လါယူၤ ၂၈ သီ ၊၂၀၂၃နံၣ်
ကညီကီၢ်စဲၣ် သ့ၣ်တီၢ်ဝ့ၢ် တီအူ-လ့းသိၣ် သိလ့ၣ်ကျဲဖီခိၣ် ပယီၤသုးဆီလီၤတြဲၤဒီး ဃ့စ့အါအါဂီၢ်ဂီၢ်န့ၣ် ဟီၣ်ကဝီၤဖိတဲအသိးသ့ၣ်ညါဘၣ်န့ၣ်လီၤ
ပယီၤသုးစုဖီလာ် ၆၀၃သုးဒီး ကမျၢၢ်သုးကၠီၤဝ့ၤ စုဖီလာ်သုးတဖၣ်ပာ်ဖှိၣ်ထီၣ်သးဒီး ဆီလီၤတြဲၤဖဲ တိအူ-လ့းသိၣ်ကျဲဒီး ဃ့စ့တကးဒံးဘၣ် ကိးဃါဆိၣ်အၢဆိၣ်သီဝဲပှၤနီသိလ့ၣ်ဖိတဖၣ်န့ၣ်သ့ၣ်ညါဘၣ်လၢပှၤနီသိလ့ၣ်တဖၣ်အိၣ်န့ၣ်လီၤ
“ဃ့ဝဲစ့ သိလ့ၣ်တခိၣ်န့ၣ်စးထီၣ်လၢ ၅၀၀၀ဒီး သိလ့ၣ်ဖီခိၣ်တၢ်ဖိတၢ်လံၤမ့ၢ်အါန့ၣ်ဃ့စ့အါလီၤ အဝဲသ့ၣ်အိၣ်ခိးတြဲၤတဖၣ်အသီအိၣ်အလီၢ်လံ အိၣ်လီၤ လ့းသိၣ်ဟးထီၣ်လီၢ်ဒီးထိဘိၣ်ကၠံစခ့န့ၣ်တၢ်သမံသမိးဃံးလီၤ ပှၤနီသိလ့ၣ်တဖၣ်ဘၣ်တၢ်ဆိၣ်အၢဆိၣ်သီလီၤ”န့ၣ်ပှၤနီသိလ့ၣ်ဖိတဂၤတဲဝဲန့ၣ်လီၤ
တကးဒံးဘၣ် ပယီၤသုးတဖၣ်အံၤ စးထီၣ်ဖဲ လါမးရှး ၂၇ သီန့ၣ် ပာ်ပနီၤဃးဝဲ ဃု၊သိ၊ကသံၣ်ကသီဒီးတၢ်ပီးတၢ်လီဖဲ တီအူ -လ့းသိၣ်ကျဲ ဒီး မ့ၢ်တီၢ်ဝဲအါန့ၣ် ဃုသးတဲၤ ၁၀ ဘျဲၣ်န့ၣ် ဃ့စ့ဖဲပှၤဘၣ်ပှ့ၤဃုအသိးန့ၣ်လီၤ
“ဃုသးတဲၤန့ၣ်ပတီၢ်န့ၣ်ဒၣ် တဲၤ ၁၀ လီၤ တဲၤတဖျၢၣ်န့ၣ်ဘၣ်ဟ့ၣ်ဝဲ ၄၅၀၀ဘးလီၤ မ့ၢ်အါန့ၣ်အတဲၤ ၁၀ န့ၣ် ပယီၤသုးဟံးန့ၣ်လီၤ ဘၣ်ဟံးန့ၣ်လံာ်အုၣ်သးဖဲ ကီၢ်ဆၤပၢပြးရူဒီး မ့ၢ်အါန့ၣ်အတဲၤ ၁၀ န့ၣ် ဘၣ်တၢ်ဟံးန့ၣ်လီၤ ပမ့ၢ်လီကီက့ၤ ဃုသးတဲၤန့ၣ် ဘၣ်ဟ့ၣ် စ့ဖဲပပှ့ၤဃုသးပှ့ၤန့ၣ်လီၤ”န့ၣ်ဟီၣ်ကဝီၤဖိတဲန့ၣ်လီၤ
ခီဖျိလၢပယီၤသုးပာ်ပနီၤဃး တၢ်တီၢ်ဃုသးအဃိ တီအူဝ့ၢ်ဒီးလ့းသိၣ်ဝ့ၢ်န့ၣ် ဃုသးပှ့ၤထီၣ်န့ၣ် တီအူဝ့ၢ်ဟီၣ်ကဝီၤဖိတဖၣ်တဲန့ၣ်လီၤ
“လၢညါဃုသးတတဲၤန့ၣ် ၅၀၀၀၀ဘျဲၣ်အခဲကဲထီၣ် ၆၇၀၀၀လီၤဃုသးအဂ့ၤတဖၣ်န့ၣ် အခဲအပှ့ၤအိၣ်ဖဲ ၇၂၀၀၀တုၤ ၈၀၀၀၀ဘးလီၤ ဃုသး(ရိုးရိုး)န့ၣ် ကတီၢ်ခဲအံၤ အပှ့ၤထီၣ်တုၤ ၂၂၀၀၀ ဘးလီၤ”န့ၣ် တီအူဝ့ၢ်ဟီၣ်ကဝီၤဖိတဲဝဲန့ၣ်လီၤ
တကီၢ်ခါခဲအံၤ တီအူဝ့ၢ်ဒီးအဃၢၢ် ပယီၤသုးဒီး KNLAသုးပာ်ဖှိၣ်တဖၣ်အဘၢၢ်စၢၤသုးတၢ်ဖ့ၣ်ဆၢအိၣ်ဒီး ဖဲလါယူၤ ၁၇သီ နံၤနာ်က့ ပယီၤသုး မံးလၣ် ၁၆သုးခးလီၤကျိဖးဒိၣ်အဃိ ချီနှခွးသဝီပူၤ ကမျၢၢ်ပိၣ်မုၣ်သံတဂၤဒီး ပိၣ်ခွါဘၣ်ဒိနးနးကျံၤကျံၤတဂၤန့ၣ်လီၤ
