လါယူၤလံ၂၁သီ၊၂၀၂၃နံၣ်
ကညီကီၢ်စဲၣ် ကြူၢ်တုၤကီၢ်ဆၣ် ကၠီးအဲၤ သဝီကရူၢ် ရွှ့ၣ်ဝၣ်ချီၣ်သဝီပူၤ ပယီၤသုးမီၤစိရိၤခးလီၤကျိဖးဒိၣ်အဃိ ရွှ့ၣ်ဝၣ်ချီၣ်သဝီပူၤ ဖိသၣ်ဘၣ်ဒိခံဂၤန့ၣ်ဟီၣ်ကဝီၤဖိတဖၣ်စံးဝဲန့ၣ်လီၤ
ဖဲအပူၤကွံာ် လါယူၤလံ ၂၀သီ ဂီၤ ၁၀ နၣ်ရံၣ် ၃၅ မံးနံၣ်ဃၣ်ဃၣ်ဆၢကတီၢ် ပယီၤသုးဆီလီၤလီၢ်ဖဲ မူးဒိၣ်-ခိၣ်နခွ့ၣ်တီၣ် အမတ ၃၀၃ ခးလီၤ ၁၂၀ မမ ကျိဖးဒိၣ်တဖၣ်အဃိ ရွှ့ၣ်ဝၣ်ချီၣ်သဝီပူၤ ဖိသၣ်ဘၣ်ဒိခံဂၤန့ၣ်သ့ၣ်ညါဘၣ်န့ၣ်လီၤ
“ပနၣ်ဟူကျိဖးဒိၣ်သီာ်သၢဖျၢၣ်လီၤ တဖျၢၣ်န့ၣ်ဟဲလီၤတဲာ်ဖဲသဝီပူၤ ပသ့ၣ်ညါဘၣ်လၢဖိသၣ်တဖၣ်လိၣ်ကွဲခါဘၣ်ဒိလီၤ အခဲန့ၣ်ပှၤလဲၤယါဘျါဖဲ ကြူၤတုၤတၢ်ဆါဟံၣ်လီၤ”န့ၣ်ဟီၣ်ကဝီၤဖိတဂၤစံးဝဲလီၤ
ပှၤဘၣ်ဒိခံဂၤန့ၣ်မ့ၢ်ဝဲ သးနံၣ် ၈နံၣ် မီၣ်ထိထိဒီးသးနံၣ်၆နံၣ်မီၣ်စၣ်နံၣ်လ့ တဖၣ်ဒီးဆၢကတီၢ်ခဲအံၤ ဘၣ်ယါဘျါသးန့ၣ်လီၤ
ဒ်န့ၣ်သိး ကညီကီၢ်စဲၣ် ကီးတရံးကီၢ်ဆၣ် ကၠၣ်အ့သဝီပူၤနာ်က့ ဖဲလါယူၤလံ အသီ၂၀နံၤနာ်က့ ပယီၤသုးမီၤစိရိၤခးလီၤကျိဖးဒိၣ်အဃိ ဟီၣ်ကဝီၤကမျၢၢ်ဟံၣ်တဖျၢၣ်ဘၣ်ဒိဟးဂီၤန့ၣ် ဟီၣ်ကဝီၤဖိတဖၣ်စံးဝဲန့ၣ်လီၤ
“လၢညါလံၣ်လံၣ်န့ၣ်ခးလီၤကျိဖးဒိၣ်လီၤဆူသဝီပူၤလီၤ ဖဲမဟါနာ်က့ ပှၤအိၣ်ခးလီၤဖဲလ့ၣ်ဝဟဲလီၤတဲာ် ပှၤကညီဘၣ်ဒိတအိၣ်နာ်က့ ကမျၢၢ်ဟံၣ်ဟးဂီၤတဖျၢၣ်လီၤ”န့ၣ်ကၠၣ်အ့သဝီဖိတဂၤစံးဝဲန့ၣ်လီၤ
ကညီကီၢ်စဲၣ် မၠၣ်ဝတံၣ်ဝ့ၢ်၊ကီးတရံးဒီးကြူၢ်တုၤဝ့ၢ်သ့ၣ်တဖၣ်အပူၤ စးထီၣ်ဖဲလါယူၤလံအထီၣ်န့ၣ်ပယီၤသုးမီၤစိရိၤဒီးတၢ်ပၢၢ်ဆၢသုးပာ်ဖှိၣ်တဖၣ်တဘၢၣ်စၢၤ သုးအတၢ်ဖ့ၣ်ဆၢတဖၣ်အိၣ်ဒီးပယီၤသုးခးလီၤကျိဖးဒိၣ်အဃိ ဟီၣ်ကဝီၤကမျၢၢ်တဖၣ်ဘၣ်ဒိအိၣ်န့ၣ်လီၤ
