ပယီၤသုးမၤအါထီၣ်သုးအတၢ်ဟူးတၢ်ဂဲၤလၢကီးတရ့းဝ့ၢ်ဟီၣ်ကဝီၤပူၤ

လါယူၤ ၈သီ၊၂၀၂၃နံၣ်

ကညီကီၢ်စဲၣ် ကီးတရ့းဝ့ၢ်ဟီၣ်ကဝီၤပူၤ ပယီၤသုးမၤအါထီၣ်သုးအတၢ်ဟူးတၢ်ဂဲၤန့ၣ် ကီးတရ့းဝ့ၢ်ဟီၣ်ကဝီၤဖိတဲဝဲန့ၣ်လီၤ

ကီးတရ့းဝ့ၢ်ကလံၤစိးတကပၤသဝီတဖၣ်အပူၤ ပယီၤသုးခးလီၤကျိဖးဒိၣ်ကိးမုၢ်နံၤဒီးမၤအါထီၣ်သုးအတၢ်ဟူးတၢ်ဂဲၤန့ၣ်လီၤ

ခီဖျိလၢခးလီၤကျိဖးဒိၣ်ဒီးမၤဟီၣ်ကဝီၤတၢ်ထီၣ်ဒုးအဃိ ဟီၣ်ကဝီၤဖိတဖၣ် ကိးမုၢ်နံၤအီၣ်အီအိၣ်ဆိးအဂီၤ ဘၣ်ကီဘၣ်ခဲတကးဒံးဘၣ် ခးလီၤကျိဖးဒိၣ်အဃိဟီၣ်ကဝီၤဖိဘၣ်ဒိသံအိၣ်န့ၣ်ကီးတရ့းဝ့ၢ်ဟီၣ်ကဝီၤဖိတဲဝဲန့ၣ်လီၤ

“မုၢ်နၤခီန့ၣ်ခးလီၤကျိဖးဒိၣ်လီၤ ၉၇ခးလီၤ လ့ၣ်ဝ နာ်က့ခးလီၤ ခိဖျိလၢအဝဲသ့ၣ်ခးလီၤအဃိ ပှၤသံအိၣ်အါမးလံ တခးဝဲဒီနၤဘၣ် ပတုၤဝဲဖဲ ၁၂နၣ်ရံၣ်လီၤ အိးထီၣ်မ့ၣ်အူနာ်က့တန့ၣ်ဘၣ် မ့ၢ်အိးထီၣ်န့ၣ်ခးစိပှၤဒီးကျိအဃိ၉နၣ်ရံၣ်ဘျဲၣ်န့ၣ်ဘၣ်မၤသံမ့ၣ်အူလီၤ”န့ၣ်ကီးတရ့းဟီၣ်ကဝီၤဖိတဲဝဲလီၤ

ကီးတရ့းဝ့ၢ်ပူၤ ဖဲလါယူၤ ၇ သီအနံၤ KNLAသုးပာ်ဖှိၣ်တဖၣ်ဒီးပယီၤသုးအဘၢၢ်စၢၢ်တၢ်ဒုးကဲထီၣ်ဒီး ပယီၤသုးစုဖီလာ် ၉၇သုးတဖၣ်ခးလီၤကျိဖးဒိၣ်အဃိ ရွၣ်တ့ရှၣ် သဝီပူၤ သးနံၣ်၁၂နံၣ်ဖိသၣ်သံတဂၤဒီး သးနံၣ် ၄၃ နံၣ်ပိၣ်မုၣ်တဂၤ သးနံၣ်၄နံၣ်ဖိသၣ်တဂၤဘၣ်ဒိန့ၣ်လီၤ

တကးဒံးဘၣ် ကီးတရ့းဝ့ၢ်ပူၤ ပယီၤသုးတဖၣ်ဟးဝ့ၤဝီၤလၢဝ့ၢ်ပူၤဒီးမ့ၢ်ထံၣ်ဝဲ dron န့ၣ်ခးဝဲဒီးကျိန့ၣ်ဟီၣ်ကဝီၤဖိတဲဝဲလီၤ

“ပယီၤသုးတဖၣ်အိၣ်ခိးတၢ်ကိးမုၢ်နၤလီၤ မုၢ်နၤခီခးကျိဖးဒိၣ် စဲးကး ၆၀ န့ၣ်တဖျၢၣ် ၁၂နၣ်ရံၣ်န့ၣ်ပတုၤဝဲလီၤ မဟါန့ၣ် dronအိၣ်ခံခိၣ် တခိၣ်န့ၣ်ပယီၤသုးမၤန့ၣ်လီၤ တခိၣ်န့ၣ်က့ၤဆူပှၢ်ပူၤန့ၣ်လီၤ ဖဲမနၤန့ၣ် dronတခိၣ်လီၤတဲၤဖဲဟံၣ်ကပၤ ပဆိမိၤလီၤတဲၤလၢဟံၣ်အဃိပဘၣ်စံၣ်ထီၣ်လီၤ ခးလီၤဝဲဖဲအဝဲသ့ၣ်ဟးရှးတၢ်အဆၢကတီၢ်လီၤ “န့ၣ်ပှၤအိၣ်လၢကီးတရ့းဝ့ၢ်ပူၤတဂၤတဲဝဲန့ၣ်လီၤ

ဆၢကတီၢ်ခဲအံၤနာ်က့ ပယီၤသုးမၤဃံးထီၣ်တၢ်သမံသမိးလၢ ကီးတရ့းဝ့ၢ်ပူၤဒီး သမံသမိးဝဲကမျၢၢ်ဟးထီၣ်က့ၤလီၤတဖၣ် ဒီးမ့ၢ်နၣ်ဟူဝဲပှၤကနၣ်တၢ်ကစီၤန့ၣ်ဖှီၣ်ဝဲဒီး ပှၤဘၣ်တၢ်ဖှီၣ်ဃးဒ်န့ၣ်အိၣ်အဂၤ၁၀ဘျဲၣ်လံန့ၣ်သ့ၣ်ညါဘၣ်လၢဟီၣ်ကဝီၤဖိအိၣ်လီၤ

တကးဒံးဘၣ်ခိဖျိလၢပယီၤသုး ခးလီၤကျိဖးဒိၣ် ခးလီၤတၢ်ဒီးကဘီယူၤအဃိ ကီးတရ့းကီၢ်ဆၤပူၤသဝီတဖၣ်လၢအမ့ၢ်ဝဲ ကမ့ၣ်ကိ၊စ့ၣ်ဖလါ၊ရွၣ်တါရှၣ်ဒီး ကၠၣ်အ့ကိသဝီတဖၣ်အပူၤ စးထီၣ်ဖဲလါမ့ၤ၁သီတုၤလါယူၤ ၅သီအတီၢ်ပူၤ ခရံာ်ဖိတၢ်ဘၣ်ယွၤသရိၤတဖျၢၣ် တၢ်သိၣ်လိကၠိတဖျၢၣ် ဟံၣ် ၆ဖျၢၣ်ဟးဂီၤတကးဒံးဘၣ် ဟီၣ်ကဝီၤဖိသံတဂၤ ဘၣ်ဒိ အဂၤ ၁၀ဘျဲၣ်န့ၣ် သ့ၣ်ညါဘၣ်ခီဖျိ ဒူပလၣ်ယာ်ကီၢ်ရ့ၤ ထုးထီၣ်တၢ်ကစီၤအသိးန့ၣ်လီၤ