လါယူၤလံ ၂၇သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်ပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးလၢကဲထီၣ်သ့ၣ်တဖၣ်အဃိ ကမျၢၢ်ဃ့ၢ်တၢ်ဒုးနီၢ်ဂံၢ် ၆၀၀ဘျဲၣ်အံၤ ဘၣ်သဂၢၢ်ဒီးတၢ်ကီတၢ်ခဲလၢအီၣ်အီအိၣ်ဆိးအဂီၤန့ၣ် မၠၣ်ဝတံၣ်ဟီၣ်ကဝီၤဖိတဖၣ်စံးဝဲလီၤ
စးထီၣ်ဖဲအပူၤကွံာ် လါယူၤလံ ၉သီန့ၣ် တၢ်ဒုးကဲထီၣ်လၢ ပယီၤသုးဒီးKNLAသုးပာ်ဖှိၣ်တဖၣ်ဖဲ မၠၣ်ဝတံၣ်ဝ့ၢ်ကပၤ လဲးခဲးတီၣ်ဝံၤ မဲၢ်ကနဲပူၤ၊မၠ့ၣ်တၤလ့မၠဲၤ၊ပွ့းလ့အ့မၠဲၤ၊ကၠီးလိကၠံသီခါဖၠၣ်အဃၢၢ်ဟီၣ်ကဝီၤဖိ ၆၀ဘျဲၣ်အံၤ ဘၣ်လဲၤဃ့ၢ်တၢ်ဒုးဆူ မၠၣ်ဝတံၣ်ဝ့ၢ် တီယးသီခါဖၠၣ်န့ၣ်လီၤ
ခီဖျိပှၤဃ့ၢ်တၢ်ဒုးနီၢ်ဂံၢ်အါအဃိ ဘၣ်သဂၢၢ်ဒီးကအိၣ်တၢ်လီၢ်ဒီးတၢ်အီၣ်တၢ်အီတလၢတပှဲၤတၢ်ဂ့ၤကီန့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ
“အခဲပှၤကညီနီၢ်ဂံၢ်အါထီၣ်လီၤ လၢညါတီယးကၠိပူၤအိၣ် ၄၀၀ဘျဲၣ် အခဲ ၆၀၀ဘျဲၣ် တၢ်သူၣ်ထီၣ်သၢဆီပှဲၤလၢၤလံ ကအီၣ်အဂီၤန့ၣ်ပှၤဟဲမၤဘူၣ်အိၣ် တလၢအဃိသီခါဘၣ်ကွာ်ထွဲ “န့ၣ်မၠၣ်ဝတံၣ်ဟီၣ်ကဝီၤဖိတဂၤစံးဝဲလီၤ
ပှၤမၤစၢၤပှၤဃ့ၢ်တၢ်ဒုးန့ၣ်ဒၣ်ထဲ နီၢ်တဂၤတၢ်မၤစၢၤဒီးပယီၤသုးစုဖီလာ် ပၢပြးပဒိၣ်ကရူၢ်တဖၣ်န့ၣ်သ့ၣ်ညါဘၣ်န့ၣ်လီၤ
ကတီၢ်ခဲအံၤ မၠၣ်ဝတံၣ်ဝ့ၢ်အဃၢၢ်တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးတကပၤခးလီၤကျိဖးဒိၣ်ကိးမုၢ်နံၤန့ၣ်သ့ၣ်ညါဘၣ်န့ၣ်လီၤ
“ခးလီၤကျိဖးဒိၣ်ကိးမုၢ်နံၤလီၤ လၢညါခးဒၣ်ဝဲထဲ ၂၇၅တကပၤလီၤ အခဲအံၤတိတိၤနာ်က့ခးဝဲ ဖဲမဟါဂီၤခီမးန့ၣ်နၣ်ဟူဘၣ်ဒံး အခဲလဲးခဲးတီၣ်သီခါမၠ့ၣ်တၤလ့မၠ့ၤသိခါတဖၣ်နာ်က့ ဘၣ်ဃ့ၢ်ဆူတၢ်လီၢ်အဂၤလီၤ သီခါဖဲန့ၣ်ပှၤဟဲကိးအီလၢကဝီၤဒ့ပူၤပှၤဘၣ်မူဘၣ်ဒါသိလ့ၣ်တဖၣ်လီၤ လဲၤဖဲလဲၣ်န့ၣ်ဒုတသ့ၣ်ညါဘၣ်”န့ၣ်ဟီၣ်ကဝီၤဖိစံးဝဲလီၤ
တကီၢ်ခါခဲအံၤ တၢ်အိၣ်သးအိၣ်လၢတၢ်ဒုးကကဲထီၣ်ဖဲလဲးခဲးတီၣ်ဒီးပယီၤသုးမၤအါထီၣ်သုးအတၢ်ဟူးတၢ်ဂဲၤဒ်သိးကဒုးန့ၣ်က့ၤလဲးခဲးတီၣ်သုးကလၢၤန့ၣ်လီၤ
ကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊နိၣ်တကီ၊ဖၣ်ပူၣ်ဒီးသၣ်တီၣ်ဝ့ၢ်သ့ၣ်တဖၣ်အပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးတဖၣ်ခးလီၤကျိဖးဒိၣ်ဆူသဝီတဖၣ်တကပၤန့ၣ်လီၤ
