လါအီကူး ၄သီ၊၂၀၂၃နံၣ်
ကညီကီၢ်စဲၣ် ဟီၣ်ကဝီၤတနီအပူၤ တၢ်စူၤတပယူာ်ဃီဒီး ထံကျိထံထီၣ်အဃိ ထံဒိၣ်ထိၣ်န့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ
စးထီၣ်ဖဲလါယူၤလံ လၢခံကတၢၤတနွံကညီကီၢ်စဲၣ်ပူၤ ဖၣ်အၣ်၊မၠၣ်ဝတံၣ်၊နိၣ်တကီ၊လဲဘွဲ၊ကီးတရံးဒီးကၠူၤတုၤဝ့ၢ် ဟီၣ်ကဝီၤတနီအပူၤ တၢ်စူၤတပယူာ်ဃီအဃိ ထံဒိၣ်န့ၣ်ဟီၣ်ကဝီၤဖိစံးဝဲန့ၣ်လီၤ
ဖၣ်အၣ်ဝ့ၢ် ထံကျိၤနံၢ် ဖၣ်အၣ်တၢ်ကွာ်စိလီၢ် နီၢ်ဂံၢ်၂ ကဝီၤဒ့ ဆဲၣ်အ့ၣ်စုးအဃၢၢ် ထံကျိၤထံထီၣ်ဒီးတၢ်စူၤတပယူာ်ဃီအဃိ ကဝီၤဒ့ပူၤထံဒိၣ်ထီၣ်န့ၣ် ဟီၣ်ကဝီၤဖိတဂၤစံးဝဲလီၤ
“ထံဟဲထီၣ် အခဲတမ့ၢ်ထီၣ်အါအါဒံးဘၣ် လၢတၢ်လီၢ်လီၤစၢၤတကပၤန့ၣ်ဘၣ်ဒီကလဲၤအိၣ်ဝဲဖဲရွှ့ၣ်ရ့ၣ်မၠီၣ်တကပၤ အခဲ ဆဲၣ်အ့ၣ်စုး ၊ကဲတီ တကပၤမ့ဘၣ်တဲန့ၣ်နီၢ်ဂံၢ် ၂မီနီ အခဲဒုန့ၣ်အိၣ်ဒၣ်ထဲန့ၣ်ဒံးလီၤ”န့ၣ်အဝဲစံးဝဲလီၤ
မၠၣ်ဝတံၣ်ဝ့ၢ်ပူၤ တၢ်စူၤတပယူာ်ဃီဒီးဃိၣ်လိာ်ထံကျိထံထီၣ်အဃိ ဖဲလါအီကူး ၃သီ ဂီၤအဆၢကတီၢ် မၠ့ၣ်နံၣ်ကိအဃၢၢ် တုၤအ့ရှါကျဲဖီခိၣ် ထံဒိၣ်ထီၣ်ဒီး မၠၣ်ဝတံၣ်ဝ့ၢ် တၢ်လီၢ်လီၤစၢၤတဖၣ်လၢအမ့ၢ်ဝဲ နီၢ်ဂံၢ် ၁၊၂၊၄ဒီးနီၢ်ဂံၢ် ၅ကဝီၤဒ့တဖၣ်အပူၤ တုၤတနံၤအံၤ လါအီကူး၄သီ ထံဟဲဒိၣ်ထီၣ်ဒီး တဆီတလဲအလီၢ်ဒံးသနာ်က့ ဘၣ်အိၣ်ခိးကွာ်တၢ်အိၣ်သးန့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိတဂၤစံးဝဲလီၤ
တကးဒံးဘၣ် ကီးတရံးဝ့ၢ်ပူၤနာ်က့ တၢ်စူၤတပယူာ်ဃီအဃိ ကဝီၤဒ့တနီအပူၤထံဒိၣ်ထီၣ်တကးဒံးဘၣ်ကၠူၤတုၤ ဝ့ၢ်နာ်က့ထံဒိၣ်ထီၣ်အဃိ ဟီၣ်ကဝီၤကမျၢၢ်နီၢ်ဂံၢ် ၃၀၀ဃၣ်ဃၣ်ဘၣ်အိၣ်ဝဲဖဲ ကၠူၤတုၤ(အထက)ကၠိဝံၤ သဝီအဃၢၢ်တဖၣ်လၢအမ့ၢ်ဝဲ ညီၣ်ရ့းသၣ်၊သရဲးတီ၊ကါနံၣ်သဝီတဖၣ်နာ်က့ ထံဒိၣ်န့ၣ်ဟီၣ်ကဝီၤဖိတဂၤစံးဝဲလီၤ
“ထံဟဲအါထီၣ်လံ ကၠူၤတုၤ ပူၤပှၤလၢဟံၣ်လီၤဘျၢတဖၣ် ပှၤလဲၤပာ်အိၣ်အဝဲသ့ၣ်ဖဲ (အထက)ကၠူၤတုၤကၠိလီၤ ပှၤကညီနီၢ်ဂံၢ်ကအိၣ်၃၀၀ဃၣ်ဃၣ်လီၤ အခဲထံဒိၣ်လၢ ဝ့ၢ်ခိၣ် သ့ၣ်ကိထံကျိၤနံာ်၊တီၣ်ကရ့ၣ်စုး၊မၠီးကရံၣ်စုး၊စဲးပဲ၊အ့စ့ၣ်တံၣ်ကပၤ ညီၣ်ရ့းသၣ်၊သရဲးတီ၊ကဲနံၣ်ကျဲတကပၤထံတဘျၢနာ်က့ သဝီကျဲတဖၣ်ထံလုာ်ဘၢလၢၤလံ ဟံၣ်လၢလီၤဘျၢထံအိၣ်အါသနာ်က့ အိၣ်တဲမ့သ့န့ၣ်အိၣ်ဝဲဖဲဟံၣ်ပူၤလီၤ”န့ၣ်အဝဲစံးဝဲလီၤ
နိၣ်တကီဝ့ၢ် ကဝီၤဒ့ ၆ပူၤနာ်က့ ထံဒိၣ်ထီၣ်အဃိ ဟံၣ်လီၤဘျၢ၈၂ဖျၢၣ်ဒီးပှၤအိၣ်လၢကဝီၤဒ့ပူၤတဖၣ် ဘၣ်လဲၤအိၣ်ဝဲဖဲနိၣ်တကီဝ့ၢ်ဖိသၣ်ဆံးကၠိအလီၢ်ခ့တကပၤန့ၣ်ဟီၣ်ကဝီၤပိာ်မုၣ်တဂၤစံးဝဲလီၤ
လၢလဲဘွဲဝ့ၢ်ပူၤနာ်က့ တုၤတနံၤအံၤ လါအီကူး၇သီ ထံဒိၣ်ထီၣ်တပယူာ်ဃီဒီး ကဝီၤဒ့လီၤဘျၢ ၄ ဖျၢၣ်နာ်က့ (ခ)ကဝီၤဒ့ပူၤ လဲၤအိၣ်ဝဲဖဲ ကၠိဟံၣ်ဒူၣ်၃ဒူၣ်လီၤန့ၣ်ဟီၣ်ကဝီၤဖိစံးဝဲလီၤ
ဖဲအပူၤကွံာ် ၂၀၁၉ လၢဖၣ်အၣ်ဝ့ၢ်ဒီးအဃၢၢ်သဝီတဖၣ်အပူၤထံဒိၣ် ၂လါဃၣ်ဃၣ်ဒီးကညီကီၢ်စဲၣ်ပူၤ ကီၢ်ဆၣ်အါတက့ၤထံလီၤဘျၢအဃိ ဘၣ်သဂၢၢ်ဒီးတၢ်ကီတၢ်ခဲအိၣ်ထီၣ်လၢ တၢ်ဟးထီၣ်က့ၤလီၤအဂီၤန့ၣ်လီၤ
ကညီကီၢ်စဲၣ်ပူၤ တီနီၤကစၢၤထံအံၤ လီၤယွၤဝဲဆူ ဟီၣ်သရီ၊ဂၠဲ၊လဲဘွဲထံကျိသ့ၣ်တဖၣ်အပူၤဃိ ကညီကီၢ်စဲၣ်ပူၤဘၣ်သဂၢၢ်ဒီးထံဒိၣ်ကိးမုၢ်နံၣ်န့ၣ်သ့ၣ်ညါဘၣ်လၢဟီၣ်ကဝီၤဖိတဖၣ်အိၣ်န့ၣ်လီၤ
