လါအီကူး ၁၄သီ၊၂၀၂၃နံၣ်
ပယီၤသုးမီၤစိရိၤ ဂုာ်ကျဲးစၢးဝဲဒ်သိးကဒုးန့ၣ်က့ၤ ကညီကီၢ်စဲၣ် မၠၣ်ဝတံၣ်ဝ့ၢ်အဃၢၢ် လဲးခဲးတီၣ်သုးကလၢၤအဃိ လဲးခဲးတီၣ်အဃၢၢ်တၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်ပှၤဘၣ်မူဘၣ်ဒါလၢ Cobra Column စံးဝဲန့ၣ်လီၤ
လဲးခဲးတီၣ် သုးကလၢၤအံၤ KNLAပာ်ဖှိၣ်သုးတဖၣ်လၢအမ့ၢ်ဝဲ Cobra Columnဒီး နဂဖၠူၤ သုးကျိၤ ဒုးန့ၣ်ဝဲဖဲ လါအီကူး ၂၁သီအနံၤန့ၣ်လီၤ
တကီၢ်ခါခဲအံၤ ပယီၤသုးတဖၣ်ထဲးဂံၢ်ထဲးဘါဂုာ်ကျဲးစၢးဝဲဒ်သိးကဒုးန့ၣ်က့ၤ လဲးခဲးတီၣ် သုးကလၢၤအံၤအဃိ တၢ်ဒုးကဲထီၣ်လၢ လဲးခဲးတီၣ် အဃၢၢ်ကိးမုၢ်နံၤဃၣ်ဃၣ်န့ၣ် Cobra Column သုးခိၣ် ဒးဘီ စံးဝဲန့ၣ်လီၤ
“အခဲတၢ်အိၣ်သးန့ၣ်ဒ်သိးအဝဲကမၤန့ၣ်က့ၤလဲးခဲးတီၣ်အဂီၤမၤတၢ်ထီၣ်ဒုးသုးတပယူာ်ဃီလီၤ စးထီၣ်လၢပဒုးန့ၣ်အဝဲသ့ၣ်အသုးကလၢၤအံၤန့ၣ် အဝဲသ့ၣ်မၤက့ၤတၢ်ထီၣ်ဒုးကအိၣ်လၢအဘျီ၁၀လံ အဝဲသ့ၣ်သုးကျိၤကအိၣ် ၁ကျိၤ ၂ကျိၤ မီနီ တမ့ၢ်ဟဲထီၣ်ဝဲတလီၢ်ဃီဘၣ်”န့ၣ်အဝဲစံးဝဲလီၤ
ခီဖျိလၢတၢ်ဒုးကဲထီၣ်သးတဖၣ်အံၤအဃိမၠ့ၣ်တၣ်လ့မၠ့ၤ၊ကၠီးလိကၠံအဃၢၢ် တိတတါ သဝီတကပၤ လီၢ်ကဝီၤဖိ ၆၀၀ဘျဲၣ်အံၤဘၣ်ဃ့ၢ်စံၣ်အိၣ်ဝဲဆူ မၠၣ်ဝတံၣ်ဝ့ၢ်သီခါဖၠၣ်တဖၣ်အပူၤန့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲလီၤ
တကီၢ်ခါခဲအံၤ တၢ်ဒုးကဲထီၣ်ဖဲ လဲးခဲးတီၣ် အိၣ်ထီၣ်တလါဘျဲၣ်လံအဃိ ပှၤမၤစၢၤကမျၢၢ်ဃ့ၣ်တၢ်ဒုးတဖၣ်လီၤစှၤထီၣ်လံန့ၣ် ပှၤမၤစၢၤဟီၣ်ကဝီၤဃ့ၣ်တၢ်ဒုးဖိတဂၤစံးဝဲလီၤ
“ကမျၢၢ်ဃ့ၣ်တၢ်ဒုးတဖၣ်အခဲအိၣ်ဖဲသီခါဖၠၣ်တဖၣ်အပူၤလီၤ တိတတါတကပၤ မၠၣ်တၤလ့မၠၤ တကပၤသဝီတဖၣ်လီၤ ပှၤပာ်ဃါဃုာ်လိာ်သးဒီးထံဒိၣ်ပှၤဘၣ်ကီဘၣ်ခဲတဖၣ်လီၤ အဝဲသ့ၣ်ဘၣ်ဃ့ၢ်တၢ်ဒုးအိၣ်ထီၣ်တလါဘျဲၣ်လံ အခဲပှၤမၤစၢၤတၢ်လီၤစှၤလံ အသီယံၤထီၣ်လံန့ၣ် အရ့ဒိၣ်ကတၢၢ်န့ၣ်တၢ်အီၣ်တၢ်အီဒီးတၢ်အိၣ်တၢ်ဆိးအလီၢ်ပှၤကညီအါအဃိ ကတံၢ်လီၤ”န့ၣ်ပှၤမၤစၢၤကမျၢၢ်ဃ့ၣ်တၢ်ဒုးတဂၤစံးဝဲလီၤ
ကညီကီၢ်စဲၣ်ပူၤ ကီးတရံး၊မၠၣ်ဝတံၣ်၊ကၠူၤတူၤ၊ဖၣ်ပူၣ်၊သၣ်တီၣ်ကၠံဒီးနိၣ်တကီဝ့ၢ်သ့ၣ်တဖၣ်အပူၤပယီၤသုးဒီးKNLAသုးပာ်ဖှိၣ်အဘၢၣ်စၢၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီး ပယီၤသုးခးလီၤကျိဖးဒိၣ်အဃိ လီၢ်ကဝီၤကမျၢၢ်တဖၣ်ဘၣ်ဒိတပယူာ်ဃီန့ၣ် သ့ၣ်ညါဘၣ်ခီဖျိ KNLAသုးဂံၢ်ခီၣ်ထံးစံးဝဲအသိးန့ၣ်လီၤ
