ကီးတရံးဝ့ၢ်အဃၢၢ်သဝီတဖၣ်အပူၤ ကမျၢၢ်ဟံၣ်တဖၣ်ပယီၤသုးဆီလီၤလီၢ်ဒီးခးလီၤကျိဖးဒိၣ်

လါအီကူး ၁ သီ၊ ၂၀၂၃နံၣ်

ကညီကီၢ်စဲၣ် ကီးတရံးဝ့ၢ်အဃၢၢ် သဝီပူၤကမျၢၢ်ဟံၣ်တဖၣ်ပယီၤသုးဆီလီၤသးဒီးခးလီၤကျိဖးဒိၣ်န့ၣ်သ့ၣ်ညါဘၣ်လၢဟီၣ်ကဝီၤဖိတဖၣ်အိၣ်န့ၣ်လီၤ

ကီးတရံးဝ့ၢ်ဒီးအဃၢၢ် ပယီၤသုးမီၤစိရိၤဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးခးလီၤကျိဖးဒိၣ်ဆူသဝီပူၤန့ၣ်လီၤ

တကီၢ်ခါခဲအံၤ ပယီၤသုးတဖၣ်ဆီလီၤသးဖဲ ကမဲၣ်ကိသဝီ ကမျၢၢ်ဟံၣ်တဖၣ်ပူၤဒီး ခးလီၤကျိဖးဒိၣ်န့ၣ်ဟီၣ်ကဝီၤဖိတဖၣ်စံးဝဲလီၤ

“အဝဲသ့ၣ်န့ၣ်အိၣ်ဖဲ ကမဲၣ်ကိကၠူၢ်ခိၣ်အဃၢၢ် ကရၢၤပူၤလီၤ နီသိလ့ၣ်လၢမဲာ်ညါ လီၤခံဒီးခးဝဲဒ်န့ၣ်လီၤ မ့ၢ်တနၣ်ဝဲမ့ခးဝဲဒီး RPGန့ၣ်ကမျၢၢ်ကဘၣ်ဒိလီၤ အဝဲသ့ၣ်ကသံခီပျံၤဝဲမး ခးဝဲလၢကမျၢၢ်ဟံၣ်ပူၤလီၤ”န့ၣ်ကီးတရံးဝ့ၢ်ဟီၣ်ကဝီၤဖိတဂၤစံးဝဲလီၤ

ပယီၤသုးခးလီၤကျိဖးဒိၣ်တကးဒံးဘၣ် ကီးတရံးဝ့ၢ်အဃၢၢ်သဝီတဖၣ်အပူၤနာ်က့ ပာ်လီၤဃး သုးခူသူၣ်ဒီး မုၢ်နၤဆၢကတီၢ် ဟးသမံသမိးတၢ်ဒီးသုးသိလ့ၣ်န့ၣ်ဟီၣ်ကဝီၤဖိတဖၣ်စံးဝဲလီၤ

“ဆီလီၤဃးသုးဖိတဖၣ်ဖဲချီတီၣ် တကပၤမီ မုၢ်နၤခီန့ၣ် အဝဲသ့ၣ်သမံသမိးတၢ်လီၤ ဖဲမဟါသိလ့ၣ်ကအိၣ်လၢ၄ခိၣ်ညါ အိၣ်ဟဲလၢချီတိၣ်တကပၤ အ့ရှါကျဲတကပၤန့ၣ်လဲၤဝဲတဘူၣ်ဘၣ် ဖဲအိၣ်တနံၤအခါအိၣ်ခးလီၤဝဲလၢကမျၢၢ်ဟံၣ်န့ၣ် လီၤဖဲမီမးလၣ်ဖးထံကျးမဲာ်ညါ ကိညၣ်တဘၣ်ပှၤကညီ”န့ၣ်ဟီၣ်ကဝီၤဖိလၢတအဲၣ်ဒိးပာ်ဖျါအမံၤတဂၤစံးဝဲလီၤ

ကီးတရံးဝ့ၢ်ပူၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီး ပယီၤသုးတကပၤခးလီၤကျိဖးဒိၣ်၊ဟဲခးလီၤမ့ၣ်ပိၢ်ဒီးကဘီယူၤအဃိ လါယူၤလ့တလါအတီၤပူၤဟီၣ်ကဝီၤကမျၢၢ်ဘၣ်ဒိ၉ဂၤ၊ကမျၢၢ်တၢ်ဖိတၢ်လံၤသံ ၁၂ဒုဒီးကမျၢၢ်ဟံၣ်ဟးဂီၤအိၣ်၅ဖျၢၣ်လံန့ၣ်လီၤ