သၣ်တီၣ်ဝ့ၢ်ပူၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးမၤအါထီၣ်သုးဂံၢ်ဘါ

လါယူၤလံ ၁၈သီ၊၂၀၂၃နံၣ်

ကညီကီၢ်စဲၣ် သၣ်တီၣ်ဝ့ၢ်ပူၤပယီၤသုးဒီးတၢ်ပၢၢ်ဆၢသုးကရူၢ်တဖၣ်အဘၢၣ်စၢၤ တၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ် ဟီၣ်ကဝီၤဖိစံးဝဲန့ၣ်လီၤ

သၣ်တီၣ်ဝ့ၢ်ပူၤ စးထီၣ်လၢလါယူၤလံအထီၣ် ပယီၤသုးဒီးတၢ်ပၢၢ်ဆၢသုးကရူၢ်တဖၣ်အဘၢၣ်စၢၤ ဒုးယၤအတၢ်ဖ့ၣ်ဆၢအိၣ်ဒီးတၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်လီၤ

ခီဖျိတၢ်ဒုးကဲထီၣ်ဒ်အံၤအဃိ ပယီၤသုးတကပၤ မၤအါထီၣ်သုးဂံၢ်ဘါလၢ လ့းသိၣ်၊ယၣ်ဒိၣ်ဒီးဘဟိသုးကလၢၢ်တဖၣ်န့ၣ် ဟီၣ်ကဝီၤဖိစံးဝဲန့ၣ်လီၤ

“တၢ်ဒုးကဲထီၣ်ကိးမုၢ်နံၤလီၤ ပနၣ်ဟူကျိဖးဒိၣ်သီၣ်လၢလ့းသိၣ်တကပၤကိးဆၢကတီၢ်လီၤ အခဲသုးဖိဟဲအါထီၣ် ၂၀၀ဃၣ်ဃၣ်လီၤ လၢလ့းသိၣ်တကပၤလီၤ လၢတၢ်လီၢ်အဂၤနာ်က့မၤပှဲၤထီၣ်သုးဂံၢ်ဘါလီၤ”န့ၣ်ဟီၣ်ကဝီၤဖိစံးန့ၣ်လီၤ

တကးဒံးဘၣ် ပယီၤသုးပာ်လီၤဃးတြဲၤဖဲ လ့းသိၣ်ဒီး သမံသမိးဃံးထီၣ်သိလ့ၣ် ဟးထီၣ်လ့ၣ်လိၣ်တဖၣ်န့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ

“သမံသမိးပှၤလဲၤဖဲန့ၣ်ကိးဂၤလီၤ တၢ်ဂ့ၢ်မ့အရ့တဒိၣ်န့ၣ်ပှၤတလဲၤဘၣ် ပှၤတီာ်ဃုနာ်က့သမံသမိးဝဲ ဃုသးပျဲတီာ်ဝဲ ၅တဲၣ်လီၤ ပှၤလဲၤပှ့ၤတၢ်ပှၤမ့ဟဲက့ၤနာ်က့သမံသမိးဝဲလီၤ”န့ၣ်ဟီၣ်ကဝီၤဖိတဂၤစံးဝဲန့ၣ်လီၤ

သၣ်တီၣ်ဝ့ၢ်ပူၤ ဖဲအပူၤကွံာ် လါယူၤလံအသီ ၁၀ အနံၤ တၢ်ဒုးကဲထီၣ်လၢ ပယီၤသုးဒီးတၢ်ပၢၢ်ဆၢသုးကရူၢ်တဖၣ်အဘၢၣ်စၢၤ ဒီးပယီၤသုးဟဲခးလီၤတၢ်ဒီးကဘီယူၤအဃိ ဟီၣ်ကဝီၤကမျၢၢ် ၂၀၀၀ဘျဲၣ်ဘၣ်ဃ့ၣ်တၢ်ဒုးဝံၤ ခီဖျိပယီၤသုးပာ်ပနီၤဃး တၢ်တီာ်ဃုသးအဃိ ကမျၢၢ်ဃ့တၢ်ဒုးတဖၣ်ဘၣ်သဂၢၢ်ဒီးတၢ်ကီတၢ်ခဲလၢ တၢ်အီၣ်တၢ်အီအဂီၤန့ၣ် သ့ၣ်ညါဘၣ်န့ၣ်လီၤ

တကးဒံးဘၣ် သၣ်တီၣ်ဝ့ၢ်ပူၤ ဖဲအပူၤကွံာ်လါ February အလၢၤ ပယီၤသုးဒီးတၢ်ပၢၢ်ဆၢသုးကရူၢ်တဖၣ်အဘၢၣ်စၢၤဒုးယၤအတၢ်ဖ့ၣ်ဆၢအိၣ်ဒီး သၣ်တီၣ်ဝ့ၢ်ပူၤဟီၣ်ကဝီၤကမျၢၢ် ၃၀၀၀ဘျဲၣ်အံၤ ဘၣ်လဲၤဃ့ၣ်စံၣ်အိၣ်ဆူ တီအူတကပၤန့ၣ်အိၣ် ၄လါဘျဲၣ်လံန့ၣ်လီၤ

တကီၢ်ခါခဲအံၤကညီကီၢ်စဲၣ်ပူၤ သၣ်တီၣ်ဝ့ၢ်တကးဒံးဘၣ် မၠၣ်ဝတံၣ်၊ကီးတရံး၊ဖၣ်ပူၣ်၊နိၣ်တကီဝ့သ့ၣ်တဖၣ်အပူၤ ခီဖျိဟီၣ်ကဝီၤတၢ်ပၢၢ်ဆၢသုးကရူၢ်တဖၣ် မၤအါထီၣ်တၢ်ထီၣ်ဒုးသုးတဖၣ်အဃိ တၢ်ဒုးဆူၣ်ထီၣ်တကးဒံးဘၣ် တၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်လီၤ