ကီးတရံးဝ့ၢ်အဃၢၢ် ရွၣ်သ့းကိသဝီအဃၢၢ် တၢ်ဒုးကဲထီၣ်

လါအီကူး၁၀၊၂၀၂၃နံၣ်

ကညီကီၢ်စဲၣ် ကီးတရံးဝ့ၢ် ရွၣ်သ့းကိအဃၢၢ်ဖဲအပူၤကွံာ်လါအီကူး၉သီ မုၣ်ထူၣ်ဆၢကတီၢ် တၢ်ဒုးကဲထီၣ်ကဒီးလၢခံတဝီန့ၣ်ကီးတရံးဝ့ၢ်ဟီၣ်ကဝီၤဖိစံးဝဲန့ၣ်လီၤ

ရွၣ်သ့းကိသဝီအဃၢၢ်ဖဲအပူၤကွံာ်လါအီကူး ၈သီဟါခီ ၅နၣ်ရံၣ်ဆၢကတီၢ်ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ဒီးသိလ့ၣ်ကျဲတဖၣ်ကးတံာ်သးန့ၣ်လီၤ

ဖဲအပူၤကွံာ်လါအီကူး ၉သီ မုၣ်ထူၣ်ဆၢကတီၢ်နာ်က့ရွၣ်သ့းကိအဃၢၢ် နဂဖၠူၣ်သုးကျိၤ၊ကၠါဖၠူၣ်သုးကျိၤ၊KNLAသုးရ့ၣ်၁၈ဒီးပယီၤသုးအဘၢၣ်စၢၤတၢ်ဒုးကဲထီၣ်န့ၣ်ကီးတရံးဝ့ၢ်ဟီၣ်ကဝီၤဖိတဖၣ်စံးဝဲလီၤ

“တၢ်ဒုးကဲထီၣ်ခံဘျီလီၤ ဖဲ၁၂နၣ်ရံၣ်န့ၣ်တဘျီ လၢဟါခီန့ၣ်တဘျီ တၢ်ဒုးကဲထီၣ်ဒီးခးနါစိၤကျိဖးဒိၣ်လီၤ ပှၤလဲၤတၢ်ဖိသိလ့ၣ်တဖၣ်နာ်က့ဘၣ်ကွာ်လဲၤဝဲလီၤ”န့ၣ်ကီးတရံးဝ့ၢ်ဟီၣ်ကဝီၤဖိတဂၤစံးဝဲလီၤ

တကီၢ်ခါခဲအံၤ ကီးတရံးဝ့ၢ်အဃၢၢ်ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ ခံခီခံကပၤဒုးယၤအတၢ်ဖ့ၣ်ဆၢအိၣ်ထီၣ်ဒီး တၢ်အိၣ်သးအိၣ်လၢတၢ်ဒုးကကဲထီၣ်လၢခံတဝီအဃိ သုးပာ်ဖှိၣ်တဖၣ်ဘၣ်ဟံးန့ၣ်ဃးတၢ်လီၢ်န့ၣ် ပှၤဘၣ်မူဘၣ်ဒါလၢနဂဖၠူၣ်စံးဝဲလီၤ

“လၢ၅သီဝဲအံၤအတီၢ်ပူၤပယီၤသုးကျိၤဟဲထီၣ်လီၤ ကီးနွဲၣ်၊ကမဲၣ်ကိ၊ယါကိသဝီတကပၤအခဲအံၤ PDFဒီးသုးပၣ်ဖှိၣ်တဖၣ်ဟံးန့ၣ်ဃးတၢ်လီၢ်လံ”န့ၣ်အဝဲစံးဝဲလီၤ

ကီးတရံးကီၢ်ဆၣ်ပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးခးလီၤကျိဖးဒိၣ်အဃိ ဟီၣ်ကဝီၤကမျၢၢ်တဖၣ်ဘၣ်ဒိတပယူာ်ဃီန့ၣ်လီၤ ကညီကီၢ်စဲၣ်ပူၤ ကီးတရံး၊မၠၣ်ဝတံၣ်၊နိၣ်တကီဒီးဖၣ်ပူၣ်ဟီၣ်ကဝီၤတဖၣ်အပူၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးဟီၣ်ကဝီၤပူၤထံဒိၣ်ထီၣ်အဃိ ဟီၣ်ကဝီၤကမျၢၢ်တဖၣ်ဘၣ်သဂၢၢ်ဒီးတၢ်ကီတၢ်ခဲန့ၣ်သ့ၣ်ညါဘၣ်လၢKNLAဂံၢ်ခီၣ်ထံးတၢ်ကစီၣ်ပာ်ဖျါထီၣ်ဝဲအသိးန့ၣ်လီၤ