ပယီၤသုးတဖၣ်ဖှီၣ်ကီးတရ့းဝ့ၢ်ဟီၣ်ကဝီၤဖိတဖၣ်တပယူၤဃီ

လါယူၤ ၂သီ၊၂၀၂၃နံၣ်

ကညီကီၢ်စဲၣ် ကီးတရ့းကီၢ်ဆၤပူၤပယီၤသုးဖှီၣ်ဝဲကီးတရ့းဝ့ၢ်ဟီၣ်ကဝီၤဖိတဖၣ်တပယူၤဃီန့ၣ်ကီးတရ့းဟီၣ်ကဝီၤဖိတဲဝဲအသိးသ့ၣ်ညါဘၣ်န့ၣ်လီၤ

ပယီၤသုးလၢအိၣ်ဖဲကီးတရ့းဝ့ၢ်ပူၤခလရ ၉၇သုးရ့ၣ်ဘၣ်တၢ်နုာ်လီၤခးအီခီဖျိKNLAသုးပာ်ဖှိၣ်တဖၣ်ဖဲလါမ့ၤ၈သီအနံၤအဃိ ပယီၤသုးသံ၅ဂၤန့ၣ်လီၤ
စးထီၣ်ဖဲခလရ၉၇သုးရ့ၣ်ဘၣ်တၢ်နုာ်လီၤခးအီဝံၤအလီၢ်ခံ ပယီၤသုးတဖၣ်ဖှီၣ်ဝဲကီးတရ့းဝ့ၢ်ပူၤပှၤမၤထံရူၤကီၢ်သဲးတဖၣ်၊CDMတဖၣ်ပှၤမၤစၢၤတၢ်ဖိအဂၤ၄၀ဘျဲၣ်ဒီးတုၤခဲအံၤပူၤဖျဲးက့ၤဒၣ်တနီလီၤ
တကီၢ်ခါခဲအံၤ ကီးတရ့းဝ့ၢ်ပူၤဖှီၣ်အါထီၣ်ဟီၣ်ကဝီၤကမျၢၢ်တဖၣ်န့ၣ် ကီးတရ့းဟီၣ်ကဝီၤဖိတဖၣ်တဲဝဲလီၤ

“ပှၤလၢဘၣ်တၢ်ဖှီၣ်ဃးအီလၢညါအကျါထူၣ်ဖျဲးထီၣ်က့ၤဒၣ်တနီဒံးလီၤ အခဲဖှီၣ်အါထီၣ်ဝဲ၄ဂၤ မုၢ်နၤခီထီၣ်ဝဲလၢဟံၣ်ပူၤဒီးဖှီၣ်ဝဲလီၤ အိၣ်၅သီလံ ပှၤလၢဘၣ်တၢ်ဖှီၣ်ဃးအီတံတဂၤဒီးအဖိခွါခံဂၤန့ၣ်တဲဝဲလၢပှၤမၤစၢၤတၢ်ဖိလီၤ သးနံၣ်အိၣ်၆၀ဘျဲၣ်လံန့ၣ်မၤဝဲကကဲဧါတဆိကမိၣ်ဝဲဘၣ် အခဲကသမံသမိးအဝဲသ့ၣ်အမါတဖၣ်လီၤ ဖှီၣ်ဃးဝဲလၢကဃ့စ့အဂီၤလီၤ”န့ၣ်ကီးတရ့းဝ့ၢ်ဟီၣ်ကဝီၤဖိတဲဝဲလီၤ

တကးဒံးဘၣ်ပယီၤသုးတဖၣ်အံၤ မၤဃံးထီၣ်တၢ်သမံသမိးန့ၣ်လၢညါလၢကီးတရ့းဝ့ၢ်ပူၤဒီးပှၤမ့ၢ်ကွာ်တၢ်ကစီၤပှၤသူလီၤတဲစိၤန့ၣ်ဖှီၣ်ဝဲန့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ

“လၢEPCရူကပာ်န့ၣ်သမံသမိးဝဲခံသီတဘျီလီၤ ဝ့ၢ်ပူၤန့ၣ်သမံသမိးဝဲထီဘိလီၤ ပမ့ၢ်ထံၣ်အဝဲသ့ၣ်ပဘၣ်ဃ့ၣ်လီၤ တမ့ၢ်တၢ်နီမံၤနာ်က့ပပျံၤလီၤ လီၤတဲစိၤပူၤTVပူၤပကွာ်တၢ်ကစီၤတန့ၣ်ဘၣ် မ့ၢ်ကွာ်န့ၣ်ဖှီၣ်ဝဲလီၤ တမ့ၢ်ပshareတၢ်ကစီၤဘၣ် ကွာ်ဒၢးဖှီၣ်လီၤ မ့ၢ်ဟးလၢကျဲခိၣ်ဒီးကွဲၤဒီနၣ်တန့ၣ်ဘၣ် မ့ၢ်ထ့ၣ်န့ၣ်ဖှီၣ်ဝဲလီၤ “န့ၣ်ပှၤအိၣ်ဆိးဖဲန့ၣ်တဂၤစံးဝဲလီၤ

တကီၢ်ခါခဲအံၤနာ်က့ ပယီၤသုးတဖၣ်အိၣ်ခိးကွာ်ဝဲ ပှၤလၢဟးထီၣ်လၢဃိၣ်ပူၤခီဖျိထံရူၤကီၢ်သဲးတဖၣ်န့ၣ်ကီးတရ့းဝ့ၢ်ဟီၣ်ကဝီၤဖိတဲဝဲန့ၣ်လီၤ

ကီးတရ့းဝ့ၢ်ပူၤပယီၤသုးမၤဃံးထီၣ်တၢ်သမံသမိးတကးဒံးဘၣ် ခးလီၤကျိဖးဒိၣ်ဆူကီးတရ့းဝ့ၢ်အဃၢၢ်သဝီတဖၣ်အပူၤဃိ လီၢ်ကဝီၤဖိလၢဘၣ်ဒိနီၢ်ဂံၢ်အိၣ်ထီၣ်လၢ အဂၤ၁၀ဘျဲၣ်လံန့ၣ်သ့ၣ်ညါဘၣ်န့ၣ်လီၤ