လါယူၤ ၁၆သီ၊၂၀၂၃နံၣ်
တလၢၤကီၢ်စဲၣ် ရ့ကီၢ်ဆၤပူၤ မုၢ်နၤတဘၣ်ဟးထီၣ်(Martial Law)ဝံၤအလီၢ်ခံ ပှၤဟုၣ်ဘျၣ်တၢ်အါထီၣ်န့ၣ် ရ့ဟီၣ်ကဝီၤဖိတဲဝဲန့ၣ်လီၤ
ရ့ကီၢ်ဆၤပူၤ ပှၤထုးထီၣ်မုၢ်နၤတဘၣ်ဟးထီၣ်တၢ်ကလုာ်လၢ ဟါ၆နၣ်ရံၣ်တုၤဂီၤ၆နၣ်ရံၣ်ယံၤထီၣ်တနံၣ်ဘျဲၣ်ဒီး ကတီၢ်ခဲအံၤ တၢ်ဟုၣ်ဘျၣ်တၢ်တဖၣ်ကဲထီၣ်ကိးမုၢ်နၤဃၣ်ဃၣ်န့ၣ်ဟီၣ်ကဝီၤဖိတဲဝဲန့ၣ်လီၤ
“ပှၤအီဟုၣ်တၢ်နၣ်ဟူဘၣ်ကိးနံၤဒဲးလီၤ အခဲလၢရ့ဝ့ၢ်ပူၤဘၣ်တၢ်ထုးထီၣ်မုၢ်နၤတဘၣ်ဟးထီၣ်တၢ်ကလုာ်အိၣ် ၁နံၣ်ဃၣ်ဃၣ်လံ ပှၤဘၣ်တၢ်အီဟုၣ်တုၤလၢဟံၣ်ပူၤန့ၣ်စးထီၣ်လၢ လါမ့ၤလီၤ အခဲအသီအတီၢ်ပူၤနၣ်ဟူဘၣ်ဟံၣ်တဖၣ်ဘၣ်တၢ်ဟုၣ်လီၤ တၢ်ကဲထီၣ်သးဒ်န့ၣ်အဃိပဘၣ်ပာ်သူၣ်ပာ်သးလီၤ ပမံဒ်သိးလၢညါတန့ၣ်ဘၣ် ပဘၣ်ယိၤပဟံၣ်တၢ်ပီးတၢ်လီတဖၣ်ပှၤကဟုၣ်အဃိ”န့ၣ်ရ့ဝ့ၢ်ဟီၣ်ကဝီၤဖိတဂၤတဲလီၤ
တၢ်ကဲထီၣ်သးဒ်အံၤလၢရ့ဝ့ၢ်ပူၤနာ်က့ ရ့ပၢၤကီၢ်တဖၣ်တဟံးန့ၣ်မူဒါတမၤန့ၣ်ဝဲတၢ်နီတမံၤန့ၣ်ဟီၣ်ကဝီၤဖိတဖၣ်တဲလီၤ
“ဘၣ်တၢ်ဟုၣ်နံၤနၤလီၤ ပၢၤကီၢ်တမၤန့တၢ်နီတမံၤဘၣ် ပမ့ၢ်လဲၤတဲဘၣ်လၢပၢၤကီၢ်ဝဲၢ်လီၢ်န့ၣ်တဲက့ၤပှၤဖှီၣ်ပှၤဟုၣ်တၢ်ဖိဒီးဟဲ”န့ၣ်ရ့ဟီၣ်ကဝီၤဖိတဂၤတဲန့ၣ်လီၤ
ခိဖျိလၢရ့ဝ့ၢ်ပူၤတၢ်ကဲထီၣ်သးဒ်အံၤအဖီခိၣ်ပယီၤသုးစုဖီလာ်ပၢၤကီၢ်တဖၣ်တဟံးန့ၣ်မူဒါတမၤန့ၣ်ဝဲတၢ်နီတမံၤအဃိ တၢ်ဒူၣ်ဒွဲၣ်တဖၣ်သီၣ်ထီၣ်န့ၣ်လီၤ
တကီၢ်ခါခဲအံၤ ရ့ဝ့ၢ်ပူၤ လါယူၤတလါအတီၢ်ပူၤ တၢ်ဟုၣ်တၢ်မူးတၢ်ရၤအိၣ်အခါ၁၀ဘျဲၣ်ဒီးတနံၤညါဂီၤအဆၢကတီၢ်နာ်က့ ရ့ဝ့ၢ်ခိၣ် ရ့ၣ်ကၠံအီၣ် ကဝီၤဒ့ပူၤ ပှၤဟုၣ်စ့ အကလီၣ် ၆၀၀ဘျဲၣ်န့ၣ်သ့ၣ်ညါဘၣ်လၢရ့ဟီၣ်ကဝီၤဖိအိၣ်န့ၣ်လီၤ
