ပယီၤသုးကဘီယူၤခံဘ့ၣ်လၢဟဲဆှၢတၢ်အီၣ်ဒီးလါလဲဆူ ခလရ၃၂ဘၣ်တၢ်ခးအီၤ

လါစဲးကထ့ဘၢၣ် ၂သီ၊၂၀၂၃နံၣ်

ကညီကီၢ်စဲၣ် နိၣ်တကီဝ့ၢ်ပူၤ Mi35 ကဘီယူၤခံဘ့ၣ်လၢ ဟဲဆူ ခလရ၃၂ ဘၣ်တၢ်ခးအီၤဒီးဒြိခီဖျိလီၢ်ကဝီၤကမျၢၢ်ဒီသဒၢသုးတဖၣ်န့ၣ်သ့ၣ်ညါဘၣ်န့ၣ်လီၤ

လါစဲးပထ့ဘၢၣ်၁သီ ဂီၤခီ ၁၁နၣ်ရံၣ်ဃၣ်ဃၣ်ဆၢကတီၢ် နိၣ်တကီ ပယီၤသုးကဘီယူၤ Mi35ခံဘ့ၣ်လၢ ဟဲဆှၢတၢ်အီၣ်ဒီးလါလဲဆူ ခလရ၃၂ တဖၣ်လီၢ်ကဝီၤကမျၢၢ်ဒီသဒၢသုးခးဝဲဒီးဒြိန့ၣ် KNLAဂံၢ်ခီၣ်ထံးတဂၤစံးဝဲန့ၣ်လီၤ

“ဖဲမဟါ မုၢ်ထူၣ်ဆၢကတီၢ် ခးဝဲကဘီယူၤလၢကစံၢ်လီၤန့ၣ်လီၤ ခးဝဲဒီးဒြိနာ်က့တဘၣ်ဘၣ် လၢမုၢ်နၤခီခးကဒီးဝဲဒီးဒြိတဖျၢၣ် ကဘီယူၤန့ၣ် ဟဲပာ်လီၤဝဲ ဒုးယၤခိၣ်တဂၤဒီးတၢ်အီၣ်၊လါလဲတဖၣ် စံၢ်လီၤဝဲတဘူၣ် ဘၣ်က့ၤကဒါက့ၤဝဲလီၤ”န့ၣ်အဝဲစံးဝဲလီၤ

လီၢ်ကဝီၤပိၣ်မုၢ်တဂၤစံးဝဲ”ကဘီယူၤ၂ဘ့ၣ်လၢဟဲဆူ နိၣ်တကီ ၃၂သုးကလၢၤခ့ဘ့ၣ်ဘၣ်တၢ်ခးအီၤဒီးဒြိဒီးတခိၣ်န့ၣ်က့ၤကဒါက့ၤဝဲဒီးတခိၣ်န့ၣ်ယူာ်ဝ့ၤဝီာ်ဝဲန့ၣ်လီၤ”

လီၢ်ကဝီၤကမျၢၢ်ဒီသဒၢသုးတဖၣ် ဟဲခးလီၤမ့ၣ်ပိၢ်ဒီးဒြိဆူပယီၤသုးစုဖီလာ် ပၢၤကီၢ်ဝၤဒၢးအခါ ဘၣ်ဖဲ ကဘီယူၤခံဘ့ၣ်ဟဲဆှၢတၢ်အီၣ်ဆၢကတီၢ်န့ၣ်လီၢ်ကဝီၤပိၣ်မုၢ်တဂၤစံးဝဲလီၤ

“လၢဂီၤခီ၁၁နၣ်ရံၣ် ဘၣ်အတီၤဖဲပှၤဟဲးခးလီၤဒီးဒြိဆူ ပၢၤကီၢ်ဝဲၤဒၢးပူၤလီၤ ခးလီၤဝဲခံဖျၢၣ်ဒီးဒြိလီၤ ဘၣ်ဒိသံတသ့ၣ်ညါဘၣ်ဒံးဘၣ် ကဘီယူၤန့ၣ်ကဲခံဘ့ၣ် တခးဆၢက့ၤတၢ်ဘၣ် အဝဲသ့ၣ်ဟဲဆှၢတၢ်အီၣ်လီၤ”န့ၣ်အဝဲစံးဝဲလီၤ

လီၢ်ကဝီၤကမျၢၢ်ဒီသဒၢသုးတဖၣ် ဟဲခးလီၤမ့ၣ်ပိၢ်ဒီးဒြိဝံၤအလီၢ်ခံ ပယီၤသုးဒုးယၤသုးရ့ၣ်ခးကဒါက့ၤကျိဖးဒိၣ်အဖျၢၣ်၁၀ဃၣ်ဃၣ်န့ၣ်လီၢ်ကဝီၤဖိတဖၣ်စံးဝဲလီၤ

ဖဲအပူၤကွံာ်လါအီကူး၂၇သီဒီး၂၈သီအနံၤခါနာ်က့ ပယီၤသုးစုဖီလာ်ဝဲၤကျိၤဝဲၤဒၢးတဖၣ်လၢအမ့ၢ်ဝဲ စံၣ်ပ့ၣ်ရူ၊စရီရူ၊တၢ်ဘူၣ်အီၣ်ဘူၣ်အီဒီးတၢ်သူၣ်တၢ်ဖျး(ဘဏ်)၊သမးဝၣ်ယမးရူတဖၣ်ဘၣ်တၢ်ခးလီၤဒီးဒြိဝံၤ ခီဖျိဘၣ်တၢ်ခးလီၤဒ်အံၤတပယူာ်ဃီအဃိ ပယီၤသုးစုဖီလာ်ရူပှၤမၤတၢ်ဖိတဖၣ် အိၣ်ဝဲဖဲဝဲၤဒၢးကရၢၤပူၤတဘူၣ်လၢၤအဃိ ဘၣ်လဲၤအိၣ်ဝဲဆူဘူးတံၢ်တဖၣ်အိၣ်န့ၣ်သ့ၣ်ညါဘၣ်န့ၣ်လီၤ
နိၣ်တကီဝ့ၢ်ပူၤနာ်က့ ပယီၤသုးတကပၤခးလီၤကျိဖးဒိၣ်ကိးမုၢ်နၤဃၣ်ဃၣ်ဒီးဝ့ၢ်နုာ်လီၤဟးထီၣ်လီၢ်တဖၣ်မၤဃံးထီၣ်တၢ်သမံသမိးန့ၣ်သ့ၣ်ညါဘၣ်န့ၣ်လီၤ

ကညီကီၢ်စဲၣ်ပူၤ လီၢ်ကဝီၤတဖၣ်လၢအမ့ၢ်ဝဲ မၠၣ်ဝတံၣ်၊ကီးတရံး၊ကြုၢ်တုၤ၊နိၣ်တကိ၊သၣ်တီၣ်ဒီးဖၣ်ပူၣ်ဝ့ၢ်သ့ၣ်တဖၣ်တကပၤ ပယီၤသုးဒီးKNLAသုးပၣ်ဖှိၣ်တဖၣ်ခံခီခံကပၤထံၣ်လိာ်သးတၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်သ့ၣ်ညါဘၣ်ခီဖျိ KNLAသုးဂံၢ်ခီၣ်ထံးတၢ်ကစီၣ်တဖၣ်စံးဝဲအသိးန့ၣ်လီၤ