လါယူၤ ၉သီ၊၂၀၂၃နံၣ်
ကညီကီၢ်စဲၣ် ဖၣ်အၣ်ဝ့ၢ်ပူၤ ပယီၤသုးဖှီၣ်ဝဲသိလ့ၣ်လၢလံာ်အုၣ်သးတအိၣ်တဖၣ်န့ၣ် ဖၣ်အၣ်ဝ့ၢ်ဟီၣ်ကဝီၤကမျၢၢ်တဂၤတဲဝဲအသိးသ့ၣ်ညါဘၣ်န့ၣ်လီၤ
ဖၣ်အၣ်ဝ့ၢ်ပူၤ စးထီၣ်ဖဲလါယူၤ၁သီ ကဖှီၣ်ဝဲသိလ့ၣ်လၢလံာ်အုၣ်သးတအိၣ်တဖၣ်ဒီး ပှၤနီသိလ့ၣ်လၢလံာ်အုၣ်သးတအိၣ်တဖၣ်နာ်က့ ကဖှီၣ်ဟံးန့ၣ်အရ့ဒီး ကဘၣ်လီၤဃိၣ်ပူၤ သၢနံၣ်မ့ၢ်ဂ့ၤ ကဘၣ်ဟ့ၣ်စ့မ့ၢ်ဂ့ၤ ခီဖျိ တၢ်ပီးတၢ်လီကီာ်မ့ၣ် ၈ န့ၣ် ဟးဘိးဘၣ်သ့ၣ်ညါဝဲဒီးထုးထီၣ်ဘိးဘၣ်ရၤလီၤဝဲလၢ စးထီၣ်လၢလါမ့ၤလၢခံကတၢၢ်တနွံန့ၣ်လီၤ
စးထီဖဲတၢ်ဘိးဘၣ်ရၤလီၤဝံၤအလီၢ်ခံ ဖှီၣ်ဃးဝဲသိလ့ၣ်လၢလံာ်အုၣ်သးတအိၣ်တဖၣ်နာ်က့ ပှၤနီသိလ့ၣ်တဖၣ်ထၢနုာ်ဝဲလီၤဃိၣ်ပူၤတအိၣ်ဒံးဘၣ်န့ၣ် သ့ၣ်ညါဘၣ်လၢဖၣ်အၣ်ဝ့ၢ်ဟီၣ်ကဝီၤဖိအိၣ်န့ၣ်လီၤ
တကီၢ်ခါခဲအံၤ ပယီၤသုးစုဖီလာ်ရူပှၤမၤတၢ်ဖိတဖၣ် အိၣ်ခိးသမံသမိးဖှီၣ်ဝဲ သိလ့ၣ်လၢလံာ်အုၣ်သးတအိၣ်တဖၣ်ဖဲ ဖၣ်အၣ်ဝ့ၢ်နုာ်လီၤဟးထီၣ်အလီၢ်ဒီး မုၤနၤခီနာ်က့ တဲဝဲကသမံသမိးတမှံၤစရီဒီးဖှီၣ်ဝဲသိလ့ၣ်လၢလံာ်အုၣ်သးတအိၣ်တဖၣ်န့ၣ် ဖၣ်အၣ်ဝ့ၢ်ဟီၣ်ကဝီၤဖိတဲဝဲလီၤ
“ပပာ်ပတုၤဃးပသိလ့ၣ်လၢ ပဟံၣ်ကရၢၢ်အမဲာ်ညါလီၤ ထံၣ်ဝဲလၢကျဲကပၤဒီးက့ၤဖှီၣ်ဝဲလီၤ တနီန့ၣ်တဲဝဲလၢ ကသမံသမိးတမှံၤစရီဒီးဟဲဝဲလီၤ ထံၣ်ဝဲသိလၣ်လံာ်အုၣ်သးတအိၣ်ဒီးဖှီၣ်ဝဲလီၤ ကိးမုၢ်နၤသမံသမိးဝဲတမှံၤစရီလီၤ သိလ့ၣ်ဘၣ်တၢ်ဖှီၣ်နာ်က့နၣ်ဟူဘၣ်ကိးမုၢ်နံၤလီၤ”န့ၣ်ဖၣ်အၣ်ဝ့ၢ်ဟီၣ်ကဝီၤဖိတဲဝဲလီၤ
ခီဖျိလၢဖှီၣ်သိလ့ၣ်လၢလံာ်အုၣ်သးတအိၣ်တဖၣ်ဒ်အံၤအဃိ ဖၣ်အၣ်ဝ့ၢ်အဃၢၢ်သဝီတဖၣ်အပူၤပှၤလၢဟံးန့ၣ်ဆှၢတၢ်ဒိးတၢ်လာ်တဖၣ်တၢ်ကီတၢ်ခဲအိၣ်ထီၣ်န့ၣ် ပှၤအိၣ်လၢကွဲၣ်တၣ်သဝီပူၤတဖၣ်တဲဝဲလီၤ
“ပမ့ၢ်ကဆှၢတကွံသၣ်လၢဖၣ်အၣ်ဝ့ၢ်န့ၣ်ပဘၣ်ကွာ်တၢ်အိၣ်သး ပဘၣ်ဃုၣ်လဲၤ ပလဲၤဒ်သိးလၢညါတန့ၣ်ဘၣ်သဝီပူၤနာ်က့ကိၣ်တဖၣ်အပှ့ၤထီၣ် ဃုသးနာ်က့ မ့မ့ၢ်ဃုသးအဂ့ၢ်န့ၣ်၁၂ ပရ့ၣ် တထၢၣ်န့ၣ် တကလီာ် ကိၣ်နာ်က့ လၢညါ ၅၀အခဲအံၤကဲထီၣ်၁၅၀ တၢ်ပှ့ၤထီၣ်လၢခံဆးညါ”န့ၣ်အဝဲတဲန့ၣ်လီၤ
ကတီၢ်ခဲအံၤခီဖျိလၢဖှီၣ်သိလ့ၣ်ဒ်အံၤအဃိ ဖၣ်အၣ်ဝ့ၢ်ပူၤ ပှၤဟးထီၣ်က့ၤလီၤစှၤလီၤ
ဖဲအပူၤကွံာ် လါမးရှး တုၤလါမ့ၤအတီၢ်ပူၤ ဖၣ်အၣ်ဝ့ၢ်ဟီၣ်ကဝီၤပူၤ သိလ့ၣ်လၢလံာ်အုၣ်သးတအိၣ်တဖၣ်မ့ၢ်ဘၣ်တၢ်ဖှီၣ်န့ၣ် သိလ့ၣ်အကလုာ်ဖီခိၣ် ဘၣ်ဟ့ၣ်ဝဲစ့အီၣ်လိး သၢကလီၤတုၤ အကလီၤ တဆံနာ်က့ ဆၢကတီၢ်ခဲအံၤမ့ၢ်ဘၣ်တၢ်ဖှီၣ်န့ၣ် ဟံးန့ၣ်ဝဲသိလ့ၣ်တဘျီဃီတကးဒံးဘၣ်ပှၤနီသိလ့ၣ်ဖိနာ်က့ ထၢနုာ်ဝဲဆူဃိၣ်ပူၤန့ၣ်သ့ၣ်ညါဘၣ်န့ၣ်လီၤ
