မၠၣ်ဝတံၣ်-ကီးတရံး အ့ရှါကျဲဖီခိၣ် သိလ့ၣ်ကျဲကးတံာ်သးကဲထီၣ်

လါအီကူး ၃၀သီ၊၂၀၂၃နံၣ်

ကညီကီၢ်စဲၣ် မၠၣ်ဝတံၣ်-ကီးတရံး အ့ရှါကျဲဖီခိၣ် တသီန့ၣ်ပျဲလဲၤဝဲဒၣ်သိလ့ၣ်အခိၣ် ၃၀ဃၣ်ဃၣ်အဃိ သိလ့ၣ်ကျဲကးတံာ်သးတဖၣ်ကဲထီၣ်န့ၣ် သ့ၣ်ညါဘၣ်လၢပှၤနီသိလ့ၣ်တဖၣ်အိၣ်န့ၣ်လီၤ

မၠၣ်ဝတံၣ်-ကီးတရံးအ့ရှါကျဲ တီနီၢ်ထံလီၤဆှူအဃၢၢ်ဖဲအပူၤကွံာ်လါအီကူး ၇သီအနံၤခါ တၢ်စူၤတပယူာ်ဃီဒီးဟီၣ်ခိၣ်လာ်ကဲထီၣ်သးန့ၣ်လီၤ

တကီၢ်ခါခဲအံၤ မၠၣ်ဝတံၣ်-ကီးတရံးအ့ရှါကျဲဖိခိၣ် ကျဲလၢဟးဂီၤတဖၣ်ဘၣ်တၢ်ဘှီဂ့ၤထီၣ်က့ၤဝဲဝံၤလံအဃိ ဟးထီၣ်က့ၤလီၤန့ၣ်ကဒါက့ၤလံသနာ်က့ တနံၤန့ၣ်ပျဲလဲၤဝဲဒၣ်သိလ့ၣ်အခိၣ်၃၀န့ၣ်သ့ၣ်ညါဘၣ်လၢပှၤနီသိလ့ၣ်ဖိအိၣ်န့ၣ်လီၤ

“သိလ့ၣ်လၢကဘၣ်က့ၤလီၤတပျဲက့ၤဝဲဘၣ် တသီန့ၣ်ပျဲလဲၤဝဲဒၣ်အခိၣ်၂၀/၃၀လီၤ စးထီၣ်မၤဝဲလၢကျဲဂ့ၤထီၣ်က့ၤအနံၤန့ၣ်လီၤ”န့ၣ်ပှၤနီသိလ့ၣ်တဂၤစံးဝဲလီၤ

ဟီၣ်ခိၣ်လာ်ဖဲတီနီၢ်ထံလီၤဆှူကပၤဝံၤအလီၢ်ခံ ကျဲလၢပှၤဘှီဂ့ၤထီၣ်တဖၣ်န့ၣ်မ့ၢ်ဝဲပှၤသူဝဲ(ဘေလီ)တိၤဒီးခိဖျိတိၤအံၣ်အဃိ ကျဲကးတံာ်သးကဲထီၣ်န့ၣ်ပှၤနီသိလ့ၣ်တဂၤစံးဝဲလီၤ

“ကျဲန့ၣ်အခဲဟးထီၣ်က့ၤလီၤန့ၣ်လံ တိၤအံၣ်အဃိဘၣ်လဲၤဝဲတဘျီသိလ့ၣ်တခိၣ်လီၤ အဃိကျဲပံးလီၤ စးထီၣ်ဖဲကီးတရံးဟးထီၣ်တုၤလၢကစၢၤခိၣ်ကျဲပံးလီၤ”န့ၣ်အဝဲစံးဝဲလီၤ

ကျဲကးတံာ်သးတကးဒံးဘၣ် မၠၣ်ဝတံၣ်-ကီးတရံး အ့ရှါကျဲဒီဘိပယီၤသုးစုတီၤဖီလာ် BGFသုးတဖၣ်ဃ့စ့အဃိ ပှၤနီသိလ့ၣ်တဖၣ်ဘၣ်သဂၢၢ်ဒီးတၢ်ကီတၢ်ခဲန့ၣ်လီၤ

ခိဖျိလၢ ကီးတရံး-မၠၣ်ဝတံၣ်အ့ရှါကျဲ ကျဲကးတံာ်သးဒီးထၢစ့အါအါဂီၢ်ဂီၢ်တဖၣ်အဃိသိလ့ၣ်ဖးဒိၣ်လၢဘၣ်ဟးထီၣ်က့ၤလီၤလၢကျဲဖဲန့ၣ်တဖၣ်ဖီခိၣ်တၢ်ပီးတၢ်လီတဖၣ်အပှ့ၤထီၣ်န့ၣ်သ့ၣ်ညါဘၣ်ခီဖျိလီၢ်ကဝီၤတၢ်ကစီၣ်ဂံၢ်ခီၣ်ထံးတဖၣ်စံးဝဲအသိးန့ၣ်လီၤ