လါယူၤ ၅သီ၊၂၀၂၃နံၣ်
ကညီကီၢ်စဲၣ် ကြုၢ်တုၢ်ဝ့ၣ်ဒီးအဃၢၢ် သဝီတဖၣ်အပူၤပယီၤသုးခးလီၤကျိဖးဒိၣ်အဃိကြုၢ်တုၢ်ဝ့ၢ်ပူၤဟီၣ်ကဝီၤဖိတနီဘၣ်ဃ့ၣ်ပူၤဖျဲးသးန့ၣ်သ့ၣ်ညါဘၣ်လၢလီၢ်ကဝီၤဖိအိၣ်န့ၣ်လီၤ
ပယီၤသုးစုဖီလာ် ခမရ ၅၄၅ ဒီး ခမရ ၅၄၆ သုးတဖၣ်ခးလီၤကျိဖးဒိၣ်ဆူ ကြုၢ်တုၢ်ဝ့ၢ်အဃၢၢ်သဝီတဖၣ်အပူၤဒီးကျိဖးဒိၣ်ကိးမုၢ်နၤဃၣ်ဃၣ်န့ၣ်လီၤ ခိဖျိလၢခးလီၤတၢ်ဒ်အံၤအဃိ ကြုၢ်တုၢ်ဝ့ၢ်ပူၤ ကျိဖးဒိၣ်လီၤတဲၢ်ပိၣ်ဖးထီၣ်ဒီးကြုၢ်တုၢ်ဝ့ၢ်ပူၤလီၢ်ကဝီၤဖိတဖၣ်ဘၣ်ပာ်တ့ၢ်တၢ်အိၣ်တၢ်ဆိးအလီၢ်ဒီးဘၣ်ဃ့ၣ်ပူၤဖျဲးသးန့ၣ်လီၤ
“တနံၤန့ၣ်လဲၤဝဲတစဲးလီၤ အိၣ်တနံၤ ကီကၣ်သဝီပူၤကျိဖးဒိၣ်လီၢ်ဝံၤအလီၢ်ခံ ပှၤအိၣ်လၢသဝီပူၤတဘူၣ်လၢၣ်ဘၣ်မီ ပှၤကညီဘၣ်ဒိအိၣ် ကတီၢ်ခဲအံၤတၢ်ဂၢၢ်တစိၤဖိ ပှၤလဲၤဃ့ၣ်စံၣ်အိၣ်ဆူသဝီအဂုၤအဂၤတဖၣ်လီၤ လၢညါန့ၣ်လဲၤဃ့ၣ်ဝဲဆူ နဘူ သီခါဖၠါလီၤ “ကြုၢ်တုၢ်ဝ့ၢ်ဟီၣ်ကဝီၤဖိတဂၤစံးဝဲန့ၣ်လီၤ
ဖဲအပူၤကွံာ်လါမ့ၤ ၂၈သီ မုၢ်နၤ ၈နၣ်ရံၣ်အဆၢကတီၢ် ကြုၢ်တုၢ်ဝ့ၢ် ခမရ၅၄၆ ခးလီၤကျိဖးဒိၣ်ခံဖျၢၣ်အံၤ လီၤတဲၤပိၣ်ဖးထီၣ်ဖဲ ကီကၣ်သဝီပူၤအဃိ ကီကၣ်သဝီပူၤ ဟံၣ်၆ဖျၢၣ်မ့ၣ်အူအီၣ်ဟးဂီၤဒီးလီၢ်ကဝီၤကမျၢၢ်ဘၣ်ဒိ ၃ဂၤန့ၣ်ခ့ၣ်အဲၣ်ယူၣ်လီၢ်ခၢၢ်သးထုးထီၣ်တၢ်ကစီၤန့ၣ်လီၤ
ဒ်န့ၣ်သိးကြုၢ်တုၢ်ဝ့ၢ်အဃၢၢ် ကီးတရ့းကီၢ်ဆၤသဝီတဖၣ်အပူၤ ပယီၤသုးခးလီၤကျိဖးဒိၣ်အဃိ ဟီၣ်ကဝီၤဖိတဖၣ်အိၣ် လၢဟံၣ်တဘူၣ်အဃိ တၢ်မ့ၢ်ခံးလီၤန့ၣ်ဘၣ်လဲၤအိၣ်ဝဲဆူသီခါဖၠါတဖၣ်န့ၣ်ကီးတရ့းဝ့ၢ်ဟီၣ်ကဝီၤဖိတဖၣ်တဲဝဲန့ၣ်လီၤ
“မုၤခံးန့ၣ်ပှၤအိၣ်လၢသဝီပူၤတဘူၣ်ဘၣ် ပှၤလဲၤအိၣ်ဆူသီခါဖၠါပူၤတနီ ပှၤလဲၤအိၣ်ဆူသဝီအဂၤတနီ ပှၤအိၣ်လၢသဝီပူၤစှၤလီၤ မုၢ်ဆါအဆၢကတီၢ်သဝီပူၤပှၤကညီအိၣ် မုၢ်နၤန့ၣ်ဟးမံလၢတၢ်လီၢ်အဂုၤအဂၤလီၤ ပယီၤသုးတဖၣ်ဟးခးနါစိၤတၢ်ဒ်န့ၣ်လီၤ”န့ၣ်ဟီၣ်ကဝီၤဖိတဲဝဲန့ၣ်လီၤ
ကြုၢ်တုၢ်ဝ့ၢ်အဃၢၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်KNLAသုးပာ်ဖှိၣ်တဖၣ်ဒီးပယီၤသုးအဘၢၢ်စၢၢ်တၢ်ဒုးကဲထီၣ်တပယူၤဃီဒီးပယီၤသုးတကပာ်ခးလီၤကျိဖးဒိၣ်အဃိ စးထီၣ်လၢလါမ့ၤ ၂၅သီတုၤ လါယူၤ ၅သီအတီၢ်ပူၤ ဟီၣ်ကဝီၤဖိသံတဂၤ ဘၣ်ဒိ၅ဂၤဒီးဟံၣ်ဃီဟးဂီၤ ၅ဖျၢၣ်န့ၣ်သ့ၣ်ညါဘၣ်ခီဖျိ ဒူပလၣ်ယၣ်တၢ်ကစီၤထုးထီၣ်သန့အတၢ်ပရၢန့ၣ်လီၤ
