လါယူၤ ၁၉သီ၊၂၀၂၃နံၣ်
ကညီကီၢ်စဲၣ် ကီးတရံးဝ့ၢ်ပူၤ ပှၤဘၣ်တၢ်ဖှီၣ်ဃးဖဲအပူၤကွံၤလါမ့ၤအတီၤပူၤတဖၣ် တုၤခဲအံၤတထံၣ်ဘၣ်ဒီးဒူၣ်ဖိထၢဖိန့ၣ်သ့ၣ်ညါဘၣ်လၢကီးတရံးဝ့ၢ်ဟီၣ်ကဝီၤဖိတဖၣ်အိၣ်န့ၣ်လီၤ
ကီးတရံးဝ့ၢ်ပူၤ ဖဲအပူၤကွံၤ လါမ့ၤ ၈သီ KNLAသုးပာ်ဖှိၣ်တဖၣ်နုာ်လီၤခးဝဲပယီၤသုးခလရ၉၇ဝံၤအလီၢ်ခံ ပယီၤသုးဖှီၣ်ဃးဟီၣ်ကဝီၤဖိ၄၀ဘျဲၣ်ဒီးကတီၢ်ခဲအံၤနာ်က့ ပှၤဟဲက့ၤထူၣ်ဖျဲးထီၣ်အိၣ်ဒၣ်တနီဒံးန့ၣ်လီၤ
တကီၢ်ခါခဲအံၤကီးတရံးဝ့ၢ်ပၢၤကီၢ်ဝဲၢ်လီၢ်ပူၤပှၤဘၣ်တၢ်ဖှီၣ်ဃးအိၣ်အဂၤ၂၀ဘျဲၣ်ဒီးတုၤခဲအံၤတထံၣ်ဘၣ်ဒီးဒူၣ်ဖိထၢဖိန့ၣ်ကီးတရံးဝ့ၢ်ဟီၣ်ကဝီၤဖိတဲဝဲန့ၣ်လီၤ
“ပှၤဘၣ်တၢ်ဖှီၣ်ဃးအိၣ်တလါဃၣ်ဃၣ်လံ တုၤခဲအံၤတပျဲဝဲဒံးဘၣ် ဖှီၣ်အါထီၣ်ဝဲန့ၣ်ဒူပတနၣ်ဟူဘၣ် တထံၣ်ဘၣ်ဒီးဒူၣ်ဖိထၢဖိဘၣ် ဆၢကတီၢ်ခဲအံၤပနၣ်ဟူဘၣ်ကျိဖးဒိၣ်အကလုာ်သီၣ်တဘီတဘီလီၤ”န့ၣ်ကီးတရံးဝ့ၢ်ဟီၣ်ကဝီၤဖိတဂၤတဲဝဲလီၤ
တကးဒံးဘၣ်ပှၤလၢဘၣ်တၢ်ဖှီၣ်ဃးဒီးထူၣ်ဖျဲးထီၣ်တဖၣ်အံၤ ဘၣ်ဟ့ၣ်ဝဲပယီၤသုးစ့အကလီၣ်၁၀၀ဘျဲၣ်ဝံၤမးထူၣ်ဖျဲးထီၣ်န့ၣ်ကီးတရံးဝ့ၢ်ဟီၣ်ကဝီၤဖိတဲဝဲန့ၣ်လီၤ
“ယသ့ၣ်ညါနီတဂၤထူၣ်ဖျဲးထီၣ်တယံၤဒံးဘၣ် ဘၣ်ဟ့ၣ်ပယီၤသုးစ့အကလီၣ်၁၀၀ဘျဲၣ်ဝံၤမးထူၣ်ဖျဲးထီၣ်န့ၣ်လီၤ မၤဝဲဒ်လဲၣ်ဒူတသ့ၣ်ညါဘၣ် အခဲနာ်က့ပှၤအိၣ်ခိးကွာ်အဝဲလီၤ”န့ၣ်ကီးတရံးဝ့ၢ်ဟီၣ်ကဝီၤဖိတဲဝဲန့ၣ်လီၤ
ဆၢကတီၢ်ခဲအံၤ ပယီၤသုးတဖၣ်အိၣ်ခိးကွာ်ဝဲဒီးသမံသမိးဝဲပှၤအိၣ်လၢကီးတရံးဝ့ၢ်ပူၤတဖၣ်ခီဖျိထံရူၤကီၢ်သဲးတၢ်အိၣ်သးအဃိန့ၣ်သ့ၣ်ညါဘၣ်န့ၣ်လီၤ
