တၢ်လဲၤခး(စွ့ၣ်ကိ)ပယီၤသုးကလၢၤလၢဒြိ ၦၤဖိသၣ်ဘၣ်ဒိတဂၤ

လါအီကူး ၂၁ သီ၊၂၀၂၃ နံၣ်

လၢဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ်အပူၤ ပယီၤသုးကလၢၤလၢအိၣ်ဆီလီၤသးဖဲ(စွ့ၣ်ကိ)သ၀ီပူၤတဖၣ်အံၤ ဖဲမဟါလါအီကူး ၂၀ သီ ဂီၤခီ ၇ နၣ်ရံၣ်အဆၢကတီၢ် တၢ်လဲၤခးပယီၤသုးကလၢၤအံၤလၢဒြိဒီး ဖဲန့ၣ်ၦၤဖိသၣ်ဘၣ်ဒိ၀ဲ (၁)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ပယီၤသုးကလၢၤဆီလီၤလီၢ်လၢစွ့ၣ်ကိသဝီပူၤအိၣ်၅လါဘျဲၣ်အံၤဘၣ်တၢ်ဟဲခးလီၤမ့ၣ်ပိၢ်ဒီးဒြိခီဖျိကရူၢ်ကရၢလၢတသ့ၣ်ညါအမံၤတဒူၣ်ဒီးခီဖျိတၢ်ခးလီၤတဘျီအံၤအဃိ ဖိသၣ်သးနံၣ်၁၀ဘျဲၣ်တဂၤဘၣ်ဒိန့ၣ်လီၢ်ကဝီၤဖိစံးဝဲန့ၣ်လီၤ

“ဖိသၣ်န့ၣ်အသးအိၣ်ဒံးဒၣ်အနံၣ်၁၀ဘျဲၣ်လီၤ ဘၣ်ဒိဒီးမ့ၣ်ပိၢ်အက့လီၤ စးထီၣ်ဖဲဂီၤ၇နၣ်ရံၣ်ဃၣ်ဃၣ်လီၤခးဝဲဒီးဒြိလီၤ ခးဝဲပယီၤသုးလဲၤလီၤတဲာ်ဖဲကမျၢၢ်ဟံၣ်ကပၤလီၤ”န့ၣ်လီၢ်ကဝီၤဖိတဂၤစံးဝဲလီၤ

ခီဖျိဘၣ်တၢ်ဟဲခးလီၤမ့ၣ်ပိၢ်ဒီးဒြိဒ်အံၤအဃိပယီၤသုးတကပၤခးလီၤကဒါက့ၤကျိဖးဒိၣ်၊ကျိဖိန့ၣ်လီၢ်ကဝီၤဖိတဖၣ်စံးဝဲလီၤ

“ပယီၤသုးကလၢၤအိၣ်လၢသဝီဝဲပူၤန့ၣ်ဖးယံာ်လံ တၢ်လီၢ်ဘၣ်တၢ်ခးလီၤဒီးဒြိန့ၣ်ဘူးဒီးပယီၤသုးကလၢၤလီၤ ဘၣ်တၢ်ခးအဝဲသ့ၣ်ဒီးဒြိဝံၤအလီၢ်ခံအဝဲသ့ၣ်ခးကဒါက့ၤဒီးကျိဖးဒိၣ် ကျိဖိကလုာ်န့ၣ်တနၣ်ဟူသီၣ်သီၣ်ဘၣ် အဝဲသ့ၣ်ခးစိလိာ်သးဒြိဒီးကျိဖးဒိၣ်လီၤ”န့ၣ်လီၢ်ကဝီၤဖိတဂၤစံးဝဲလီၤ

ဘၣ်တၢ်ခးလီၤမ့ၣ်ပိၢ်ဒီးဒြိဝံၤအလီၢ်ခံ ပယီၤသုးဒီးကဝီၤဒ့သးပှၢ်တဖၣ်မၤဃံးထီၣ်တၢ်ဘံၣ်တၢ်ဘၢလၢပယီၤသုးကလၢၤအဃၢၢ်ဒီးသမံသမိးဝဲပှၤဟးထီၣ်က့ၤလီၤတဖၣ်န့ၣ်သ့ၣ်ညါဘၣ်န့ၣ်လီၤ

ပယီၤသုးဟံးန့ၣ်ထံကီၢ်စိကမီၤဝံၤအလီၢ်ခံ တၢ်ပၢၢ်ဆၢသုးပာ်ဖှိၣ်တဖၣ်လဲၤခးလီၤမ့ၣ်ပိၢ်ဒီးဒြိဆူပယီၤသုးကလၢၤတဖၣ်တပယူာ်ဃီဒီးစွ့ၣ်ကိသဝီပယီၤသုးကလၢၤအံၤကရူၢ်ကရၢဖဲလဲၣ်တဒူၣ်လဲၤန့ၣ်ပာ်ဂၢၢ်ပာ်ကျၤတန့ၣ်ဒံးဘၣ်န့ၣ်လီၤ

ကညီကီၢ်စဲၣ်ပူၤ ကီးတရံး၊မၠၣ်ဝတံၣ်၊ဖၣ်ပူၣ်၊သၣ်တီၣ်ကၠံဒီးနိၣ်တကီကီၢ်ဆၣ်သ့ၣ်တဖၣ်အပူၤပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်တပယူာ်ဃီဒီးပယီၤသုးကလၢၤပူၤသုးဖိတဖၣ် ဘၣ်တၢ်ခးလီၤဒီးဒြိအဃိ သံ၊ဘၣ်ဒိတဖၣ်အိၣ်ဒီးပယီၤသုးစုဖီလာ်ရူတဖၣ်ဘၣ်တၢ်လဲၤခးလီၤမ့ၣ်ပိၢ်အဃိဟးဂီၤအါထီၣ်န့ၣ်သ့ၣ်ညါဘၣ်လၢKNLAဂံၢ်ခီၣ်ထံးတၢ်ကစီၣ်တဖၣ်အိၣ်န့ၣ်လီၤ