လါယူၤ ၁သီ၊၂၀၂၃နံၣ်
ကညီကီၢ်စဲၣ် ကီးတရ့းကီၢ်ဆၤ တီၣ်ကၠၣ်အ့သဝီပူၤ ပယီၤသုးစုဖီလာ် ပဒိၣ်ကၠိတဖၣ်ဒ်သိးက့ၤအိးထီၣ်က့ၤဝဲကန့ၣ်အဂီၤ စးထီၣ်ဖဲလါမ့ၤ လၢခံကတၢၢ်တနွံ မၤဝဲတၢ်ထံၣ်လိာ်သးဒီး မၤတၢ်အိၣ်ဖှီၣ်န့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ
ပယီၤသုးစုဖီလာ် အထက တီၣ်ကၠၣ်အ့ဒီးလီက့ၣ် အထက(ခွဲ) ကၠိပဒိၣ်တီၤထီကၠိခံဖျၢၣ် ဒ်သိးက့ၤအိးထီၣ်က့ၤကန့ၣ်အဂီၤ ကလုာ်ဖှီၣ်စုကဝဲၤကရူၤကရၢ၊PDFဒီး ပယီၤသုးစုဖီလာ် ပှၤဘၣ်မူဘၣ်ဒါလၢတၢ်ကူၣ်ဘၣ်ကူၣ်သ့ရူတဖၣ် ထံၣ်လိာ်သးဒီးမၤဝဲ တၢ်တဲသကိးလိၣ်သးမဲာ်သကိးမဲာ်န့ၣ်တီၣ်ကၠၣ်အ့သဝီဖိတဂၤတဲဝဲန့ၣ်လီၤ
“ကအိးထီၣ်က့ၤဝဲကၠိခံဖျၢၣ်လီၤ အဂၤတီၤဖုၣ်ကၠိတဖၣ်တအိးထီၣ်တဲဘၣ် အခဲကအိးထီၣ်ဝဲတီၤထီကၠိဒီးတီၤထီကၠိ(ခွဲ) မငါတနံၣ်န့ၣ်သဝီတဖၣ်ပူၤကၠိအိးထီၣ်ကိးဖျၢၣ်လီၤ ကမီးကသုၣ်၊ကီးဖီ၊လီက့ၣ်၊တီၣ်ကၠၣ်အ့န့ၣ်အခဲအံၤပဒိၣ်ကအိးထီၣ်ကၠိမီနီ အါတက့ၤပှၤအဲၣ်ဒိးထီၣ်လီၤ EAOsဒီးPDFတဖၣ်တအဲၣ်ဒိးဟ့ၣ်အခွဲးဘၣ်န့ၣ်သ့ၣ်ညါဘၣ်လီၤအခဲအံၤအဝဲသ့ၣ်အိၣ်ဖှိၣ်တဲသကိးတၢ်လီၤ အိးထီၣ်တအိးထီၣ်တလီၤတံၤဒံးဘၣ်”န့ၣ်အဝဲတဲဝဲလီၤ
ကလုာ်ဒိၣ်ဖှီၣ်စုကဝဲၤကရူၤကရၢ၊PDFတဖၣ် အဲၣ်ဒိးအိးထီၣ်ဝဲဒၣ်ကၠိလၢတမ့ၢ်ပဒိၣ်ကၠိတဖၣ်နာ်က့ ပဒိၣ်ကၠိသရၣ်သရၣ်မုၣ်တလၢပှဲၤအဃိ အဲၣ်ဒိးအိးထီၣ်က့ၤဝဲပဒိၣ်ကၠိဒီး ခီဖျိလၢသုးအတၢ်ဖ့ၣ်ဆၢအပူၤ ဟီၣ်ကဝီၤကမျၢၢ်တဖၣ် တၢ်ကူၣ်ဘၣ်ကူၣ်သ့ဒီး တၢ်အိၣ်ဆူၣ်အိၣ်ချ့အဂီၤ တၢ်လီၤဆံးလီၤစှၤအိၣ်န့ၣ်ဟီၣ်ကဝီၤဖိတဲဝဲန့ၣ်လီၤ
ဘၣ်ဃးဒီးတၢ်ကအိးထီၣ်က့ၤကၠိတၢ်ဂ့ၤအံၤအဖီခိၣ် ဟီၣ်ကဝီၤဖိတဂၤတဲဝဲ”ပမၤကွၤကၠိဖိဆံးဝံၤလံ တၢ်ဘၣ်လီၤဘၣ်ဆးတအိၣ်ဘၣ် ပဒိၣ်ကၠိမ့ၢ်အိးထီၣ်န့ၣ်ပထံၣ်လၢကဂ့ၤဒိၣ်လီၤ ခီဖျိလၢပဒိၣ်ကၠိအဃိ သရၣ်/သရၣ်မုၣ်ကအိၣ်လၢပှဲၤ ဖိသၣ်တဖၣ်တၢ်ဆၢကတီၢ်လၢၤကွံၤလီၤ တသ့ထီၣ်တၢ်နီတမံၤဘၣ် ကမၤလိလံာ်ဒီး onlineနာ်က့ Data Connection တဖၣ်ယံာ်ထီၣ်အၢထီၣ်လီၤ တၢ်ဃုထၢကအိၣ်က့ၤဒၣ်ပဒိၣ်ကၠိလီၤ”န့ၣ်အဝဲတဲလီၤ
လီက့ၣ် အထက (ခွဲ)တီၤထီကၠိအံၤ ဖဲ၂၀၂၂တၢ်မၤလိနံၣ်န့ၣ် ကၠိဖိအိၣ်၄၀၀ဃၣ်ဃၣ်ဒီး ၂၀၂၃ နံၣ်န့ၣ်ကၠိဖိဟးထီၣ် ၅၀ဃၣ်ဃၣ်ဝံၤဟံးန့ၣ်တၢ်ဟးထီၣ်ကၠိလံာ်အုၣ်သးဒီးလဲၤထီၣ်က့ၤဝဲဆူ ဖၣ်အၣ်၊မီၣ်လမၠ့ၤဒီးကီၢ်ဆၤအဂုၤအဂၤပူၤကၠိတဖၣ်န့ၣ်သ့ၣ်ညါဘၣ်န့ၣ်လီၤ
ဖဲအပူၤကွံၤ ၂၀၂၂ တၢ်မၤလိနံၣ်အတီၢ်ပူၤ နီၣ်တလၣ်သဝီဒီးဖါကၠးသဝီပူၤ ကၠိဖိပှၤအိးထီၣ်ခံဖျၢၣ်ဒီး ကၠိဖိနီၢ်ဂံၢ်အိၣ် ၈၀ဘျဲၣ်သနာ်က့ သရၣ်/သရၣ်မုၣ်တအိၣ်လၢပှဲၤတကးဒံးဘၣ် တၢ်ကီတၢ်ခဲအိၣ်လၢတၢ်သိၣ်လိလံာ်အဒိသ့ၣ်တဖၣ်အဃိ အိးထီၣ်ကၠိန့ၣ်ဒၣ်သၢလါန့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ