ဂလိၣ် (ဂဠုန်)သုးကျိၤထုးထီၣ်တၢ်ကစီၣ်လၢတၢ်ဒုးကဲထီၣ်ဒီးပယီၤသုးဆီလီၤသးဖဲတီၣ်ကၠၣ်အ့သဝီပူၤ

လါအီကူး၂၂သီ၊၂၀၂၃နံၣ်

ကညီကီၢ်စဲၣ် ကီးတရံးကီၢ်ဆၣ် ပယီၤသုးလၢအိၣ်ဖဲတီၣ်ကၠၣ်အ့သဝီပူၤတဖၣ်ဒီးKNLAသုးပၣ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်သၢသီန့ၣ်သ့ၣ်ညါဘၣ်ခီဖျိဂလိၣ် (ဂဠုန်)သုးကျိၤထုးထီၣ်တၢ်ကစီၣ်အသိးန့ၣ်လီၤ

စးထီၣ်လါအီကူး ၁၈သီတုၤအသီ၂၀ အတီၢ်ပူၤ ပယီၤသုးဆီလီၤလီၢ်ဖဲ တီၣ်ကၠၣ်အ့ကၠိခမရ ၅၄၆ဒီးKNLAသုးပာ်ဖှိၣ်တဖၣ်အဘၢၣ်စၢၤခံခီခံကပၤထံၣ်လိာ်သးတၢ်ဒုးကဲထီၣ်ဒီးပယီၤသုးတကပၤသုးခိၣ်ခံဂၤဒီးသုးစကီၤဖိသံတဂၤဝံၤဘၣ်ဒိ၁၃ဂၤန့ၣ်ဂလိၣ် (ဂဠုန်)သုးကျိၤပှၤဘၣ်မူဘၣ်ဒါတဂၤစံးဝဲန့ၣ်လီၤ

“ပသ့ၣ်ညါဘၣ်လၢ အဝဲသ့ၣ်ဟံးန့ၣ်ဃးတၢ်လီၢ်ဖဲကၠိပူၤန့ၣ်စးထီၣ်လၢ၂၀၂၁ခါလံသုးဂံၢ်ဘါအိၣ် အဂၤ၃၀ဃၣ်ဃၣ်လီၤ တၢ်ဒုးကဲထီၣ်တဘျီမ့ၢ်ဝံၤမၤအါထီၣ်သုးဂံၢ်ဘါ အဝဲသ့ၣ်မၤဟးဂီၤကမျၢၢ်ဟးထီၣ်က့ၤလီၤကျဲ မၤနၢၤအီၣ်ကမျၢၢ်အဃိတၢ်ဒုးကဲထီၣ်တလီၢ်လီၢ်လီၤ”န့ၣ်အဝဲစံးဝဲလီၤ

တၢ်ဒုးကဲထီၣ်၃သီအတီၢ်ပူၤ ကြူၤတုၤဝ့ၢ်ပူၤ ခလရ၅၄၅ဒီးကီးတရံးဝ့ၢ်၉၇သုးတဖၣ်ခးလီၤကျိဖးဒိၣ်ဆူတီၣ်ကၠၣ်အ့သဝီတကပၤအဃိဖဲလါအီကူး၁၉သီအနံၤသးနံၣ်၅၀ဘျဲၣ် အူမၠ့းကၠီာ် အခိၣ်ဘၣ်ဒိဒီးကျိဖးဒိၣ်အက့ဒီးဟံၣ်ဟးဂီၤအိၣ်တနီနာ်က့ တသ့ၣ်ညါလီၤတံာ်ဒံးဘၣ်န့ၣ် ဟီၣ်ကဝီၤပိာ်ခွါတဂၤစံးဝဲလီၤ

“လၢညါတနံၤအခါဖါတံၣ်သံတဂၤကျိဖးဒိၣ်လီၤတဲာ်ဘၣ်အဃိဟံၣ်ဟးဂီၤ၈ဖျၢၣ်အဖျၢၣ်၁၀ဃၣ်ဃၣ်လီၤ အခဲတၢ်ဂၢၤလီၤ”န့ၣ်အဝဲစံးန့ၣ်လီၤ

တီၣ်ကၠၣ်အ့ဒီးနီၣ်တလၣ်သဝီပူၤလီၢ်ကဝီၤကမျၢၢ် ၁၅၀၀ဃၣ်ဃၣ်အံၤ လၢမုၢ်ဆါအဆၢကတီၢ်က့ၤအိၣ်ဆိးလၢသဝီပူၤနာ်က့ လၢမုၢ်နၤဘၣ်လဲၤမံလၢပူၤဖျဲးဒီးကျိဖးဒိၣ် သဝီတဖၣ်အပူၤန့ၣ်လီၢ်ကဝီၤကမျၢၢ်ပိာ်ခွါတဂၤစံးဝဲလီၤ

“တၢ်အိၣ်သးဂၢၤလီၤအခဲအံၤ ကၠၣ်အ့ဒီးနီၣ်တလၣ်သဝီခံဖျၢၣ်န့ၣ်ဘၣ်ဃ့ၢ်ပူၤဖျဲးသးမီနီ မုၢ်ဆါခီဟဲက့ၤအိၣ်မုၢ်နၤခီဘၣ်လဲၤမံလၢတၢ်လီၢ်ဂုၤဂၤလီၤ “န့ၣ်အဝဲစံးဝဲလီၤ

တကီၢ်ခါခဲအံၤ ထံၣ်လိာ်သးတၢ်ဒုးကဲထီၣ်တအိၣ်နာ်က့ပယီၤသုးဒီးKNLAသုးပာ်ဖှိၣ်အဘၢၣ်စၢၤခံခီခံကပၤသုးအတၢ်ဖ့ၣ်ဆၢအိၣ်န့ၣ် ဂလိၣ် (ဂဠုန်)သုးကျိၤပှၤဘၣ်မူဘၣ်ဒါတဂၤစံးဝဲလီၤ

လါယူၤလံတုၤလါအီကူး အတီၢ်ပူၤခီဖျိပယီၤသုးခးလီၤကျိဖးဒိၣ်အဃိ ကီးတရံးဒီးကြူၤတုၤဝ့ၢ်ပူၤဖိသၣ်တဖၣ်ဒီးလီၢ်ကဝီၤကမျၢၢ်ဘၣ်ဒိ၇ဂၤဝံၤ ဟံၣ်ဟးဂီၤ ၆ဖျၢၣ်န့ၣ် ဒူပျာ်ယာ်ကီၢ်ရ့ၣ်ဘိးဘၣ်ရၤလီၤဝဲန့ၣ်လီၤ