လါယူၤ ၁၇သီ ၊၂၀၂၃နံၣ်
ကညီကီၢ်စဲၣ် သၣ်တီၣ်ကီၢ်ဆၤ သၣ်တီၣ်ဘီကလံး၁၆မံးလၣ်ပူၤ တနံၤအံၤ လါယူၤ ၁၇သီ ဂီၤ ၈နၣ်ရံၣ်ဃၣ်ဃၣ်ဆၢကတီၢ် ပယီၤသုးဒီးဟီၣ်ကဝီၤဒီသဒၢသုးတဖၣ်အဘၢၢ်စၢၢ်တၢ်ဒုးကဲထီၣ်န့ၣ်သ့ၣ်ညါဘၣ်လၢ ဟီၣ်ကဝီၤဖိတဖၣ်အိၣ်န့ၣ်လီၤ
ခံကပၤခးလိၣ်သးဝံၤအလီၢ်ခံ ပယီၤသုးတကပၤ ခးလိၤကျိဖးဒိၣ်ဆူ ချီနခွး သဝီပူၤဒီးလီၤတဲၤပိၣ်ဖးထီၣ်လၢဟံၣ်တဖျၢၣ်အဖီခိၣ်ဝံၤ ပိၣ်မုၣ်သံတဂၤဒီး ပိၣ်ခွါဘၣ်ဒိတဂၤန့ၣ် ဟီၣ်ကဝီၤဖိတဂၤတဲဝဲန့ၣ်လီၤ
“တဂီၤအံၤတၢ်ဒုးကဲထီၣ်ခံခီခံကပၤဒီးတၢ်အိၣ်သးန့ၣ်တသ့ၣ်ညါဘၣ်ဒံးဘၣ် ကဲထီၣ်သးန့ၣ်ချီနခွးပယီၤသုးခးလီၤကျိဖးဒိၣ်ဆူသဝီပူၤ ဖံသးပှၢ်တဂၤဘၣ်ဖဲအခိၣ်ဒီးသံတဘျီဃီလီၤ”န့ၣ်အဝဲတဲန့ၣ်လီၤ
ပိၣ်မုၣ်သံတဂၤအံၤသးနံၣ်အိၣ်၆၀ဃၣ်ဃၣ်အမံၤမ့ၢ်ဝဲ နီၢ်ယွၤဟဲဂ့ၤဒီး ကျိဖးဒိၣ်အက့ဘၣ်ဖဲအခိၣ်ဒီးသံဖဲအလီၢ်တဘျီဃီန့ၣ်လီၤ အမၣ်စီၤကလုာ်ထူနာ်က့ ကျိဖးဒိၣ်အက့လီၤတဲၤဘၣ်အဃိ ဘၣ်ဒိဒီးဘၣ်လဲၤယါဘျါအသးလၢတီအူတၢ်ဆါဟံၣ်န့ၣ်သ့ၣ်ညါဘၣ်န့ၣ်လီၤ
ကတီၢ်ခဲအံၤ စးထီၣ်လၢ၂၀၂၃ လါအ့ဖြ့ၤ တုၤလါယူၤခံနွံတနွံအတီၢ်ပူၤပယီၤသုးတကပၤခးလီၤကျီဖးဒိၣ်တကးဒံးဘၣ် ခးလီၤတၢ်ဒီးကဘီယူၤအဃိ သီခါတပါဒီးကမျၢၢ်သံ၉ဂၤဒီးဘၣ်ဒိ ၁၇ဂၤန့ၣ် သ့ၣ်ညါဘၣ်ခီဖျိ ဒူပလၣ်ယၣ်ကီၢ်ရ့ၤထုးထီၣ်တၢ်ကစီၤတဖၣ်အသိးန့ၣ်လီၤ
