ကီးတရံးဟီၣ်ကဝီၤဖိကမျၢၢ်၂၀ဘျဲၣ်လၢဘၣ်တၢ်ဖှီၣ်ဃးတဖၣ် သၢလါဘျဲၣ်အတီၢ်ပူၤ တပျဲထံၣ်ဝဲဒီးဒူၣ်ဖိထၢဖိ

လါယူၤလံ ၂၆သီ၊၂၀၂၃နံၣ်

ကညီကီၢ်စဲၣ် ကီးတရံးဝ့ၢ်ပူၤ ဖဲအပူၤကွံာ် စးထီၣ်ဖဲလါမ့ၤ ၉သီအနံၤ တဲဝဲလၢမၤစၢၤဟီၣ်ကဝီၤဒီသဒၢသုးဒီးဖှီၣ်ဃးဟီၣ်ကဝီၤဖိ၂၀ဘျဲၣ်တပျဲထံၣ်ဝဲဒီးဒူၣ်ဖိထၢဖိန့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ

ပယီၤသုးမီၤစိရိၤလၢဆီလီၤလီၢ်ဖဲကီးတရံး ခလရ ၉၇သုး ဖဲအပူၤကွံာ်လါမ့ၤ ၈သီအနံၤKNLAသုးပာ်ဖှိၣ်တဖၣ်လဲၤခးလီၤမ့ၣ်ပိၢ်ဝံၤအလီၢ်ခံပယီၤသုးမီၤစိရိၤဖှီၣ်ဝဲဟီၣ်ကဝီၤကမျၢၢ်၄၀ဘျဲၣ်ဒီးထူၣ်ဖျဲးက့ၤဒၣ်တနီဒံးန့ၣ်လီၤ

တကီၢ်ခါခဲအံၤ ကီးတရံးပၢၤကီၢ်ဝဲၤဒၢးပူၤ တဲဝဲလၢမၤစၢၤဟီၣ်ကဝီၤကမျၢၢ်ဒီသဒၢသုးဒီးဖှီၣ်ဃးဝဲကဟီၣ်ကဝီၤဖိ၂၀ဘျဲၣ်အံၤ တုၤတၢ်ဆၢကတီၢ်လဲၤပူၤသၢလါအတီၢ်ပူၤ တပျဲထံၣ်ဝဲဒီးဒူၣ်ဖိထၢဖိန့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ

“တုၤခဲအံၤတပာ်လီၤတၢ်ဆၢတဲာ်တၢ်ကမၣ်ဒံးဘၣ် တပျဲထံၣ်ဝဲဒီးဒူၣ်ဖိထၢဖိဘၣ် ဆှၢတၢ်အီၣ်နာ်က့တန့ၣ်ဘၣ် ဖှီၣ်ဃးဝဲအိၣ်၃လါ၄လါလံ တဒုးထံၣ်ဝဲဘၣ်”န့ၣ်ဟီၣ်ကဝီၤဖိတဂၤစံးဝဲလီၤ

တကးဒံးဘၣ်ပယီၤသုးမီၤစိရိၤတဖၣ်အံၤ ဃ့စ့လၢပှၤဘၣ်တၢ်ဖှီၣ်ဃးအီတဖၣ်အိၣ်ဒီးပှၤလၢတဟ့ၣ်စ့တဖၣ်န့ၣ်ဆှၢဝဲဆူဖၣ်အၣ်ဃိၣ်ပူၤန့ၣ်သ့ၣ်ညါဘၣ်န့ၣ်လီၤ

“ဆှၢဝဲဆူတၢ်လီၢ်အဂၤလီၤ တဲဝဲမၤစၢၤတၢ်အဃိ ဃ့စ့န့ၣ်ပှၤတဟ့ၣ်အဃိ ကီာ်မ့ၤ ၅၀၅(ခ) တမ့ၢ်ဖဲကီးတရံးဘၣ် ဆှၢဝဲဆူဖၣ်အၣ်ဃိၣ်ပူၤလီၤ စးထီၣ်ဃ့ဝဲ အကလီၤ၁၀ ပှၤလူၣ်တန့ၣ်အဃိဆှၢဝဲလီၤ အဝဲပှၤချီတီၣ်”ပှၤဘူးဒီးပှၤဘၣ်တၢ်ဖှီၣ်ဃးတဂၤစံးဝဲလီၤ

ကီးတရံးဝ့ၢ်ပူၤဖဲအပူၤကွံာ် လါမ့ၤဒီးလါယူၤအတီၢ်ပူၤဟီၣ်ကဝီၤဖိ၄၀ဘျဲၣ်ဘၣ်တၢ်ဖှီၣ်ဃးအီဒီး ဆၢကတီၢ်ခဲအံၤတနီန့ၣ်ဟ့ၣ်စ့အကလီၤ၁၀၀ဘျဲၣ်ဃိထူၣ်ဖျဲးထီၣ်နာ်က့တနီဘၣ်တၢ်ဖှီၣ်ဃးအီဒံးန့ၣ်လီၤ

တကးဒံးဘၣ်ပယီၤသုးတဖၣ်အံၤဒ်သိးကန့ၣ်ဟီၣ်ကဝီၤတၢ်ဒိၣ်စိလၢကီးတရံးအဂီၤ ခးလီၤကျိဖးဒိၣ်ဆူဝ့ၢ်အဃၢၤသဝီတဖၣ်ပူၤဒီးကီးတရံးကလံၤစိးဒီးကလံၤထံးတကပၤနာ်က့တၢ်ဒုးကဲထီၣ်ကိးမုၢ်နံၤန့ၣ်လီၤ