လါအီကူး ၁၇သီ၊၂၀၂၃နံၣ်
ကညီကီၢ်စဲၣ် သဲၣ်တီၣ်ကၠံကီၢ်ဆၣ် လ့းသိၣ်ဝ့ၢ်အဃၢၢ်သဝီတဖၣ်တကပၤ ပယီၤသုးစုဖီလာ် ခမရ၆၀၃ခးလီၤကျိဖးဒိၣ်ကိးမုၢ်နံၤဃၣ်ဃၣ်အဃိ ဟီၣ်ကဝီၤကမျၢၢ်၂၀၀၀ဘျဲၣ် ဘၣ်ဃ့ၢ်ပူၤဖျဲးသးန့ၣ်ဟီၣ်ကဝီၤဖိစံးဝဲန့ၣ်လီၤ
ဖဲအပူၤကွံာ်လါအီကူးအသီ၁၀နံၤခါ လ့းသိၣ်ဝ့ၢ်အဃၢၢ် မဲလိၤ(မိုင်းလုံ)သဝီပူၤပယီၤသုးကလၢၤဘၣ်တၢ်ခးအီဒီး Sniperဝံၤအလီၢ်ခံ ပယီၤသုးခးလီၤကျိဖးဒိၣ်ကိးမုၢ်နံၤဃၣ်ဃၣ်န့ၣ်လီၤ
ခီဖျိခးလီၤဝဲဒီးကျိဖးဒိၣ်အဃိ လ့းသိၣ် ဝ့ၢ်အဃၢၢ် ယာ်ဒိၣ်၊ကလ့ၣ်ထး၊ဝၣ်သီခိၣ်ဒီးသဝီအဃၢၢ်ဟီၣ်ကဝီၤကမျၢၢ်၂၀၀၀ဘျဲၣ်ဘၣ်လဲၤဃ့ၢ်စံၣ်အိၣ်ဆူ တီအူဝ့ၢ်ဒီးလ့းသိၣ်ဝ့ၢ်တကပၤန့ၣ်ဟီၣ်ကဝီၤဖိစံးဝဲလီၤ
“လၢလါအီကူးအသီ၁၀ခါ လ့းသိၣ်ကပၤ မ့လိၣ် သဝီ ပယီၤသုးကလၢၤဘၣ်တၢ်ခးအီဒီး Sniperအဃိ ပယီၤသုးခးက့ၤဝဲဒီးကျိဖးဒိၣ် လ့းသိၣ်ကပၤသဝီတဖၣ်န့ၣ်ဘၣ်ဃ့ၢ်ဖးယံၤလံ တၢ်အိၣ်သးမ့ဂ့ၤထီၣ်တစဲးန့ၣ်က့ၤအိၣ်ဝဲလၢသဝီပှၤမ့ခးတၢ်ဘၣ်စံၣ်ကဒီးတနီဟဲဃ့ၢ်ထီၣ်ဆူလ့းသိၣ်ဝ့ၢ်ပူၤတနီဃ့ၢ်ဆူတီအူဝ့ၢ်ပူၤလီၤ”န့ၣ်ဟီၣ်ကဝီၤဖိတဂၤစံးဝဲလီၤ
တကးဒံးဘၣ်ဖဲအပူၤကွံာ်လါအီကူး ၁၄သီအနံၤနာ်က့ လ့းသိၣ်ကျဲ ၇မံးလၤ ပယီၤသုးသိလ့ၣ်တခိၣ်ဘၣ်တၢ်စဲလီၤမ့ၣ်ပိၢ်အဃိပယီၤသုးတကပၤခးလီၤဝဲ၄၀မမ ၁၂၀မမတဖၣ်န့ၣ်ဟီၣ်ကဝီၤဖိတဖၣ်စံးဝဲလီၤ
“ဖဲ၁၄သီမုၣ်ထူၣ်ဆၢကတီၢ် လ့းသိၣ် ကျတလၢ၇မံးလၤ န့ၣ်ပယီၤသုးသိလ့ၣ်ဘၣ်တၢ်ဒုးအီဒီးဟီၣ်လာ်မ့ၣ်ပိၢ်အဃိ ပယီၤသုးတကပၤခးကဒါကျိဖးဒိၣ်ကိးမုၢ်နၤဃၣ်ဃၣ်လီၤ ခးဝဲဒီး၄၀မမ၁၂၀မမတဖၣ်လီၤ ပှၤကညီဘၣ်ဒိတအိၣ်ဘၣ် ဖဲ၁၃သီ ဂီၤအဆၢကတီၢ်သၣ်တီၣ်ကျဲ ပၠါစခဲ သဝီပူၤကမျၢၢ်ဃ့ၢ်တၢ်ဒုးတဖၣ်အကျါပယီၤသုးက့ၤဖှီၣ်ဝဲထဲပိာ်ခွါဖိတဖၣ်ဒီးဟါခီမးပျဲဟဲက့ၤဝဲလီၤ”န့ၣ်အဝဲစံးဝဲလီၤ
သၣ်တီၣ်ကၠံဝ့ၢ်တကပၤပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်တပယူာ်ဃီဒီးခီဖျိပယီၤသုးခးကျိဖးဒိၣ်အဃိ ဟီၣ်ကဝီၤကမျၢၢ်ဟံာ်တဖၣ်ဘၣ်ဒိဟးဂီၤအိၣ်န့ၣ်လီၤ
သၣ်တီၣ်ဝ့ၢ်ပူၤ ပယီၤသုးခးလီၤကျိဖးဒိၣ်အဃိ လါယူၤတုၤလါအီကူးအတီၢ်ပူၤ ဟီၣ်ကဝီၤဖိသံအဂၤ၁၀ဃၣ်ဃၣ်ဒီးကမျၢၢ်ဟံၣ်ဟးဂီၤအဖျၢၣ်၃၀ဃၣ်ဃၣ်ဝံၤ ဟီၣ်ကဝီၤဖိဘၣ်ဒိအဂၤ၃၀တကးဒံးဘၣ်ဘၣ်တၢ်ဖှီၣ်ဃးအိၣ်အဂၤ၁၀ဃၣ်ဃၣ်န့ၣ်လီၤ
ကညီကီၢ်စဲၣ်ပူၤ ကီးတရံး၊မၠၣ်ဝတံၣ်၊နိၣ်တကီ၊သၣ်တီၣ်ကၠံဒီးဖၣ်ပူၣ်ဝ့ၢ်သ့ၣ်တဖၣ်အပူၤ တၢ်ဒုးကဲထီၣ်ကိးမုၢ်နံၤဃၣ်ဃၣ်တကးဒံးဘၣ်တၢ်ဖိတၢ်လံၤတဖၣ်အပှ့ၤထီၣ်အဃိဟီၣ်ကဝီၤဖိတဖၣ်ဘၣ်သဂၢၢ်ဒီးတၢ်ကီတၢ်ခဲလၢကိးမုၢ်နံၤအီၣ်အီအိၣ်ဆိးအဂီၤန့ၣ်သ့ၣ်ညါဘၣ်န့ၣ်လီၤ
