လါယူၤ ၂၉သီ ၊၂၀၂၃နံၣ်
ကညီကီၢ်စဲၣ် ဖၣ်အၣ်ဝ့ၢ်ပူၤ ပယီၤသုးတဖၣ်ဖှီၣ်ဝဲ သိလ့ၣ်လၢလံာ်အုၣ်သးတအိၣ်တဖၣ်ကိးမုၢ်နံၤအဃိ ဟီၣ်ကဝီၤဖိတဖၣ် ကဟးဖံးဟးမၤအဂီၤတၢ်ကီတၢ်ခဲအိၣ်ထီၣ်န့ၣ် ဖၣ်အၣ်ဝ့ၢ်ဟီၣ်ကဝီၤဖိတဖၣ်တဲဝဲလီၤ
ပယီၤသုးတဖၣ်အံၤ စးထီၣ်ဖဲလါယူၤ ၁သီန့ၣ်ဖှီၣ်ဝဲသိလ့ၣ်လၢလံာ်အုၣ်သးတအိၣ်တဖၣ်ကိးမုၢ်နံၤဒီးဆၢကတီၢ်ခဲအံၤ သိလ့ၣ်လၢလံာ်အုၣ်သးတအိၣ်ဘၣ်တၢ်ဖှီၣ်ဃးအိၣ်လံ အခိၣ် ၁၅၀ဘျဲၣ်ဒီးပာ်ဝဲဖဲ ဖၣ်အၣ်ဝ့ၢ်ပၢၤကီၢ်ဝဲၤလီၢ်န့ၣ်လီၤ
ခိဖျိလၢဖှီၣ်ဝဲသိလ့ၣ်လၢလံာ်အုၣ်သးတအိၣ်တဖၣ်ဒ်အံၤအဃိ ဟီၣ်ကဝီၤဖိတဖၣ်ကဟးထီၣ်က့ၤလီၤဒီးကိးမုၢ်နံၤတၢ်မၤအီၣ်မၤအီအဂီၤ ဘၣ်သဂၢၢ်ဒီးတၢ်ကီတၢ်ခဲန့ၣ်လီၤ
“ဖှီၣ်ဝဲကိးမုၢ်နံၤလီၤ သိလ့ၣ်လၢကျဲကပၤတဖၣ်နာ်က့ဖှီၣ်ဝဲ ခီဖျိလၢအဝဲသ့ၣ်ဟးဝ့ၤဝီၤကိးဆၢကတီၢ်အဃိ ပဘၣ်ပာ်သူၣ်ပာ်သးလဲၤက့ၤလီၤ မ့တၢ်ဂ့ၢ်အရ့တဒိၣ်န့ၣ်ပတဟးထီၣ်တၢ်ချၢဘၣ် ပလဲၤပှ့ၤတၢ်ဂီၤဂီၤလီၤ ဖှီၣ်ဝဲဒ်အံၤအဃိ ပဟးထီၣ်လ့ၣ်လိၣ်ကီခဲလီၤ”န့ၣ်ဖၣ်အၣ်ဝ့ၢ်ဟီၣ်ကဝီၤဖိတဲန့ၣ်လီၤ
လၢညါသိလ့ၣ်လၢလံာ်အုၣ်သးတအိၣ်တဖၣ်မ့ၢ်ဖှီၣ်ဝဲန့ၣ် ဘၣ်ဟ့ၣ်စ့အီၣ်လိး ၁၀၀၀၀၀လီၤ ကတီၢ်ခဲအံၤဟံးန့ၣ်သိလ့ၣ်တကးဒံးဘၣ် သိလ့ၣ်ယီၢ်တခိၣ်န့ၣ် ဘၣ်ဟ့ၣ်ဝဲစ့သၢကလးန့ၣ်ဖၣ်အၣ်ဝ့ၢ်ဟီၣ်ကဝီၤဖိတဲန့ၣ်လီၤ
“လၢညါမ့ၢ်ဖှီၣ်သိလ့ၣ်နာ်က့ ပမ့ၢ်ဟ့ၣ်စ့ တကလးန့ၣ်ဟ့ၣ်ကဒါက့ၤပှၤသိလ့ၣ်လီၤ အခဲဟံးန့ၣ်သိလ့ၣ်တဘျီဃီလီၤ ပလဲၤမၤပျီက့ၤတန့ၣ်ဘၣ် ပနၣ်ဟူပှၤနီသိလ့ၣ်န့ၣ်ကထၢနုာ်ဝဲဆူဃိၣ်ပူၤလီၤ အခဲအံၤန့ၣ်ပတထံၣ်ထၢနုာ်ဝဲဒံးဘၣ် သိလ့ၣ်ယီၢ်န့ၣ်ဃ့ဝဲစ့သၢကလးလီၤ သိလ့ၣ်ယီၢ်န့ၣ်သမံသမိးဝဲတခါဘၣ်တခါလီၤ အခဲဟးဝ့ၤဝီၤဖှီၣ်ဝဲဝ့ၢ်ဒီတဖျၢၣ်လီၤ မ့ၢ်ထံၣ်န့ၣ်ဖှီၣ်လီၤ ပပာ်သိလ့ၣ်လၢဟံၣ်တဘူၣ်လၢၤအဃိ ပဘၣ်လဲၤပာ်လၢဝ့ၢ်ချၢလီၤ “န့ၣ်အဝဲတဲလီၤ
ပယီၤသုးတဖၣ်ဘိးဘၣ်ရၤလီၤဃးဝဲလၢကဖှီၣ်သိလ့ၣ်လၢလံာ်အုၣ်သးတအိၣ်တဖၣ်လၢ မၠၣ်ဝတံၣ်၊ကီးတရံး၊ဃိၣ်သၢဖျၢၣ်ဝ့ၢ်တဖၣ်အပူၤနာ်က့ ဆၢကတီၢ်ခဲအံၤန့ၣ်သမံသမိးဖှီၣ်ဝဲဒံးဒၣ်ဖဲဖၣ်အၣ်ဝ့ၢ်ပူၤန့ၣ်လီၤ
တကးဒံးဘၣ် ပယီၤသုးတဖၣ်အံၤဖှီၣ်ဒၣ်ဝဲဖၣ်အၣ်ဝ့ၢ်ဟီၣ်ကဝီၤဖိတဖၣ်အသိလ့ၣ်ဒီး ဖၣ်အၣ်ဝ့ၢ်ပူၤ မဘသသီခါသိလ့ၣ်တဖၣ်၊ပယီၤသုးစုဖီလာ်ရူပှၤမၤတၢ်ဖိသိလ့ၣ်တဖၣ်ခီတဖှီၣ်ဟံးန့ၣ်ဝဲအရ့ဘၣ်န့ၣ်သ့ၣ်ညါဘၣ်လၢဖၣ်အၣ်ဝ့ၢ်ဟီၣ်ကဝီၤဖိအိၣ်လီၤ
