ခီဖျိပယီၤသုးခးလီၤကျိဖးဒိၣ်အဃိ ကီးနွဲၣ်သဝီပူၤ လီၢ်ကဝီၤကမျၢၢ်သံတဂၤ

လါအီကူး၂၈သီ၊၂၀၂၃နံၣ်

ကညီကီၢ်စဲၣ် ကီးတရံးကီၢ်ဆၣ် ကီးနွဲၣ်သဝီပူၤပယီၤသုးခးလီၤကျိဖးဒိၣ်အဃိ လီၢ်ကဝီၤကမျၢၢ်သံတဂၤန့ၣ်ကီးတရံးဟီၣ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ

ကီးတရံးဝ့ၢ်အဃၢၢ် ကီးနွဲၣ်၊ကမဲၣ်ကိဒီးအ့ရှါကျဲဒီဘိ ပယီၤသုးဒီးလီၢ်ကဝီၤကမျၢၢ်ဒီသဒၢသုးအဘၢၣ်စၢၤ တၢ်ဒုးကဲထီၣ်တပယူာ်ဃီဒီးပယီၤသုးခလရ ၉၇ သုးရ့ၣ်ဒီးလ့ၣ်ဝးကျိဖးဒိၣ်လူၢ်ခးလီၤကျိဖးဒိၣ်တပယူာ်ဃီန့ၣ်လီၤ

ဖဲအပူၤကွံာ် လါအီကူး၂၇သီ ဟါခီ၄နၣ်ရံၣ်ဆၢကတီၢ် ကီးနွဲၣ်သဝီအဃၢၢ် ပယီၤသုးဒီးKNLAသုးပာ်ဖှိၣ်အဘၢၣ်စၢၤတၢ်ဒုးကဲထီၣ်ဒီးပယီၤသုးခးလီၤကျိဖးဒိၣ်အဃိ လီၢ်ကဝီၤသံတဂၤ ဘၣ်ဒိ၅ဂၤန့ၣ်ကီးတရံးဝ့ၢ်လီၢ်ကဝီၤဖိစံးဝဲန့ၣ်လီၤ

“ကီးနွဲၣ် ၊ကမဲၣ်ကိအဃၢၢ်တၢ်ဒုးကဲထီၣ်ကိးမုၢ်နံၤလီၤ လဲၣ်ဝးဒီး၉၇နာ်က့ ခးလီၤကျိဖးဒိၣ်ကိးမုၢ်နံၤလီၤ ဖဲမဟါ၅နၣ်ရံၣ်ဘျဲၣ်ဘျဲၣ်န့ၣ်လီၤတဲာ်ဖဲသဝီပူၤလီၤ ဖါတံၤသံတဂၤ ဘၣ်ဒိ၅ဂၤ လၢအဂၤဟံၣ်ဘၣ်ဒိတအိၣ်ဘၣ်”န့ၣ်အဝဲစံးဝဲလီၤ

တကးဒံးဘၣ် ကီးတရံးဝ့ၢ်အဃၢၢ် ပယီၤသုးဒီးKNLAသုးပာ်ဖှိၣ်အဘၢၣ်စၢၤခံခီခံကပၤဒုးယၤအတၢ်ဖ့ၣ်ဆၢအိၣ်ဒီး KNLAသုးပာ်ဖှိၣ်တကပၤ ဟံန့ၣ်ဃးတၢ်လီၢ်ဒီးအိၣ်ကတဲာ်ကတီၤသးန့ၣ် သ့ၣ်ညါဘၣ်လၢKNLAသုးဂံၢ်ခီၣ်ထံးတဖၣ်အိၣ်န့ၣ်လီၤ

“ကျိဖးဒိၣ်ဒုခးဝဲလီၤ ပဟံန့ၣ်ဃးတၢ်လီၢ်ဖဲ ကမဲၣ်ကိ၊ကီးနွဲၣ်လီၤတၢ်ဒုးကဲထီၣ်အါကတၢၢ်နာ်က့အိၣ်ဒၣ်ဝဲဖဲကီးနွဲၣ်၊ကမဲၣ်ကိလီၤ”န့ၣ်KNLAသုးဂံၢ်ခီၣ်ထံးတဲဝဲအသိးသ့ၣ်ညါဘၣ်န့ၣ်လီၤ

ဖဲအပူၤကွံာ်လါအီကူး၂၅သီအနံၤနာ်က့ ဖဲကမဲၣ်ကိကမါအဃၢၢ်ပယီၤသုးဒီးKNLAသုးတဖၣ်အဘၢၣ်စၢၤ တၢ်ဒုးကဲထီၣ်ဒီးပယီၤသုၤသံ၇ဂၤန့ၣ်သ့ၣ်ညါဘၣ်န့ၣ်လီၤ

ကီးတရံးဝ့ၢ်ပူၤ ပယီၤသုးခးလီၤကျိဖးဒိၣ်အဃိ လါအီကူးတလါအတီၢ်ပူၤ လီၢ်ကဝီၤကမျၢၢ်သံ၂ဂၤဘၣ်ဒိအဂၤ၁၀ဃၣ်ဃၣ်ဝံၤဟံၣ်ဘၣ်ဒိဟးဂီၤအဖျၢၣ်၁၀ဃၣ်ဃၣ်န့ၣ်ဒူပျာ်ယာ်ကီၢ်ရ့ၣ်ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ