုးဒီးKNLAသုးပာ်ဖှိၣ်တဖၣ် ခံခီခံကပၤထံၣ်လိာ်သးတၢ်ဒုးကဲထီၣ်အိၣ်အသိး ပယီၤသုးစုဖီလာ်ဝဲၤကျိၤဝဲၤဒၢးတဖၣ်ဘၣ်တၢ်ခးလီၤမ့ၣ်ပိၢ်ဒီးဒြိတပယူာ်ဃီန့ၣ်လီၤ
ဖဲအပူၤကွံာ် လါအီကူး ၂၂သီဟါခီဆၢကတီၢ် မၠၣ်ဝတံၣ်ဝ့ၢ် ကီၢ်ရ့ၣ်တၢ်ဆါဟံၣ်ဘၣ်တၢ်တ့ၢ်လီၤမ့ၣ်ပိၢ်ဒီးဒြိအဃိ တၢ်ဆါဟံၣ်ပူၤ တၢ်သူၣ်ထီၣ်ဟးဂီၤတနီန့ၣ်သ့ၣ်ညါဘၣ်ခီဖျိလီၢ်ကဝီၤတၢ်ကစီၣ်ဂံၢ်ခီၣ်ထံးတဖၣ်စံးဝဲအသိးန့ၣ်လီၤ
