လါယူၤလံ ၅သီ၊၂၀၂၃နံၣ်
တလၢၤကီၢ်ဆဲၣ် ရ့ကီၢ်ဆၣ်ကလံၤထံးတကပၤ တၢ်ဒုးကဲထီၣ်တပယူၤဃီအဃိ ဟီၣ်ကဝီၤကမျၢၢ်တဖၣ်ဘၣ်ပာ်တ့ၢ်တၢ်အိၣ်တၢ်ဆိးလီၢ်ဒီးဃ့ၣ်တၢ်ဒုးန့ၣ်သ့ၣ်ညါဘၣ်န့ၣ်လီၤ
ရ့ကီၢ်ဆၣ်ကလံၤထံးတကပၤ ဖဲအပူၤကွံၤလါယူၤအတီၢ်ပူၤပယီၤသုးဒီးဟီၣ်ကဝီၤကမျၢၢ်ဒီသဒၢသုးကရူၤကရၢအဘၢၢ်စၢၤတၢ်ဒုးကဲထီၣ် တဆှၤန့ၣ်၆ဝီဒီးပယီၤသုးတကပၤခးလီၤကျိဖးဒိၣ်န့ၣ်လီၤ
ခီဖျိလၢပယီၤသုးခးလီၤကျိဖးဒိၣ်အဃိ ရ့ကီၢ်ဆၣ်၊လမဲကီၢ်ဆၣ်၊ခီစၤကီၢ်ဆၣ်ဒီးနံးကရ့ၣ်သဝီပူၤဟီၣ်ကဝီၤကမျၢၢ်တနီ ဘၣ်ဃ့ၣ်စံၣ်အိၣ်ဆူ မီၣ်လမၠ့ၣ်ဒီးမူးဒိၣ်ကီၢ်ဆၣ်တကပၤန့ၣ် ဟီၣ်ကဝီၤဖိတဖၣ်တဲဝဲန့ၣ်လီၤ
“နံးကရံၣ်သဝီပူၤ ဟီၣ်ကဝီၤဖိတဖၣ်သုးက့ၤအလီၢ်လီၤပယီၤသုးမ့ၢ်ခးန့ၣ်ခးလီၤဝဲဆူ သဝီပူၤ၊ဝ့ၢ်ပူၤ၊ခးလီၤဝဲလၢကမျၢၢ်ကျါလီၤ ဒ်သိးကပၢၤဃးဝဲကမျၢၢ်ကန့ၣ်အဂီၤမၤဝဲဒ်အံၤလီၤ”န့ၣ်ဟီၣ်ကဝီၤဖိတဂၤတဲဝဲန့ၣ်လီၤ
ကတီၢ်ခဲအံၤ ရ့ကီၢ်ဆၣ်ကလံၤထံးတကပၤ တၢ်ဒုးသဟီၣ်ဆူၣ်ထီၣ်တကးဒံးဘၣ် ပယီၤသုးစုဖီလာ်ရူတဖၣ်ဘၣ်တၢ်နုာ်လီၤခးအီခီဖျိတၢ်ပၢၤဆၢသုးပာ်ဖှိၣ်တဖၣ်အဃိ ရူတဖၣ်ဘၣ်တၢ်ကးတံၢ်ဃးန့ၣ်လီၤ
ဘၣ်ဃးဒီးပယီၤသုးရူတဖၣ်ဘၣ်တၢ်နုာ်လီၤခးအံၤမ့ၢ်တၢ်ပနီၤတခါလၢပယီၤသုးဟံးန့ၣ်တၢ်ဘံၣ်တၢ်ဘၢတန့ၣ်လၢၤဘၣ်န့ၣ်ရ့ကီၢ်ဆၣ် ကမျၢၢ်ဒီသဒၢသုးကရူၤကရၢသုးခၢၢ်စးဖုရ့ၣ်နဲၣ်တဲန့ၣ်လီၤ
“အဝဲသ့ၣ်ရူဘၣ်တၢ်ကးတံၢ်ဃးအံၤခီဖျိလၢအဝဲသ့ၣ်ဟံးန့ၣ်တၢ်ဘံၣ်တၢ်ဘၢလၢအဝဲသ့ၣ်ပှၤမၤတၢ်ဖိတဖၣ်အဃိလီၤ အဒိနံးကရ့ၣ်ပၢၤကီၢ်ဝဲၤလီၢ်အံၤဘၣ်ပျၤဒၣ်ဝဲဒ်န့ၣ်လီၤ လမဲပၢၤကီၢ်ဝဲၤလီၢ်နာ်က့ အဝဲသ့ၣ်အိၣ်ဒၣ်ဝဲမုၢ်ဆါခီလီၤ မုၢ်နၤတအိၣ်ဘၣ်ပၢၤကီၢ်ဝဲၤလီၢ်ပူၤအိၣ်ဒၣ်သုးဖိလီၤ မုၢ်နၤခီအဝဲသ့ၣ်အိၣ်ဖဲ ၁၀၆၊၃၁၇ကျိဖးဒိၣ်လုၣ်လီၤ တၢ်အံၤမ့ၢ်တၢ်အၢၣ်လီၤတခါလၢအဝဲသ့ၣ်ဟံးန့ၣ်ထံကီၢ်စိကမီၣ်တန့ၣ်ဘၣ်န့ၣ်လီၤ”အဝဲတဲလီၤ
ခီဖျိလၢပယီၤသုးစုဖီလာ်ရူတဖၣ်ဘၣ်တၢ်ကးတံၢ်အဃိ ရ့ကီၢ်ဆၣ်ပူၤပယီၤသုး သုးအတၢ်ပၢတၢ်ပြးတၢ်ရဲၤတၢ်ကျဲၤဘူးလၢကပတုၤန့ၣ် ဘိၣ်ရဲၣ်နဲၣ် တဲအါထီၣ်ဝဲန့ၣ်လီၤ
တကီၢ်ခါခဲအံၤ ရ့ကီၢ်ဆၣ်ပူၤ ပယီၤသုးဒိီး တၢ်ပၢၢ်ဆၢသုးပာ်ဖှိၣ်တဖၣ်အဘၢၢ်စၢၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီး ဖဲအပူၤကွံၤလါယူၤ ၂၅ သီအနံၤနာ်က့ ပယီၤသုးခးလီၤကျိဖးဒိၣ်အဃိ နံးကရ့ၣ်သဝီပူၤဟီၣ်ကဝီၤဖိဘၣ်ဒိ၅ဂၤဒီးဟံၣ်ဘၣ်ဒိဟးဂီၤ၅ဖျၢၣ်န့ၣ်လီၤ
