မၠၣ်ဝတံၣ်အဃၢၢ်တၢ်ဒုးလၢကဲထီၣ်တဖၣ်အဃိ မ့လဲးပဲၤ သဝီပူၤဟီၣ်ကဝီၤကမျၢၢ်တဖၣ်ဘၣ်ဃ့ၢ်တၢ်ဒုး

လါအီကူး ၁၇ သီ၊၂၀၂၃နံၣ်

ကညီကီၢ်စဲၣ် မၠၣ်ဝတံၣ်ဝ့ၢ်အဃၢၢ် ဖဲအပူၤကွံာ်လါအီကူး ၁၅သီ စးထီၣ်ဖဲဂီၤ ၅နၣ်ရံၣ်ဃၣ်ဃၣ် ဆၢကတီၢ် တၢ်ဒုးကဲထီၣ်အဃိ မ့လဲးပ့ၤသဝီပူၤဟီၣ်ကဝီၤကမျၢၢ်တနီ ဘၣ်ဃ့ၢ်တၢ်ဒုးန့ၣ်သ့ၣ်ညါဘၣ်လၢ ဟီၣ်ကဝီၤဖိတဖၣ်အိၣ်န့ၣ်လီၤ

မၠၣ်ဝတံၣ် ဝ့ၢ် လဲးခဲးတီၣ်ဖီခိၣ် ပယီၤသုးဒီး KNLAသုးပာ်ဖှိၣ်အဘၢၣ်စၢၤ တၢ်ဒုးကဲထီၣ်ယံာ်တလါဘျဲၣ်လံဒီး တၢ်ဒုးကဲထီၣ်အဝီ၁၀ဃၣ်ဃၣ်န့ၣ် Cobra Column ထုးထီၣ်ရၤလီၤတၢ်ကစီၣ်ဖဲလါအီကူး ၁၄သီအခါန့ၣ်လီၤ

တကီၢ်ခါခဲအံၤ KNLAသုးပာ်ဖှိၣ်တဖၣ်လၢအမ့ၢ်ဝဲ Cobra Column၊ကၠသ့းနဲးသုးကျိၤ၊Federal Wings သုးကျိၤတဖၣ်ဟံးန့ၣ်ဃးတၢ်လီၢ်ဖဲလဲးခဲးတီၣ်ဖီခိၣ်ဒီး ဒ်သိးကဒုးန့ၣ်က့ၤ လဲးခဲးတီၣ် သုးကလၢၤအဂီၤ ခးလီၤဝဲကျိဖးဒိၣ်တပယူာ်ဃီလီၤ

“ခးလီၤဝဲထဲအဖျၢၣ်ဒိၣ်လီၤ နၣ်ဟူဘၣ်ကျိဖိကလုာ်ဒံး သ့ၣ်ဖးမ့ဝံၤသီၣ်အကလုာ်ဖးဒိၣ်လီၤ စးထီၣ်ခးဝဲလၢ၅နၣ်ရံၣ်န့ၣ်လံ ခးဝဲဒီးအဖျၢၣ်တဃဲၢ်တဖၣ်လီၤ မ့ခးဝဲတဘျီဃီန့ၣ်နၣ်ဟူဘၣ်၄/၅ဖျၢၣ်လီၤ ဖဲမုၢ်နၤ၇နၣ်ရံၣ်ဃၣ်ဃၣ်ခးဝဲသၢဖျၢၣ်ဃၣ်ဃၣ်ဒီးဂၢၢ်လံ”န့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲလီၤ

ခီဖျိပယီၤသုးခးလီၤကျိဖးဒိၣ်ဒ်အံၤအဃိ ကျိဖးဒိၣ်လီၤတဲၢ်ပိၣ်ဖးထီၣ်ဖဲမ့လဲးပ့ၣ်သဝီပူၤဒီး မ့လဲးပဲၤ သဝီပူၤ ဟံၣ် အဖျၢၣ် ၄၀၀ဘျဲၣ်ပူၤ ဟီၣ်ကဝီၤကမျၢၢ် ၁၀၀၀ဘျဲၣ်အံၤ ဘၣ်ပာ်တ့ၢ်ဟံၣ်ဃီဒီး ဘၣ်ဃ့ၢ်ပူၤဖျဲးသးန့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲန့ၣ်လီၤ

“ခးဝဲန့ၣ် ထဲၣ်တီာ်မူၣ် တကပၤ၊ကၠီးတီၣ် တကပၤ၊ရွှ့ၣ်တကိၣ် (ပုံတူ)အလီၢ်ခံ ၊စ့လဲးမၠ့ၣ် သိလ့ၣ်ကရၢၢ်ဒီး ၂၇၅ တကပၤ ခးဖှိၣ်ဝဲဆူ လဲးခဲးတီၣ် လီၤ ဖဲန့ၣ်တဖျၢၣ်န့ၣ်လီၤဖဲ မ့လဲးပဲၤ သဝီပူၤ မ့လဲးပ့ၤ သဝီပူၤပှၤကညီ၁၀၀၀ဘျဲၣ်ဘၣ်ဃ့ၢ်လီၤ”န့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲလီၤ

တကီၢ်ခါခဲအံၤ မၠၣ်ဝတံၣ်ဝ့ၢ် လဲးခဲးတီၣ် ဟီၣ်ကဝီၤပူၤ ပယီၤသုးဒီး KNLAသုးပာ်ဖှိၣ်အဘၢၣ်စၢၤ ခံခီခံကပၤ သုးအတၢ်ဖ့ၣ်ဆၢအိၣ်ထီၣ်ဒီးပယီၤသုးစုဖီလာ် BGFသုးတဖၣ်မၤအါထီၣ်သုးဂံၢ်ဘါလၢ ကၠီးလိကၠံ (ဘုရား)အလီၢ်ခံကဝီၤဒ့တဖၣ်တကပၤန့ၣ်ဟီၣ်ကဝီၤတဂၤစံးဝဲလီၤ

“BGF သိလ့ၣ်တဖၣ်ဟးထီၣ်လီၤ ကအိၣ်လၢ အခိၣ် ၂၀ဘျဲၣ်ညါ လၢ (ထိုင်တော်မူ)တကပၤBGFသုးကလၢၤအိၣ်တဖျၢၣ်လီၤ ဖဲမနၣ်နာ်က့လဲၤဝဲ တဂီၤအံနာ်က့လဲၤဝဲ”န့ၣ်ပှၤလၢထံၣ်ဝဲဒီးမဲာ်တဂၤစံးဝဲန့ၣ်လီၤ

ဖဲအပူၤကွံာ် လါအီကူး ၁၅သီဂီၤအခါ တၢ်ဒုးကဲထီၣ်ဒီးပယီၤသုးတကပၤခးလီၤကျိဖးဒိၣ် အဖျၢၣ် ၃၀၀ဃၣ်ဃၣ်ဒီးဟဲခးလီၤတၢ်ဒီးကဘီယူၤ ခံဘျီန့ၣ်လီၤ

ကညီကီၢ်စဲၣ်ပူၤ ကီးတရံး၊မၠၣ်ဝတံၣ်၊နိၣ်တကီ၊သၣ်တီၣ်ကၠံဒီးဖၣ်ပူၣ်ဝ့ၢ်သ့ၣ်တဖၣ်အပူၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးခးလီၤကျိဖးဒိၣ် ဟဲခးလီၤမ့ၣ်ပိၢ်ဒီးကဘီယူၤအဃိ ဟီၣ်ကဝီၤကမျၢၢ်တဖၣ်၊ဟံၣ်၊ကၠိဒီးတၢ်ဘူၣ်တၢ်ဘါတၢ်သူၣ်ထီၣ်တဖၣ်ဟးဂီၤတပယူာ်ဃီန့ၣ် သ့ၣ်ညါဘၣ်လၢဟီၣ်ကဝီၤဖိတဖၣ်အိၣ်န့ၣ်လီၤ