မၠ့းတၣ်လ့မၠၣ် ကသံၣ်ဒၢးကပၤ ပယီၤသုးတဖၣ်ခးလီၤကျိဖးဒိၣ်ဆူ လဲးခဲးတီၣ်တကပၤ

လါအီကူး ၄သီ၊၂၀၂၃နံၣ်

ကညီကီၢ်စဲၣ် မၠၣ်ဝတံၣ်ဝ့ၢ်ပူၤ ဖဲလါအီကူး ၃သီ မုၢ်နၤခီ၇နၣ်ရံၣ်တခီဃၣ်ဃၣ်အဆၢကတီၢ် ပယီၤသုးခးလီၤကျိဖးဒိၣ်ဆူ လဲးခဲးတီၣ် တကပၤန့ၣ် သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ

လၢမၠၣ်ဝတံၣ်ဝ့ၢ် လဲးခဲးတီၣ်န့ၣ် စးထီၣ်ဖဲအပူၤကွံာ်လါယူၤလံ ၉သီ ပယီၤသုးမီၤစိရိၤဒီးKNLAသုးပာ်ဖှိၣ်တဘၢၣ်စၢၤ တၢ်ဒုးကဲထီီၣ်ဝံၤ ဖဲလါယူၤလ့အသီ၁၀ KNLAဒုးန့ၣ်ဝဲ လဲးခဲးတီၣ်ဖီခိၣ် ပယီၤသုးစုဖီလာ် BGFသုးကလၢၤန့ၣ်လီၤ

တကီၢ်ခါခဲအံၤ ပယီၤသုးတဖၣ်ဂုၤကျဲးစၢးဝဲဒ်သိးကဒုးန့ၣ်က့ၤလဲးခဲးတီၣ် BGFသုးကလၢၤဒီး ခးလီၤကျိဖးဒိၣ်ဆူ လဲးခဲးတီၣ်တကပၤ တပယူၢ်ဃီန့ၣ်လီၤ

“ခးဝဲဒီးကျိဖးဒိၣ်တလီၢ်လီၢ်လီၤ စးထီၣ်လၢ ၇နၣ်ရံၣ်ဘျဲၣ်လံ တၢ်ကလုာ်န့ၣ်သီၣ်ဘူးဘူးလီၤ အိၣ်ခးလီၤဝဲလၢမၠ့းတၣ်လ့မၠ့ၣ်ကသံၣ်ဒၢကပၤဆူလဲးခဲးတီၣ်အိၣ်လီၤ”န့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲလီၤ

တၢ်ဒုးကဲထီၣ်ဝံၤအလီၢ်ခံ ပယီၤသုးခးလီၤကျိဖးဒိၣ်အဃိ မၠၣ်ဝတံၣ်ဝ့ၢ်ပူၤ မဲၣ်ကနဲၣ်၊မၠ့းတၣ်လ့မၠ့ၣ်၊ပွးလ့အ့မၠ့ၣ်၊ကၠီးလိကၠံအဃၢၢ် ဟီၣ်ကဝီၤနီၢ်ဂံၢ် ၆၀၀ဘျဲၣ် ဘၣ်ဃ့ၢ်တၢ်ဒုးန့ၣ်လီၤ

“လၢတီယးကၠိပူၤ ပှၤဃ့ၢ်တၢ်ဒုးပှဲၤကတံၢ်လၢၤလံ အခဲကအါထီၣ်လၢ ထံဒိၣ်ပှၤဘၣ်ကီဘၣ်ခဲဖိလီၤ အခဲလၢကၠိကရၢၤပူၤ ပှၤကညီကအိၣ်လၢ ၇၀၀ဘျဲၣ်လံ”န့ၣ် မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲလီၤ

တကီၢ်ခါခဲအံၤ မၠၣ်ဝဝံၣ်ဝ့ၢ်ပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီး ပယီၤသုးစုဖီလာ် BGFသုးတဖၣ်ဟံးန့ၣ်ဃးတၢ်လီၢ်ဖဲ ကၠီးလိကၠံ အလီၢ်ခံကဝီၤဒ့တနီအပူၤန့ၣ်သ့ၣ်ညါဘၣ်လၢဟီၣ်ကဝီၤဖိတဖၣ်အိၣ်န့ၣ်လီၤ

ကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊နိၣ်တကိ၊သၣ်တီၣ်ဒီးဖၣ်ပူၣ်ဝ့ၢ်သ့ၣ်တဖၣ်အပူၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးတကပၤ ခးလီၤကျိဖးဒိၣ် ၊တ့ၢ်လီၤမ့ၣ်ပိၢ်ဒီးကဘီယူၤအဃိ ဟီၣ်ကဝီၤကမျၢၢ်ဟံၣ်ဒီး တၢ်ဘူၣ်တၢ်ဘါတၢ်သူၣ်ထီၣ်တဖၣ်ဟးဂီၤအါထီၣ်န့ၣ်လီၤ